އައްޑޫސިޓީގެ ދޮންދީނީ އާބާދީއަށް ކާޅުގެ ސަބަބުން ގެއްލުންވެ، ނަސްލު ނެތި ހިގައިދާނެ ކަމުގެ ބިރު ހީވެފައިވާތީ އެކަމަށް އަޅަން ޖެހޭ ފިޔަވަޅު އެޅުމުގެ ހުއްދަ އެންވަޔަރަމެންޓް މިނިސްޓްރީން ދީފިއެވެ.
އައްޑޫ ސިޓީގައި ކާޅު އިތުރުވެ އޭގެ ސަބަބުން ދޮންދީނިގެ ނަސްލު ނެތި ހިނގައިދާނެ ކަމުގެ ބިރު ހީވެފައިވާތީ ކާޅުތައް ނައްތާލުމުގެ ކަންކަން ކުރިއަށްގެންދާނެ ގޮތުގެ ލަފައަކަށް އައްޑޫ ސިޓީ ކައުންސިލުން ވަނީ އެންވަޔަރަމެންޓް މިނިސްޓްރީގައި އެދިފައެވެ.
އެކަމާ ގުޅިގެން އެންވަޔަރަމެންޓް މިނިސްޓްރީން ބުނީ ކާޅަކީ އައްޑޫގައި އާއްމުގޮތެއްގައި އުޅޭ ބާވަތުގެ ދޫންޏަކަށް ނުވާތީ، އޭގެ ސަބަބުން އުނދަގުލަކަށް ވާނަމަ އެއީ ޕެސްޓެއްގެ ގޮތުގައި ބަލާ އަޅަންޖެހޭ ފިޔަވަޅުތަކެއް އެޅިދާނެ ކަމަށެވެ.
އެގޮތުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 42 މާއްދާގެ (ޓ) ގައި ވާ ފަދައިން ޕެސްޓް ކޮންޓްރޯލް ކުރުމުގެ ގޮތުން ކުރަންޖެހޭ ކަމެއް ކަމުގައި ކަނޑައަޅާ އެކަމެއް އެގޮތަކަށް ކުރުމަށް މިމިނިސްޓްރީގެ އިޢުތިރާޒެއް ނެތް ކަމަށެވެ.
މީގެ އިތުރުން ޕެސްޓް ކޮންޓްރޯލް ކުރުމުގެ މަސައްކަތެއް ކުރިއަށް ގެންދިޔުމަށް އަމަލު ކުރަން ގަސްދުކުރާ ކަމެއް ތަންފީޒުކުރުމަށް ސަރުކާރުގެ އެއްވެސް ދާއިރާއެއްގެ އެހީތެރިކަން ބޭނުންވާނަމަ ކަމާއި ބެހޭ ފަރާތްތަކަށް އެހީތެރިކަން ހޯދުމަށް މިނިސްޓްރީން ވަނީ އެދިފައެވެ. އަދި މިކަމުގައި މިނިސްޓްރީގެ އެހީތެރިކަން ބޭނުންވާ ކަމެއްއޮތްނަމަ އެކަމެއް ވެސް އަންގައިދިނުމަށް ވެސް ވަނީ އެދިފައެވެ.
އެންވަޔަރަމެންޓް މިނިސްޓްރީން ބުނީ ޕެސްޓް ކޮންޓްރޯލް ކުރުމުގެ ގޮތުން އައްޑޫގައި ދިރިއުޅޭ ކާޅުތަކާއި މެދު އަމަލު ކުރާ ގޮތެއްގެ މައުލޫމާތު އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އަށް ދިނުމަށާއި ޕެސްޓް ކޮންޓްރޯލް ކުރުމަށް ހިންގާ ހަރަކާތް މޮނީޓަރ ކުރަން އީޕީއޭއިން ބޭނުންވާނަމަ އެ އިންތިޒާމު ހަމަޖައްސައިދިނުމަށް ވެސް ވަނީ އެދިފައެވެ.
