ކޮވިޑް-19ށް ޕޮޒިޓިވްވާ މީހުންގެ ތެރެއިން އެޑްމިޓް ކޮށްގެން ފަރުވާ ދޭން ޖެހޭ މީހުން ނިސްބަތް މަދުވެއްޖެއެވެ.

ހޯމަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވީ ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގެ އައިސީޔޫގައި އެއްވެސް ބަލި މީހަކު މިހާރު ނެތް ކަމަށެވެ. ނަމަވެސް ދަރުމަވަންތަ ހޮސްޕިޓަލްގެ 16 ވަނަ ފަންގިފިލާގެ ވޯޑް އެކަކަށް ފަރުވާ ދެމުންދާ ކަމަށް ޑރ. ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ އާދިއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00ގެ ނިޔަލަށް ހުޅުމާލެ މެޑިކަލް ފެސިލިޓީ 58 މީހަކަށް ފަރުވާ ދެމުންދާ ކަމަށާއި، މި ހުރިހާ މީހުންނަށް ވެސް ފަރުވާ ދެމުންދަނީ ވޯޑުގައި ކަމަށެވެ. އަދި ގއ. ވިލިނގިިލި ކޮވިޑް ފެސިލިޓީގެ ވޯޑުގައި ހަ ބަލި މީހުންނަށް ފަރުވާ ދެމުންދާ ކަމަށް ޑރ. ނަޒްލާ ވިދާޅުވިއެވެ.

މީގެ އިތުރުން ޑރ. ނަޒްލާ ވިދާޅުވީ ހާލު ބޮޑުވެގެން ކޮވިޑްގެ އެއްވެސް ބަލި މީހެއް އައިސީޔޫ ނުވަތަ ވެންޓިލޭޓަރަށް ލެވިފައިނުވާ ކަމަށެވެ. އަދި ވޭތުވެދިޔަ ހަތަރު ދުވަހު އައިސީޔޫގައި ކޮވިޑްގެ ބަލި މީހަކަށް ފަރުވާދީފައިނުވާކަން ޑރ. ނަޒްލާ ފާހަގަކުރެއްވިއެވެ.

ޑރ. ނަޒްލާ ވިދާޅުވީ މިވަގުތު ޖުމްލަ 65 މީހުންނަށް ހޮސްޕިޓަލްގައި އެޑްމިޓްކޮށްގެން ފަރުވާ ދެމުންދާ ކަމަށެވެ. ނަމަވެސް މިހާރު ހޮސްޕިޓަލުގައި އެޑްމިޓް ކޮށްގެން ފަރުވާ ދޭން ޖެހޭ މީހުންގެ އަދަދު ކޮންމެވެސް މިންވަރަކަށް ދަށް ވެފައިވާ ކަަމަށެވެ.

ރާއްޖެއިން މިހާތަނަށް ކޮވިޑް ޖެހުނު މީހުންގެ ޖުމްލަ އަދަދު ވަނީ 10567 އަރާފައިވާއިރު، 9427 މީހަކު ވަނީ ބަލިން ފަސޭހަވެފައެވެ. އަދި އެކްޓިވް ކޭސްގެ ގޮތުގައި 1099 ކޭސްއެއް ރިޕޯޓް ކޮށްފައިވެއެވެ. މިވަގުތު ވެސް އައިސޮލޭޝަންގައި 432 މިހުން ތިބި ކަމަށް އެޗްޕީއޭ އިން މައުލޫމާތު ދެއެވެ.

ރާއްޖޭގާއި މި ބަލީގައި މީހަކު ނިޔާނުވާތާ ހޯމަ ދުވަހަށް 14 ދުވަސް ވެފައިވާއިރު، ރާއްޖެއިން ކޮވިޑް ޖެހިގެން މަރުވި މީހުންގެ ޖުމްލަ އަދަދަކީ 34 އެވެ.