އަވަސް މުސްތަގުބަލެއްގައި ރާއްޖެ ކާބަން ނިއުޓްރަލް ނުކުރެވިއްޖެނަމަ މިނިސްޓަރުގެ އިތުބާރު ނެތްކަމުގެ މައްސަލަ ހުށައަޅާނެ ކަމަށް އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީގެ މެމްބަރުން ވިދާޅުވެއްޖެ އެވެ.
އާދިއްތަ ދުވަހު ބޭއްވި މޫސުމަށް އަންނަ ބަދަލުތަކާބެހޭ ބިލް ދިރާސާކުރުމަށް ބޭއްވި ކޮމިޓީ ބައްދަލުވުމުގައި ވާހަކަ ދައްކަވަމުން މެމްބަރުން ވަނީ މިނިސްޓަރުގެ އިތުބާރު ނެތް ކަމުގެ މައްސަލަ ހުށައެޅުއްވުމަށް ތާއީދުކުރައްވާ ވާހަކަދައްކަވާފައެވެ.
މޫސުމަށް އަންނަ ބަދަލުތަކާއި ގުޅިގެން ދުނިޔެއަށް ކުރިމަތިވާ ނުރައްކާ ކުޑަކުރުމަށް، ޖައްވަށް ބޭރުކުރާ ގްރީން ހައުސް ގޭސް މަދުކުރުމަށް، ޤައުމުތަކުން ކަނޑައަޅާފައިވާ ލަނޑުދަނޑިތައް މައްޗަށް ޖެއްސުމަށް ރާއްޖެއިން ބާރުއަޅަން ޖެހޭ ކަމަށް ވިދާޅުވެ ކޮމެޓީގެ މުގައްރިރު އަދި ހޯރަފުށީ ދާއިރާގެ މެމްބަރު އަހުމަދު ސަލީމު ވަނީ މިއީ އެހެން ގައުމުތަކާއި ޖަހާ ރޭހެއްގެ ގޮތުގައި ސިފަކުރައްވާފައެވެ. އެހެން ކަމުން 2050 ވަނަ އަހަރަށް ރާއްޖެ ކާބަން ނިއުޓްރަލް ކުރެވޭނެ ކަމަށް ވިދާޅުވެ، އިއުލާނުކުރާ ދުވަހަކީ އެންވާރަމެންޓް މިނިސްޓަރ ޑރ. ހުސެއިން ރަޝީދު ހަސަންގެ އިތުބާރު ނެތް ކަމުގެ މައްސަލަ މަޖިލީހަށް ހުށައަޅާނެ ދުވަސް ކަމަށް ވިދާޅުވެ ނުރުހުން ފާޅުކުރެއްވިއެވެ.
ރޭހެއް ޖަހަން މިއުޅެނީ އިގޭތޯ. ރޭސް ޖަހާ ރޭހުގެ ކުރި ހޯދަން މިއުޅެނީ އަޅުގަނޑުގެ ވާހަކަ އަކީ ތިބޭފުޅުން ތިބުނާ ޓާގެޓަށް 2050 ޖަހާފަ އިއުލާން ދުވަހު އެންވާރަމެންޓް މިނިސްޓަރުގެ އިތުބާރު ނެއްކަމަށް އަޅުގަނޑު އިސްވެ ހުރެ ހުށައަޅާނަން. ވަރަށް ސާފުކޮށް މިބުނަނީ، ދެން އަޅުގަނޑު އުންމީދު ކުރަން އެހެން އިއްޒަތްތެރި މެންބަރުން އަޅުގަނޑާ މިކަމުގައި ބައިވެރިވާނެ ކަމަށް. އެއި އަޅުގަނޑަށް ދެން އެހިސާބުން ޓްރަސްޓެއް ނުކުރެވޭނެ އިގޭތޯ. އަޅުގަނޑުމެންގެ ބޭނުމަކީ ދިވެހިރާއްޖެ އެމްބީޝިއަސް މަސައްކަތް ތަކެއް ކޮށް ދުނިއެއަށް ނަމޫނާ ދެއްކުން.މެންބަރު އަހުމަދު ސަލީމު
މެންބަރުން ވިދާޅުވީ މި މައްސަލަ ސީރިއަސް ކަމެއްގޮތުގައި ނަގައިގެން އެކަމަށް އަވަސް ހައްލެއް ހޯދުމަށް މަޝްވަރާތައް ކުރިއަށް ގެންދާއިރު އެންވާރަމެންޓް މިނިސްޓްރީއިން އެކަމަށް ދައްކަނީ ބަހަނާ ކަމަށެވެ.
ކޮމެޓީގެ މުގައްރިރު މިހެން ވިދާޅުވެފައިވާއިރު މީގެ އަހަރެއްހާ ދުވަސް ކުރިން މަޖިލީހުގެ ތަޅުމުގައި ބަހުސްކުރައްވަމުން އޭނާ ވަނީ ކުރިއަށް އޮތް ފަސްއަހަރު ތެރޭގައި ދިވެހި ރާއްޖެ އަލުން ކާބަން ނިއުޓްރަލް ގައުމަކަށްވުމަށް ބިލުގައި ހިމެނުމަށް ގޮވާލައްވާފައެވެ.
ރާއްޖެއިން ޖައްވަށް ގްރީންހައުސް ގޭސް އެންމެ ގިނައިން ބޭރުކުރާ ދާއިރާތަކަށް ބަލާލާއިރު އޭގެ 67 އިންސައްތަ ހިއްސާކުރަނީ ކަރަންޓު އުފެއްދުމަށް ކަމަށް މެމްބަރު ވިދާޅުވިއެވެ. އަދި އޭގެ 47 އިންސައްތަ އަކީ ރިސޯޓު ދާއިރާއިން އުފައްދާ ކަރަންޓުގެ ސަބަބުން ބޭރުވާ ގޭހެވެ. ހަމައެކަނި ކަރަންޓު އުފެއްދުމަށް އަމާޒުކުރި ކަމުގައި ވީނަމަވެސް، އިޔާދަކުރަނިވި ހަކަތައަށްދާން ނިންމިކަމުގައި ވީނަމަވެސް، ކާބަން ނިއުޓްރަލް ވުމަށް އެއްވެސް ހުރަހެއް ނެތް ކަމަށް މެންބަރުން ފާހަގަ ކުރައްވާފައިވެއެވެ.