ސައުދީ އަރަބިއްޔާގައި ކުރިއަށްދާ ގަލްފް އަރަބި ލީޑަރުންގެ ސަމިޓާއެކު، ގަތަރާއެކު ގަލްފުގެ ގައުމުތަކަށް އަޅާފައިވާ ފިޔަވަޅުތަކަށް ނިމުމެއް އަންނާނެ ކަމަށް މަސްރަހު ދިރާސާ ކުރާ ފަރާތްތަކުން ބުނެފިއެވެ.

ގަތަރާއި ގަލްފް އަރަބި ގައުމުތަކާއި ދެމެދު ގުޅުންކަނޑާލާ މައްސަލަތައް އުފެދިފައިވަނީ އީރާނާއެކު ގަތަރުން ގުޅުން ބާއްވާ ޓެރަރިޒަމަށް ފަންޑުކުރާ ކަމަށް ބުނެއެވެ. ގަތަރާއެކު ގުޅުންކަނޑާލާފައިވާ ގައުމުތަކުގެ ތެރޭގައި ސައުދި އަރަބިއްޔާ، ޔޫއޭއީ، ބަހްރައިން، މިސްރު ހިމެނެއެވެ. 2017 ވަނަ އަހަރު މި ގައުމުތަކުން ގަތަރާއެކު ގުޅުން ކަނޑާލީ ޓެރަރިޒަމަށް ތާއިދުކުރާ ކަމަށް ބުނެއެވެ. ނަމަވެސް ގަތަރުން އެކަން ދޮގު ކުރެއެވެ.

ގަތަރުގެ އަމީރު ޝައިހް ތަމީމް ބިން ހައްމާދު އަލްޘާނީ ސައުދީގެ މި ސަމިޓުގައި ބައިވެރިވެވަޑައިގަންނަވައެވެ. ސައުދީން ވަނީ އެގައުމުގެ ވައިގެ ސަރަހައްދާއި ކަނޑުގެ ސަރަހައްދުގެ އިތުރުން އެއްގަމުގެ ސަރަހައްދު ގަތަރަށް ހުޅުވާލާ ބޯޑަރު ހުޅުވާލާނެކަން އިއުލާން ކޮށްފައެވެ. ނަމަވެސް މިގޮތަށް ނިންމީ ޑީލެއްގެ ދަށުންނެވެ. އަދި ޑީލުގައި އެމެރިކާގެ އޮފިޝަލެއް އަންގާރަ ދުވަހު ސޮއިކުރާނެ ކަމަށް ހަބަރު ލިބިފައިވެއެވެ.

ޖޫން 2017 ގައި ސައުދީން ގަތަރާ ގުޅުން ކަނޑާލާ ވިޔަފާރީގެ ދަތިކުރުމުގެ ފިޔަވަޅުތައް އަޅައިފައިވެއެވެ. އަދި އެ ފިޔަވަޅުތައް އުވާލުމަށް 13 ކަމަކަށް ޑިމާންޑު ކުރިއެވެ. އޭގެ ތެރޭގައި އަލް ޖަޒީރާ ޓީވީ ހުއްޓާލުމަށް އެންގި ނަމަވެސް އެއިން އެއްވެސް ކަމަކަށް ގަތަރުން ތަބާވެފައެއް ނުވެއެވެ.