ދައުލަތުގެ ބެލުމުގެ ދަށުގައި ދޮށީ އުމުރުގެ މީހުން ތިބޭ މަރުކަޒުގެ ޙާލަތާއި ވަސީލަތުގެ ގިނަ ދަތިތަކެއް ހުރިކަން ފާހަގަކުރެވޭ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ބުނެފި އެވެ.
އެކޮމިޝަނުން ނެރުނު ބަޔާނުގައި ބުނެފައިވަނީ ދޮށީ އުމުރުގެ މީހުން ތިބޭ މަރުކަޒުގައި ބަލި މީހުނަށް ޚިދުމަތް ދޭން ތިބި ކެއާ ވޯކަރުން މަދުވުމުގެ ސަބަބުން އެ މަރުކަޒުގައި ތިބި ދޮށީ އުމުރުގެ މީހުންނަށް ބޭނުންވާ ޚާއްސަ އެހީތެރިކަން ފޯރުކޮށްދިނުމުގައި ގިނަ ގޮންޖެހުންތަކެއް ހުރިކަން ފާހަގަކުރެވޭ ކަމަށެވެ.
މިކަންކަން ވީއެންމެ އަވަސް މުއްދަތެއްގައި ހައްލު ކޮށްދިނުމަށް ކަމާ ގުޅުންހުރި ސަރުކާރުގެ އިދާރާތަކަށް ހުށަހަޅާފައިވީ ނަމަވެސް މި ހުށަހެޅުންތައް ތަންފީޒުވެފައި ނުވާކަމީ ކޮމިޝަންގެ ނުހަނު ބޮޑު ކަންބޮޑުވުމެއް ކަމަށް އެޗްއާރްސީއެމްއިން ބުންޏެވެ.
ނަމަވެސް ކ. ގުރައިދޫގައި ހުންނަ ދޮށީ އުމުރުގެ މީހުން ބަލަހައްޓާ މަރުކަޒަށް ސާފު ފެން ލިބުމުގައި ހުރި ގޮންޖެހުންތައް ހައްލު ކޮށްދިނުމަށް ކޮމިޝަންގެ ނޭޝަނަލް ޕްރިވެންޓިވް މެކޭނިޒަމްއިން ކަމާ ގުޅުންހުރި އިދާރާތަކާއެކު ކުރެވުނު މަޝްވަރާތަކާއެކު ފެން ޕްލާންޓެއް ގާއިމުކޮށްދީ ފެން ލިބުމުގައި ހުރި ގޮންޖެހުންތައް ހައްލު ކޮށްދީފައިވާކަން އެކޮމިޝަނުން ވަނީ ފާހަގަކޮށްފަ އެވެ.
މިބަޔާނުގައި އިތުރަށް ބުނެފައިވަނީ އެކަނިވެރިކަމާއި، އެހެން މީހުންގެ ފަރާތުން ލިބޭ އަޅާލުމާއި އެކުގައި ހޭދަކުރެވޭ ވަގުތު މަޑުމަޑުން މަދުވަމުން، ހިނދެމުން ނެތިގެންދާކަމުގެ ފިކުރާއި އިޙްސާސްތައް ކުރެވޭ މިންވަރު، މިފަދަ ބަލިމަޑުކަމެއްގެ ހާލަތުގައި، ދޮށީ އުމުރުގެ ފަރާތްތަކަށް އެތައް ގުނައެއް އިތުރުވެގެން ދާނެކަމީ، ހަމަ ކޮންމެ މީހަކުވެސް ވިސްނަން ޖެހޭ ކަމެކެވެ.
