އަމީނީ މަގުގައި ހުންނަ އެމްޕީއެލް ޕޯޓް ކޮމްޕްލެކްސްގެ ގޯތި ތެރޭގައި އަލިފާނުގެ ހާދިސާއެއް ހިނގައިފި އެވެ.
ރާއްޖެއެމްވީއަށް މައުލޫމާތު ދެއްވަމުން އެމްއެންޑީއެފްގެ މީޑިއާ އޮފިޝަލް ވިދާޅުވީ ހޮނިހިރު ދުވަހުގެ ހެނދުނު 11:00 ހާއިރު އެމްޕީއެލް ލޭބާ ކުއާޓާސް ގައި ހިނގި އަލިފާނުގެ ހާދިސާ މާގިނަ އިރުތަކެއް ނުވަނީސް ކޮންޓްރޯލް ކުރެވިފައިވާ ކަމަށެވެ.
އޮފިޝަލް ވިދާޅުވީ ބެލެވޭ ގޮތުގައި އަލިފާން ރޯވެފައި ވަނީ އެތަނުގައި ބަހައްޓާފައި ހުރި ލަކުނޑި ކުނިތަކެއްގައި ކަމަށެވެ. އަދި އެ ހާދިސާގައި އިތުރު ތަނަކަށް ގެއްލުންވި ކަމުގެ މައުލޫމާތެއް ލިިބިފައިނުވާ ކަމަށް އޭނާ ވިދާޅުވި އެވެ.
އެ ސަރަހައްދުގައި ހުރި ރާއްޖެއެމްވީގެ ރިޕޯޓަރު މައުލޫމާތު ދިން ގޮތުގައި އަލިފާންގަނޑު ނިއްވުމުގެ މަސައްކަތުގައި ހަރަކާތްތެރިވި ފުލުހެއްގެ އަތް ކަފައިގެން ދިއުމުގެ ސަބަބުން ފަރުވާ ދިނުމަށް ހޮސްޕިޓަލަށް ވަނީ ގެންގޮސްފަ އެވެ. އިތުރު އެއްވެސް މީހަކަށް އަނިޔާއެއް ލިބިފައިނުވާ ކަމަށް މައުލޫމާތުދެ އެވެ.
ރާއްޖެއެމްވީގެ ރިޕޯޓަރު މައުލޫމާތު ދިން ގޮތުގައި އަލިފާން ރޯވެފައިވަނީ ކަޅުހަންތަކަކާއި ލަކުނޑިތަކެއްގަ އެވެ. އަލިފާނުގެ ސަބަބުން ޖެހިގެން ހުރި ގުދަނެއްގެ ފާރަށް ގެއްލުން ލިބިފައިވާ ކަމަށް ވެސް މައުލޫމާތު ލިބެ އެވެ.
ފުލުހުންގެ މީޑިއާ އޮފިޝަލް ވިދާޅުވީ އަލިފާނުގެ ހާދިސާއެއް ހިނގުމާ ގުޅިގެން ފުލުހުން އެ ސަރަހައްދުގައި ހަރަކާތްތެރިވަމުންދާ ކަމަށެވެ.
