މާރުކޭޓުގެ ގޮޅިތަކާއި ގާޑިޔާތައް ކުއްޔަށް ހިފާ ފަރާތުން އިތުރު ފަރާތަކަށް ކުއްޔަށް ދީފިނަމަ އެގޮޅިތަކާއި ގާޑިޔާތައް އަތުލާގޮތައް ކަނޑައަޅައި މާރުކޭޓުތަކުގެ ގޮޅިތަކާއި ގާޑިޔާތައް ކުއްޔަށް ދިނުމާބެހޭ އުސޫލު ޢާއްމުކޮށްފިއެވެ.

ބުދަދުވަހު ސަރުކާރުގެ ގެޒެޓްގައި ޝާއިއުކޮށް ޢާއްމުކޮށްފައިވާ މި އުސޫލުގައި ބުނެފައިވާ ގޮތުގައި ގޮޅިތަކާއި ގާޑިޔާތައް ކުއްޔަށް ދޫކުރުމަށްޓަކައި ފުރުސަތު ހުޅުވާލުމުގެ ގޮތުން މިނިސްޓްރީއޮފް ހައުސިން އިންފްރާސްޓަރަކްޗަރއިން ޢާއްމުކޮށް އިއުލާން ކުރަން ވާނެ ކަމަށެވެ. އަދި ކުއްޔަށް ދޫކޮށްފައިވާ ތަނެއްގެ މުއްދަތު ހަމަވުމުގެ އެއްމަސް ދުވަސް ކުރިން ދެވަނަ ފަހަރަށް އެތަނެއް ކުއްޔަށް ދޫކުރަން ހުޅުވާލާ ޢާންމު ކުރަން ވާނެ ކަމަށެވެ.

މީގެ އިތުރުން ކުއްޔަށް ހިފާ ފަރާތުން މުއްދަތު ހަމަވުމުގެ ކުރިން ދޫކޮށްލާނަމަ ދޫކޮށްލާތާ ދެހަފްތާގެ ތެރޭގައި އަލުން ކުއްޔަށް ދޫކުރުމަށް އިއުލާން ކުރަން ޖެހޭނެ ކަމަށްވެސް އެއުސޫލުގައި ވަނީ ބުނެފައެވެ.

އެއުސޫލުގައިވާ ގޮތުން ގޮޅި ނުވަތަ ގާޑިޔާ ކުއްޔަށް ދޫކުރެވޭނެ އެންމެ ދިގު މުއްދަތަކީ އެއްއަހަރު ދުވަހެވެ. އަދި ކުއްޔަށް ހިފާފަރާތުން އެހެން މީހަކަށް ކުއްޔަށް ދީފިނަމަ 5000 ރުފިޔާއިން ޖޫރިމަނާކޮށް އެތަނެއް އެފަރާތެއްގެ އަތުން އަތުލެވޭނެ ކަމަށްވެސް އެއުސޫލުގައި ވަނީ ބުނެފައެވެ.

އެއުސޫލުގައި ބުނެފައިވާ ގޮތުގައި އެފަދަ ތަނެއްގައި ވިއްކޭނީ ހައުސިންގ މިނިސްޓްރީން ކަނަޑާއަޅާ ތަކެތި ކަމަށާއި ކުއްޔަށް ދޫކޮށްފައިވާ ތަންތަނުގެ ބޭރުގައި އެއްވެސް އެއްޗެއް ނުބެހެއްޓޭނެ ކަމަށްވެސް އެއުސޫލުގައި ބުނެފައިވެއެވެ.

ބުދަދުވަހުން ފެށިގެން މިއުސޫލަށް ޢަމަލުކުރަން ފަށާފައިވާކަމަށްވެސް އެއުސޫލުގައި ވަނީ ބުނެފައެވެ.