ކުޑަކުއްޖަކަށް ޖިންސީ ގުނަވަން ދެއްކި މީހެއްގެ މައްޗަށް 3 އަހަރުގެ ޖަލު ހުކުމެއް ހައިކޯޓުން އިއްވައިފި އެވެ.

މި މައްސަލައަކީ، 14 ޑިސެމްބަރު 2016 ވަނަ ދުވަހު އައްޑުސިޓީ މަރަދޫފޭދޫ މެޖިސްޓްރޭޓް ކޯޓަށް ހުށަހެޅުނު މައްސަލައެކެވެ. މި މައްސަލަ ސާބިތުނުވާ ކަމަށް އެ ކޯޓުން ނިންމާފައިވަނީ 27 އޭޕްރީލް 2017 ވަނަ ދުވަހު އެވެ. ދައުލަތުގެ ފަރާތުން މި މިމައްސަލަ ހައިކޯޓުގައި އިސްތިއުނާފު ކުރުމުން ހައިކޯޓުން ވަނީ އެމީހާގެ މައްޗަށް ތިން އަހަރުގެ ޖަލު ހުކުމެއް އިއްވާފައެވެ.

ކުޑަކުއްޖަކަށް ޖިންސީ ގުނަވަނެއް ދެއްކުމުގެ ކުށުގެ ދައުވާއާ ގުޅިގެން ހައިކޯޓުން މި ހުކުމް އިއްވާފައިވަނީ ގދ. ނަޑެއްލާ، ރަބީއީމަންޒިލް، މުހައްމަދު އަޖްނާޒުގެ މައްޗަށެވެ.

އަޖްނާޒުގެ މައްޗަށް ކުށް ސާބިތުވާ ކަމަށް ހައިކޯޓުން ނިންމާފައިވާ ހުކުމުގައި ބުނެފައި ވަނީ، އަޖުނާޒުގެ މައްޗަށް މީގެ ކުރިންވެސް މިފަދަ މައްސަލަތައް ސާބިތުވެފައިވާ ކަމަށާއި، އޭނާގެ ފަރާތުން މިފަދަ ކަންކަން ތަކުރާރު ވަމުން އަންނަނީ ޖިންސީ މިފަދަ އަމަލުތަކުން ދުރުހެލި ކުރުމަށްޓަކައި ބޭނުންވާ ރިހިބިލިޓޭޝަން ފަރުވާ ނުދެވޭތީ ކަމަށެވެ.

ހައިކޯޓުން ބުނެފައިވަނީ އަނިޔާ ލިބުނު ކުޑަ ކުއްޖާ ކަންވީގޮތް ބަޔާންކޮށް، ދީފައިވާ ހެކި ބަހަކީ އާދަޔާ ހިލާފަށް ގަބޫލު ކުރެވޭ ހެކި ބަހެއް ކަމަށް ގަބޫލު ކުރެވޭ ކަމަށެވެ. އަދި މިއީ އަޖުނާޒާ ބެހޭގޮތުން ހަގީގަތެއް ނެތް ވާހަކަތަކެއް ހަދައިގެން ނުވަތަ އަލަށް އުފައްދައިގެން ކިޔައިދިން ކިޔައި ދިނުމެއް ކަމަށް ބެލެވޭނެ އެއްވެސް ސަބަބެއް ނެތްކަމަށް ވެސް ހައިކޯޓުގެ ހުކުމުގައި ބުނެފައި ވެއެވެ.

ހައިކޯޓުގެ ހުކުމުގައި ވަނީ، އައްޑުއަތޮޅު މަރަދޫފޭދޫ މެޖިސްޓްރޭޓް ކޯޓުން އަޖްނާޒުގެ މަށްޗަށް ކުށް ސާބިތުު ނުވާ ކަމަށް ނިންމާފައިވާ ހުކުމް ބާޠިލުކޮށް، ކުޑަކުއްޖަކަށް ޖިންސީ ގުނަވަނެއް ދެއްކުމުގެ ކުށުގެ ދަޢުވާ މުޙައްމަދު އަޖްނާޒުގެ މައްޗަށް ސާބިތުވާކަމަށް ކަނޑައަޅައި، ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުސޫލުތަކަކަށް ޢަމަލު ކުރުމުގެ ޤާނޫނުގެ 33 ވަނަ މާއްދާގެ (ހ) އާ ޙަވާލާދީ، އެމާއްދާގެ (ށ)ގެ ދަށުން މުޙައްމަދު އަޖްނާޒު 3 އަހަރުދުވަހުގެ މުއްދަތަށް ޖަލަށްލުމަށް، މި މައްސަލަ ދިވެހިރާއްޖޭގެ ހައިކޯޓުގައި ބެލި ފަނޑިޔާރުންގެ އިއްތިފާޤުން ޙުކުމްކޮށް، މި މައްސަލަ ނިންމާ ކަމަށެެވެ.