ދޮށީއުމުރުގެ މީހުންގެ ޙައްޤުތަކާ ގުޅޭގޮތުން ހިއުމަން ރައިޓްސް ކޮމިޝަނަށް ފާހަގަކުރެވިފައިވާ މައްސަލަތަކަށް ބަލާއިރު، އާއިލާގެ ފަރާތުން ލިބެންޖެހޭ އަޅާލުމާއި އޯގާތެރިކަން ނުލިބުމާއި، ދޮށީ އުމުރުގެ މީހުންނާ މެދު އިހުމާލުވުމާއި، މުޖުތަމަޢުގައި ދޮށީ އުމުރުގެ މީހުންނަށް އިޙްތިރާމާއި ރައްކާތެރިކަން ނުލިބުމުގެ މައްސަލަތައް ހިމެނެއެވެ.
އެހެންކަމުން، ޢާއިލާއާއި މުޖްތަމަޢުގެ ފަރާތުން ދޮށީ އުމުރުގެ މީހުންނަށްދޭ ލޯތްބާއި އަޅާލުން އިތުރުކޮށް، އެފަރާތްތަކަށް ދިމާވާ ދަތިތައް ޙައްލުކުމަށް އިހުނަށްވުރެ ބޮޑަށް މަސައްކަތް ކުރުމަށް އެޗްއާރްސީއެމްއިން ވަނީ އިލްތިމާސްކޮށްފަ އެވެ.
ކޮވިޑް19 ގެ ނުރައްކާ އެންމެ ބޮޑު އެއް ބަޔަކީ އުމުރުން ދުވަސްވީ މީހުން ކަމަށްވާއިރު، އެފަރާތްތަކުގެ ރައްކާތެރި ކަމަށް ޚާއްސަ އަހައްމިޔަތުކަމެއްދީ، ކަމާ ގުޅުންހުރި އިދާރާތަކުން ދެއްވަމުން ގެންދަވާ އިރުޝާދުތަކަށް ހުރިހާ ފަރާތްތަކުން ވެސް އަމަލުކުރުމަށް ވަނީ ނަސޭހަތްތެރި ވެފައެވެ.
މީގެ އިތުރުން، މުޖުތަމަޢުގެ އެކިކަންކަމުގައި ދޮށީ އުމުރުގެ މީހުންގެ ބައިވެރިވުން އިތުރުކޮށް، އެފަރާތްތަކުގެ ނަފްސާނީ އަދި ޖިސްމާނީ ދުޅަހެޔޮކަމަށް ސަމާލުކަންދީގެން ސިޔާސަތުތައް ބައްޓަން ކުރުމުގެ މުހިންމުކަން ވެސް އެޗްއާރްސީއެމްއިން ފާހަގަކުރެއެވެ.
އަދި ދައުލަތުގެ ބެލުމުގެ ދަށުގައި ތިބި އުމުރުން ދުވަސްވީ މީހުންނަށް ފޯރުކޮށްދޭ ޚިދުމަތްތައް މިހާރަށްވުރެ ހަރުދަނާކޮށް، އެމަރުކަޒުގެ ވަސީލަތްތައް ފުޅާކުރުމަށް ހިއުމަން ރައިޓްސް ކޮމިޝަނުން ސަރުކާރަށް ހުށަހަޅާފައިވާ ހުށަހެޅުންތައް ތަންފީޒު ކުރުމަށް ވަނީ އެދިފައެވެ.
ދޮށީ އުމުރުގެ މީހުން ޤައުމަށް ކޮށްދެއްވާފައިވާ ޚިދުމަތްތަކުގެ އަގުވަޒަންކޮށް، އެފަރާތްތަކަށް ލިބިދޭން ޖެހޭ ޙައްޤުތަކާ އަދި ކުރިމަތިވަމުންދާ ގޮންޖެހުންތަކާއި މެދު މުޖުތަމަޢު ހޭލުންތެރިކުރުމަށް މަދަނީ ޖަމުޢިއްޔާތަކާއި މީޑިއާތަކުން ކުރަމުންދާ މަސައްކަތް ވެސް މިހާރަށް ވުރެ އިތުރު ކުރުމަށް އެޗްއާރްސީއެމްއިން ވަނީ އިލްތިމާސްކޮށްފަ އެވެ.
