ސޯޝަލް މީޑިއާ އެކްޓިވިސްޓް އަދި ބްލޮގަރ، ޔާމީން ރަޝީދު، ރަޙުމުކުޑަ، އަނިޔާވެރި ގޮތަކަށް މަރައިލުމަކީ މިނިވަން މީޑިއާއަށް ދީފައިވާ ހަމަލާއެއް ކަމަށް ސަރުކާރުން ބުނެފިއެވެ.
ޔާމީންގެ މަރާއި ގުޅިގެން، ސަރުކާރުން ނެރުނު ބަޔާނެއްގައި ބުނެފައިވަނީ، އޭނާގެ މަރަކީ ރާއްޖޭގެ ސޯޝަލް މީޑިއާއަށް ލިބުނު އުނި ކަމެއް ކަމަށާ، މިއީ ރާއްޖޭގެ ޑިމޮކްރަސީއަށާއި މިނިވަން މީޑީއާއަށް ދިން ހަމަލާއެއްގެ ގޮތުގައި ސަރުކާރުން ދެކޭ ކަމަށެވެ.
ރައީސް އޮފީހުގެ ބަޔާނުގައި ޔާމީންގެ އާއިލާއަށް ތައުޒިޔާ ކިޔައި، އިތުރަށް ބުނެފައިވަނީ، މި ޖަރީމާ ހިންގި ފަރާތްތައް ޤާނޫނުގެ ކުރިމައްޗަށް ގެނައުމަށް ސަރުކާރުގެ ހުރިހާ ވަޞީލަތްތަކެއް ބޭނުން ކުރާނެ ކަމަށެވެ.
މި މައްސަލަ ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުން މިހާރު ތަހުގީގު ކުރަމުންދާއިރު، މިފަދަ މައްސަލަތަކުގެ ތަހުގީގަށް ބޭނުންވާ ފުލުހުންގެ އޮޕަރޭޓިންގ ޕްރޮސީޖަރ މުޠާލިއާ ކުރުމުގެ މަސައްކަތް މިހާރު ސަރުކާރުން ފަށާފައިވާކަންވެސް މި ބަޔާނުގައި ވަނީ ހާމަކޮށްފައެވެ. ސަރުކާރުން ބުނީ އެ މަސައްކަތަކީ ރާއްޖޭގެ ނޫސްވެރިންނާއި އާންމު ފަރުދުންނަށް ލިބޭ އިންޒާރުތަކަށް އަވަސް ފިޔަވަޅު އެޅުމަށް މަގުފަހިކުރުމަށް ކުރާ މަސައްކަތެއް ކަމަށެވެ.
އުމުރުން 29 އަހަރުގެ ޔާމީން މަރާލުމާއި ގުޅިގެން، މިއީ ސޯޝަލް މީޑިއާއަށް ލިބުނު އުނި ކަމެއް ކަމަށާ، މިއީ ރާއްޖޭގެ ޑިމޮކްރަސީއަށާއި މިނިވަން މީޑީއާއަށް ދިން ހަމަލާއެއްގެ ގޮތުގައި ސަރުކާރުން ސިފަކޮށްފައިވާއިރު، ޔާމީން މަރާލުމުގެ ކުރިން 2014 ވަނަ އަހަރުން ފެށިގެން އޭނާއަށް ލިބެމުންދިޔަ މަރުގެ އިންޒާރުތައް ފުލުހަށް ހުށައެޅުމުން އެދެވޭ އެއްބާރުލުމަކާއި، ރައްކާތެރިކަން ނުލިބޭކަން ޔާމީން ވަނީ ޓުވިޓަރ ގައި ހާމަކޮށްފައެވެ.
A few months ago, I reported death threats to @PoliceMv. Haven't heard back from them :( I need a refund on my taxes
— Yameen Rasheed (@yaamyn) January 5, 2015
މީގެ އިތުރުން، ސަރުކާރުން ދަނީ ސޯޝަލް މީޑިއާ އެކްޓިވިސްޓުން ހައްޔަރުކޮށް، މިނިވަން މީޑިއާއަށް ހުރަސްއެޅުމަށް ޤާނޫނާ އެހެނިހެން ވަޞީލަތްތައް ބޭނުން ކުރަމުންނެވެ.
