އަންނަ އަހަރަށް ލަފާކޮށް ސަރުކާރުން ހުށައަޅާފައިވާ ބަޖެޓުގައި ކޯޓުތައް އިމާރާތް ކުރުމަށް 21.4 މިލިއަން ރުފިޔާގެ ބަޖެޓެއް ކަނޑައަޅައިފި އެވެ.
ސަރުކާރުގެ ބަޖެޓު ފޮތަށް ބަލާއިރު، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުގެ ޕީއެސްއައިޕީ ބަޖެޓުގައި ނުވަ ކޯޓެއް އިމާރާތް ކުރުމުގެ މަސައްކަތް ކުރުމަށް ވަނީ ބަޖެޓުކޮށްފަ އެވެ. އޭގެ ތެރޭގައި އަލަށް ފަށާ ހަތް މަޝްރޫއަކާއި މިހާރު ޓެންޑަރިންގ މަރުހަލާގައި އޮތް ދެ މަޝްރޫއެއް ހިމެނެ އެވެ.
އަންނަ އަހަރު އަލަށް ފަށާ މަޝްރޫއުތަކުގެ ތެރޭގައި މާލެ ކޯޓް ކޮމްޕެލްކްސް އިމާރާތް ކުރުމާއި، ދިވެހިރާއްޖޭގެ ސުޕްރީމް ކޯޓުގެ އިމާރާތުގެ އިތުރުން އައްޑޫ ސިޓީ ޑިސްޓްރިކްޓް ކޯޓު އިމާރާތްކުރުމުގެ މަޝްރޫއު ހިމެނެ އެވެ. އޭގެ އިތުރުން ހަތަރު މެޖިސްޓްރޭޓް ކޯޓެއްގެ އައު އިމާރާތް އެޅުމުގެ މަސައްކަތް ފެށުމާއި، މިހާރު ވެސް ޓެންޑަރ ކުރެވިފައިވާ ދެ މެޖިސްޓްރޭޓް ކޯޓެއްގެ މަސައްކަތް ކުރުމަށް ވަނީ ބަޖެޓުކޮށްފަ އެވެ.
މީގެ ތެރެއިން މާލެ ކޯޓް ކޮމްޕްލެކްސް އިމާރާތް ކުރުމަށް 12.4 މިލިއަން ރުފިޔާގެ ބަޖެޓެއް އަންނަ އަހަރަށް ކަނޑައަޅާފައިވާއިރު، މި މަޝްރޫއަށް ތިން އަހަރުގެ ތެރޭގައި 24.9 މިލިއަން ރުފިޔާ ހަރަދު ވާނެ ކަމަށް ވަނީ ލަފާކޮށްފައެވެ. މި އަހަރުގެ ފެބްރުއަރީ މަހު އެޗްޑީސީ އިން ވަނީ މި މަސައްކަތް ކުރުމަށް ހުޅުމާލެއިން 38،000 އަކަފޫޓަށް ވުރެ ބޮޑު ބިމެއް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަށް ދޫކޮށްފަ އެވެ.
އޭރު ޑީޖޭއޭ އިން ހާމަކުރި މައުލޫމާތަށް ބަލާއިރު، އެ ތަނުގައި ފުރަތަމަ ފިޔަވަހީގައި އަޅާނީ 10 ބުރީގެ އިމާރާތެއް ކަމަށެވެ. މި ފިޔަވަހީގެ ދަށުން އެ އިމާރާތަށް ބަދަލު ކުރަން ނިންމާފައި ވަނީ ސިވިލް ކޯޓާއި، ފެމިލީ ކޯޓުގެ އިތުރުން ޖުވެނައިލް ކޯޓެވެ. ދެވަނަ ފިޔަވަހީގެ ދަށުން އަޅާ އިމާރާތަށް ބަދަލު ކުރާނީ ކްރިމިނަލް ކޯޓެވެ. އަދި އެ ކޯޓް ކޮމްޕްލެކްސްގެ މަޝްރޫއު އެއްކޮށް ނިމުމުން މާލޭގައި ހުރި ހުރިހާ ސުޕީރިއަރ ކޯޓުތަކާއި ހައި ކޯޓު އެތަނަށް ބަދަލު ކުރުމަށް އޮތީ ވިސްނާފަ އެވެ.
ޑީޖޭއޭގެ ޕީއެސްއައިޕީ މަޝްރޫއުތަކާއި 2021 ހުށައެޅި ބަޖެޓު
- މާލެ ކޯޓް ކޮމްޕްލެކްސް އިމާރާތް ކުރުން: 12،468،750ރ.
- އައްޑޫ ސިޓީ ޑިސްޓްރިކްޓް ކޯޓް އިމާރާތް ކުރުން: 5،700،000ރ.
- ދިވެހިރާއްޖޭގެ ސުޕްރީމް ކޯޓް އިމާރާތް: 1،500،000ރ.
- ހއ. ބާރަށު މެޖިސްޓްރޭޓް ކޯޓުގެ އައު އިމާރާތް: 300,000ރ.
- ރ. އަނގޮޅިތީމު މެޖިސްޓްރޭޓް ކޯޓުގެ އައު އިމާރާތް: 300,000ރ.
- ކ. ހުރާ މެޖިސްޓްރޭޓް ކޯޓުގެ އައު އިމާރާތް: 300,000ރ.
- މ. ވޭވަށު މެޖިސްޓްރޭޓް ކޯޓުގެ އައު އިމާރާތް: 300,000ރ.
- ތ. ގުރައިދޫ މެޖިސްޓްރޭޓް ކޯޓުގެ އައު އިމާރާތް: 300,000ރ.
- ގދ. ވާދޫ މެޖިސްޓްރޭޓް ކޯޓުގެ އައު އިމާރާތުގެ މަސައްކަތް: 300,000ރ.
ކޯޓުތައް އިމާރާތް ކުރުމުގެ މަސައްކަތް އަންނަ އަހަރު ފެށިގެން ދިއުމަކީ ޝަރުއީ ދާއިރާ އިތުރަށް ހަރުދަނާ ކުރުމަށް އެޅޭ މުހިއްމު ފިޔަވަޅަކަށް ވެގެން ދާނެ އެވެ.
އެގޮތުން ޖާގައިގެ ދަތިކަމަކީ މައްސަލަތައް އަވަހަށް ނިންމަން ކޯޓުތަކަށް ދިމާވެފައިވާ އެންމެ ބޮޑު ގޮންޖެހުމަށް ވާއިރު، އެ މައްސަލަ ހައްލު ވުމުން މައްސަލަތައް އަވަހަށް ނިންމޭނެ ކަމަށް ޑީޖޭއޭ އިން ވަނީ ބުނެފަ އެވެ.
