މާލޭ ޖަލުގައި ހުންނެވި ކުރީގެ ނައިބު ރައީސް އަހުމަދު އަދީބު ކްރިމިނަލް ކޯޓުގެ ހުއްދައާއެކު ގެޔަށް ބަދަލުކޮށްފިއެވެ.
މޯލްޑިވްސް ކަރެކްޝަނަލް ސާވިސްގެ މީޑިއާ އޮފިސަރ އާމިނަތު ޔުސްރީން ވިދާޅުވީ އަދީބު ގެޔަށް ބަދަލުކޮށްފައިވަނީ ބަލި ހާލަތުގެ ސަބަބުން ކޯޓުގެ ހުއްދައަކާއެކު ކަމަށެވެ. ނަމަވެސް އަދީބު ގެޔަށް ބަދަލުކޮށްފައިވަނީ ކޮން ދުވަހަކު ކަމެއް ކަރެކްޝަނުން ހާމައެއް ނުކުރެއެވެ.
އަދީބުގެ ބަލި ހާލަތާ ބެހޭގޮތުން ސުވާލު ކުރުމުން ވެސް އެކަމުގެ ތަފްސީލެއް ކަރެކްޝަނުން ހާމަކޮށްފައެއް ނުވެއެވެ. ނަމަވެސް އަދީބު ޑޮކްޓަރަށް ދެއްކުމުގެ ކަންކަން އޮންނަ އުސޫލުގެ ތެރެއިން ކަރެކްޝަންގެ ބެލުމުގެ ދަށުން ކުރިއަށްދާނެ ކަމަށް ކަރެކްޝަނަލް ސާވިސް އިން ބުނެއެވެ.
އަދީބުގެ ސިއްހީ ހާލަތު ހުރި ގޮތުން ގެޔަށް ބަދަލުކުރިއިރު ކްރިމިނަލް ކޯޓުން އަންނަނީ އޭނާގެ މައްޗަށް 7 ދައުވާއެއް އުފުލާ ޝަރީއަތް ހިންގަމުންނެވެ. އެގޮތުން މިދިޔަ ސެޕްޓެމްބަރު މަހުގެ 30 ވަނަ ދުވަހު ބޭއްވި ޝަރީއަތުގެ މަޖިލީހުން ވަނީ އަދީބުގެ މައްޗަށް ދައުލަތުން އުފުލި 7 ދައުވާއާ ގުޅިގެން ޕްރޮސެކިއުޓަރ ޖެނެރަލް (ޕީޖީ)އާއި އަދީބުއާ ދެމެދު ވެފައިވާ އިއުތިރާފްގެ އެއްބަސްވުން ބަލައިގަނެ، އަވަސް ނިޔާގެ ޝަރީއަތެއް މި ހަފްތާގައި ބޭއްވުމަށް ނިންމާފައެވެ.
އަދީބުގެ މައްޗަށް ދައުލަތުން އުފުލާފައިވާ 7 ދައުވާއަކީ، ޚިޔާނާތްތެރިވުމުގައި ބައިވެރިވެފައިވާ ކަމަށް ބުނާ ދެ ދައުވާއަކާއި، މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ތުހުމަތުގައި އުފުލާފައިވާ ދެ ދައުވާއަކާއި، މަނީ ލޯންޑަރ ކުރުމުގެ ކުށުގެ ދެ ދައުވާ އެވެ. އަދި ރަސްމީ ހައިސިއްޔަތު ނަހަމަ ގޮތުގައި ބޭނުންކުރިކަމުގެ ތުހުމަތުގައި އުފުލާފައިވާ ދައުވާ އެއްވެސް ހިމެނެއެވެ.
މި 7 ދައުވާ އިއްވުމާއެކު އަދީބު ވިދާޅުވީ، އެމްއެމްޕީއާރުސީގެ ހިޔާނާތުގެ ފައިސާ އިން ވަރަށް ގިނަ ފަރާތްތަކަށް މަންފާ ކޮށްފައިވާނެ ކަމަށެވެ. އަދި އޭނާގެ އެއްބާރުލުން ދައުލަތަށް ނުލިބި، އެފައިސާ ލިބުނު މީހުންނާއި ފައިސާ ހޯދުމަށް ދައުލަތުން ކުރާ މަސައްކަތްތައް ވެސް އެންމެ އެދެވޭ ގޮތަކަށް ކުރިއަށް ނުދާނެ ކަމަށް ވަނީ ބުނެފައެވެ. އެހެންކަމުން އޭނާ ވެސް ބޭނުންވަނީ، އެމްއެމްޕީއާރުސީގެ ހިޔާނާތުގެ ތެރެއިން ދައުލަތަށް ގެއްލުނު ފައިސާ އަނބުރާ ހޯދާދިނުން ކަމަށާއި އެކަމަށް ދައުލަތަށް ފުރިހަމައަށް އެއްބާރުލުން ދެއްވާނެ ކަމަށް ވިދާޅުވެފައެވެ.
