ރައީސް އިބްރާހިމް މުހައްމަދު ސޯލިހުގެ އެއްބާރުލެއްވުން ނުދެއްވާނަމަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ މަޝްރޫއުތައް މިހާރު ހިނގާ އަވަސް މިނުގައި ހަލުވިކޮށް ނުދާނެ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް އެހެން ވިދާޅުވީ، ރ. ދުވާފަރުގެ މަގުތައް ތަރައްގީ ކުރުމުގެ މަޝްރޫއުގެ ދެވަނަ ފިޔަވަހި އިފްތިތާހު ކޮށްދެއްވާ ވާހަކަ ދައްކަވަމުންނެވެ. އެ މަޝްރޫއުގެ ބިންގާ އަޅުއްވައި ދެއްވަމުން އާޒިމް ވިދާޅުވީ، މި ސަރުކާރުން ކުރިޔަށް ގެންދާ މަޝްރޫއުތައް ފެށިގެންދާއިރުވެސް އަދި ނިމިގެންދާއިރުވެސް އެ މަންޒަރު ފެންނާނެ ކަމަށެވެ.

އާޒިމް އެހެން ވިދާޅުވެފައިވާއިރު، އެމްޓީސީސީން ރާއްޖޭގެ ރަށްރަށުގައި ހިންގާ މަޝްރޫއުތަކުގެ މައުލޫމާތު ގެންދަނީ ޝޯޝަލް މިޑިއާގައި ހިއްސާކުރަމުންނެވެ.

އާޒިމް ވިދާޅުވި ގޮތުގައި މި ސަރުކާރަކީ މަސައްކަތްތައް ބާރަށް ގެންދަން ބޭނުންވާ ސަރުކާރަކަށްވާއިރު، ރައްޔިތުންނާ ގުޅިފައިވާ އެއްވެސް މަސައްކަތެއް ލަސްވުމަކީ ރައީސް އެދިވަޑައިގަންނަވާ ގޮތެއް ނޫނެވެ. އަދި އެމްޓީސީސީގެ މަޝްރޫއުތައް ބާރުމިނު ގައި ކުރިޔަށް ދަނީ ސަރުކާރުގެ އިދާރާތަކުން ދޭންވާ އެއްބާރުލުން ލިބޭތީ ކަމަށް ވިިދާޅުވިއެވެ.

އާޒިމް ވިދާޅުވީ، އެމްޓީސީސީގެ އަމާޒަކީ ރާއްޖޭގެ އެކި ކަންކޮޅުތަކުގައި ހިންގާ ތަރައްގީގެ މަޝްރޫއުތަކަކީ އޭގެ ނަފާ އެތައްް ޒަމާނަކަށް ދެމިގެން ދިޔުން ކަމަށެވެ.

ކޮވިޑް-19 ގެ ހާލަތާއި ގުޅިގެންވެސް އެމްޓީސީސީން ހިންގަމުންދާ މަޝްރޫއުތައް މަޑުޖެހުމެއް ނެތި ދަނީ ކުރިޔަށެވެ. މިހާރުވެސް އެ ކުންފުނިން އަންނަނީ ރާއްޖޭގެ ގިނަ ރަށްތަކެއް ބަނދަރު ހެދުމާއި، މަގު ހެދުމުގެ މަސައްކަތުގެ އިތުރުން ބިން ހިއްކުމުގެ މަޝްރޫއުތައް ކުރިއަށް ގެންދަމުންނެވެ.