މާލެއަށް ބަރޯސާވުން ކުޑަކޮށް، އަތޮޅުތެރޭގެ ސިއްހީ ނިޒާމް ހަރުދަނާކުރުމަށް ސަރުކާރުން ކުރަމުން އަންނަ މަސައްކަތުގެ ދަށުން ލ. ގަމު ރީޖަނަލް ހޮސްޕިޓަލްގައި ސީޓީ ސްކޭން މެޝިނެއް ބެހައްޓުމުގެ މަސައްކަތް ފަށައިފި އެވެ.
އައު ސަރުކާރުގެ އަމާޒަކީ، އަތޮޅުތެރޭގެ ރައްޔިތުންނަށް، އެ ސަރަހައްދަކުން ފެންވަރު ރަނގަޅު ސިއްހީ ހިދުމަތެއް ލިބޭނެގޮތް މަގުފަހިކޮށްދިނުމެވެ. އެ އަމާޒު ހާސިލްކުރުމަށް ސަރުކާރުން ސިއްހީ ދާއިރާއަށް ގިނަ ހަރަދުތަކެއް ކުރަމުންގެންދާއިރު، ލ. ގަމުގައި ހުންނަ ރީޖަނަލް ހޮސްޕިޓަލުގެ ފެންވަރު ރަނގަޅުކުމަށް ގިނަ މަސައްކަތްތަކެއް އަންނަނީ ކުރަމުންނެވެ.
ރައްޔިތުންގެ މަޖިލީހުގެ ގަމު ދާއިރާގެ މެމްބަރު މުހައްމަދު ވިސާމް ވިދާޅުވީ ލާމަރުކަޒީ ފަލްސަފާގެ ދަށުން ގަމު ރީޖަނަލް ހޮސްޕިޓަލު ތަރައްގީ ކުރާ ވާހަކަ ދެއްކުމުން އެކަން ނުވާނެ ކަމަށް ބައެއް ފަރާތްތަކުން ބުނި ކަމަށެވެ. ނަމަވެސް ހުވަފެންތަކުގައި ކުލަ ޖެހިގެން ދާ މަންޒަރު މިއަދު ރައްޔިތުންނަށް ފެންނަމުންދާކަމަށް ވިސާމް ވިދާޅުވި އެވެ.
ވިސާމް ވިދާޅުވި ގޮތުގައި ސީޓީ ސްކޭން މެޝިން ބެހެއްޓުމުގެ މަސައްކަތް ބާރަށް ކުރިއަށްދާއިރު، އަންނަ މަހުގެ ތެރޭގައި މެޝިން އިންސްޓޯލްކޮށް ނިންމާލެވޭނެ އެވެ.
ކުރިއަށް އޮތްތަނުގައި ގަމުން ސީޓީ ސްކޭން ހެދޭނެ. ގަބޫލުކުރިޔަސް ނުކުރިޔަސް ރައީސް ސޯލިހުގެ ސަރުކާރުން ގަމު ރީޖަނަލް ހޮސްޕިޓަލް ޓާރޝަރީ ފެންވަރަށް ތަރައްގީ ކުރާނެ، ޝުކުރިއްޔާ ރައީސް ސޯލިހު. މާލެ ނޫން ގޮތަކީ ހައްދުންމަތީ ގަން.ގަމު ދާއިރާގެ މެމްބަރު މުހައްމަދު ވިސާމް
ވިސާމް އިތުރަށް ވިދާޅުވީ މަދު ދުވަސްކޮޅެއްގެ ތެރޭގައި ޓާރޝިއަރީ ހޮސްޕިޓަލްގެ އައު އިމާރާތް އަޅާނެ ކުންފުންޏެއް ހޯދަން އިއުލާނުކުރާނެ ކަމަށެވެ. އަދި އެ އިމާރާތާއެކު އެމްއާރްއައި ޚިދުމަތްވެސް ލިބިގެންދާނެ ކަމަށެވެ.
އަދި އއ. އަތޮޅުންވެސް ލ. ގަމު ރީޖަނަލް ހޮސްޕިޓަލްއަށް ޑޮކްޓަރަށް ދެއްކުމަށް މީހުން އަންނަކަން ފާހަގަކުރަމުން ވިސާމް ވިދާޅުވީ ޑޮކްޓަރުންގެ ދަތިކަން އެބަހުރި ކަމަށެވެ. އެހެން ނަމަވެސް މިހާރު ހޮސްޕިޓަލްގައި އަލަށް އިމާރާތް ކުރާ 6 ރޫމް އަދި އޯޕީޑީ އޭރިއާގެ 90 އިންސައްތަ މަސައްކަތް ނިމި އެތަން ބޭނުން ކުރަން ފެށުމާއި އެކު ބަލިތަކަށް ޚާއްސަ ފަރުވާދޭ ޑޮކްޓަރުންގެ ދިމާވެފައިވާ ދަތިކަން ހައްލުވެގެންދާނެ ކަމަށް އުއްމީދު ކުރައްވާ ކަމަށް ވިސާމް ވިދާޅުވި އެވެ.
ލ. ގަމު ރީޖަނަލް ހޮސްޕިޓަލް ސަރުކާރުން ތަރައްޤީކުރަނީ މ. ފ. ދ. ތ. އަދި ލ. ގެ ރައްޔިތުންނަށް ފަސޭހައިން ސިއްހީ ފަރުވާ ލިބޭނެ ގޮތަށެވެ. އަދި ސަރުކާރުގެ އަމާޒަކީ މި އަތޮޅުތަށް ރަނގަޅު ފެރީ ނިޒާމަކުން ގުޅާލުމެވެ.
