ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ޖަލްސާތަކަށްފަހު، މަޖިލީހުގެ މިއަހަރުގެ ތިން ވަނަ ދައުރުގެ ފުރަތަމަ ޖަލްސާ ހޯމަ ދުވަހަށް ތާވަލް ކޮށްފި އެވެ.

މަޖިލީހުގެ މިއަހަރުގެ ދެވަނަ ދައުރުގެ 34 ވަނަ ޖަލްސާ މިދިއަ ސެޕްޓެމްބަރު މަހުގެ 6 ވަނަ ދުވަހު ބޭއްވުމަށްފަހު، މަޖިލީސް ވަނީ ޗުއްޓީއަށް ގޮސްފަ އެވެ.

މަޖިލީހުގެ މިއަަހަރުގެ ތިން ވަނަ ދައުރު ނުވަތަ ފަހު ދައުރުގެ ޖަލްސާތައް ހޯމަ ދުވަހު ފަށާއިރު، ހޯމް ދުވަހުގެ ޖަލްސާގެ އެޖެންޑާގައި ވެސް ގިނަ ކަންތައްތަކެއް އެޖެންޑާ ކޮށްފައި ވެއެވެ.

އެގޮތުން ވަޒީރާ ސުވާލު ކުރުމުގެ އެޖެންޑާގެ ދަށުން، މާވަށު ދާއިރާގެ މެންބަރު މުޙައްމަދު ސަޢީދު، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމްއާ ކުރައްވާ ސުވާލު ހިމެނެ އެވެ. އެ ސުވާލަކީ، ދާދިފަހުން ރާއްޖޭގެ އެކި ސަރަޙައްދުތަކަށް ކުރި ވިއްސާރާގައި އުދަ އަރާ އެންމެ ބޮޑަށް ގެއްލުންވި ރަށްތަކުގެ ތެރޭގައި، ލ. މާވަށް ހިމެނޭ ކަމަށާއި އެހެންކަމުން ލ. މާވަށަށް އުދައަރާ ސަރަޙައްދު ޙިމާޔަތް ކުރުމުގެ މަސައްކަތް ފެށޭނީ ކިހާ ހިސާބެއްގައިތޯ އާއި އަދި މި މަސައްކަތް ނިންމާ ލެވޭނީ ކިހާ މުއްދަތެއްގެ ތެރޭގައިތޯ އަދި އެހެންމެ މާވަށުގެ ބިން ހިއްކުމަށްޓަކައި ކުރަންޖެހޭ ސަރވޭ ނިމި ކުރެހުންތަކަށް ކައުންސިލުގެ ރުހުންވެސް ލިބިފައިވާތީ މާވަށުގެ ބިން ހިއްކުމުގެ މަސައްކަތް ފެށޭނެ ތާރީޚު ސާފު ކުރެއްވުމަށް ކުރައްވާ ސުވާލެވެ.

މީގެއިތުރުން، ރައީސްގެ މޭޒުން ހުށަހަޅާ ކަންކަމުގެ އެޖެންޑާގެ ދަށުން، ހިޔުމަން ރައިޓްސް ކޮމިޝަނަށާއި ނޭޝަނަލް އިންޓެގްރިޓީ ކޮމިޝަނަށް މެމްބަރެއް އައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކޮށް ގޮތެއް ނިންމުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުވުނުވުމުގެ މައްސަލަ ހިމެނެއެވެ. އަދި ދިވެހިރާއްޖެއިން އ.ދ އަށް ކަނޑައަޅާފައިވާ ދާއިމީ މިޝަންގެ ޖެނީވާ އޮފީހުގެ ޕަރމަނަންޓް ރެޕްރެޒެންޓެޓިވް، ގ. ފަރުކަނި، ޑޮކްޓަރ ޢާޞިމް އަޙްމަދު، ވަރލްޑް ޓްރޭޑް އޯގަނައިޒޭޝަނަށް ދިވެހިރާއްޖެއިން ކަނޑައަޅާ މަންދޫބުގެ މަޤާމަށް ޢައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކޮށް ގޮތެއް ނިންމުމަށް އެ މައްސަލައާގުޅޭ ދާއިމީ ކޮމިޓީއަށް ފޮނުވުން ވެސް ހިމެނެއެވެ.

ހޯމަ ދުވަހުގެ ޖަލްސާގެ އެޖެންޑާގައި އިބްތިދާއީ ބަހުސް ކުރުމަށް އެޖެންޑާ ކޮށްފައިވަނީ، ސަރުކާރުގެ ފަރާތުން، ފޮނަދޫ ދާއިރާގެ މެންބަރު މޫސާ ސިރާޖު ހުށަހަޅުއްވާފައިވާ، ދިވެހިރާއްޖޭގެ ޤާނޫނުލްޢުޤޫބާތަށް އިޞްލާޙު ގެނައުމުގެ ބިލާއި ސަރުކާރުގެ ފަރާތުން، ފުނަދޫ ދާއިރާގެ މެންބަރު މުޙައްމަދު ޝާހިދު ހުށަހަޅުއްވާފައިވާ، އެންޓި- ކޮރަޕްޝަން ކޮމިޝަނުގެ ޤާނޫނަށް އިޞްލާޙު ގެނައުމުގެ ބިލުގެ އިތުރުން ސަރުކާރުގެ ފަރާތުން، ވިލުފުށި ދާއިރާގެ މެންބަރު ޙަސަން ޢަފީފު ހުށަހަޅުއްވާފައިވާ، ބިނާވެށި ޕްލޭންކުރުމާއި ހިންގުމުގެ ބިލެވެ.

ރައްޔިތުންގެ މަޖިލީހުގެ އަހަރުގެ ފަހު ދައުރުގައި މައިގަނޑު ގޮތެއްގައި އެންމެ މުހިއްމު ކަމެއްގެ ގޮތުގައި ނިންމާނީ، އަންނަ 2021 ވަނަ އަހަރަށް ލަފާކުރާ ދައުލަތުގެ ބަޖެޓެވެ. މަޖިލީހުގެ މި ދައުރުގެ ޖަލްސާތައް ނިންމުމުގެ ކުރިން އަންނަ އަހަރަށް ފަލާކުރާ ދައުލަތުގެ ބަޖެޓް މަޖިލީހުގެ ބަޖެޓް ކޮމެޓީން ދިރާސާ ކުރުމާއި މަޖިލީހުން ބަޖެޓް ފާސްކޮށް ނިންމަން ޖެހެއެވެ.

މަޖިލީހަށް ބަޖެޓް ހުށަހަޅުއްވާނީ ސަރުކާރުގެ ފަރާތުން ފިނޭންސް މިނިސްޓަރު އެވެ.