ކޮވިޑް-19 އިން ލިބެމުންދާ ގެއްލުންތަކުން އަރައިގަތުމަށް އެމަރޖެންސީ ރެސްޕޯންސް ސަޕޯޓްގެ ގޮތުގައި ޖަޕާނުގެ ސަރުކާރުން ރާއްޖެއަށް 731 މިލިއަން ރުފިޔާގެ ލޯނެއް ދީފި އެވެ.

މި ލޯނުގެ އެހީ ދިނުމަށް ފޮރިން މިނިސްޓްރީގައި ހޯމަ ދުވަހު ބޭއްވި ރަސްމިއްޔާތުގައި ދިވެހި ސަރުކާރުގެ ފަރާތުން ސޮއި ކުރެއްވީ ފޮރިން މިނިސްޓަރު އަބްދުﷲ ޝާހިދެވެ. ޖަޕާނު ފަރާތުން ސޮއި ކުރެއްވީ ރާއްޖެއަށް ކަނޑައަޅާފައި ހުންނަވާ ސަފީރު ކެއިކޯ ޔަނާއި އެވެ.

ލޯނުގެ އެހީގައި ސޮއިކުރުމަށްފަހު ވާހަކަދައްކަވަމުން ފޮރިން މިނިސްޓަރ އަބްދުﷲ ޝާހިދު ވިދާޅުވީ މި ފައިސާ އަކީ ރާއްޖޭގެ ސަރުކާރުން ރައްޔިތުންނަށް ދެމުންގެންދާ ޚިދުމަތްތަކަށް ހުއްޓުމެއް ނައިސް ކުރިޔަށް ގެންދިޔުމަށްޓަކައި ޖަޕާން ސަރުކާރުން ދެއްވި ވަރަށް ދީލަތި އެހީއެއް ކަމަށެވެ. 5 ބިލިއަން ޖަޕަނީޒް ޔެން ނުވަތަ 47.5 މިލިއަން އެމެރިކާ ޑޮލަރު ދިވެހި ފައިސާ އިން ނަމަ 731،975،000 މިލިއަން ރުފިޔާ ދީލަތި އެހީއެއްގެ ގޮތުގައި ފޮރިން މިނިސްޓަރ ސިފަ ކުރައްވާ ގޮތް ވަނީ ތަފްސީލު ކޮށްދެއްވައިފިއެވެ.

މިނިސްޓަރ ވިދާޅުވީ ޖަޕާނަކީ ޒަމާނުއްސުރެވެސް ރާއްޖޭގެ ތަރައްގީގެ އެކި ކަންކަމަށް އެހީތެރިކަން ފޯރުކޮށްދެމުންދާ ގައުމެއް ކަމަށެވެ. އަދި ރާއްޖޭގެ މީހުން ބިނާ ކުރުމުގައި ވެސް ޖަޕާނު ސަރުކާރުން އެހީތެރިކަން ފޯރުކޮށްދެމުންދާކަން މިނިސްޓަރ ފާހަގަކުރެއްވި އެވެ.

އަދި މި ފެންނަމުންދަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ދުނިޔޭގެ ގައުމުތައް ތަފާތު ކުރުމެއްނެތި ބާއްވަމުންދާ ގުޅުމުގެ ހެޔޮ ނަތީޖާ ކަމަށް މިނިސްޓަރ ވިދާޅުވި އެވެ. ރާއްޖެ އަކީ ރަހުމަތްތެރިން އިހުތިޔާރު ކުރާ ގައުމެއް ނޫން ކަމަށާއި ރާއްޖެއާ ގުޅުން ބާއްވަމުން އަންނަ ގައުމުތަކާއެކީ ގުޅުން ބާއްވަމުންދާ ގައުމެއް ކަމަށް މިނިސްޓަރ ވިދާޅުވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ކެއިކޯ ޔަނާއި ވިދާޅުވީ ކޮވިޑް-19ގެ ސަބަބުން އެކިގޮތްގޮތުން ލިބެމުންދާ ގެއްލުންތައް އަންނަނީ ފެންނަމުން ކަމަށެވެ. މީގެކުރިން ޖަޕާނު ސަރުކާރުން ވާނީ ކޮވިޑް-19 އާ ގުޅިގެން ލިބެމުންދާ ގެއްލުންތަކުން އަރައިގަތުމަށް 7.5 މިލިއަން އެމެރިކާ ޑޮލަރު ދިނުމަށް އެއްބަސްވެފައި ކަމަށް ކެއިކޯ ޔަނާއީ ވިދާޅުވި އެވެ.

އެހެންނަމަވެސް ކޮވިޑް-19 ގެ މި ޕެންޑަމިކް ދިގުލައިގެން ދިޔުމާއެކު އިގްތިޞާދީ ގޮތުންނާއި އިޖުތިމާއީ ގޮތުން ލިބެމުންދާ ގެއްލުންތައް ބޮޑުކަމުން އިތުރު ފައިސާ ހޯދުމަށް ދިވެހި ސަރުކާރާއި ޖަޕާނާއި ގުޅިގެން ކުރިޔަށްގެންދިޔަ މަސައްކަތާއެކު މި ފައިސާ ހަމަޖެހިގެން ދިޔައީ ކަމަށް ސަފީރު ވިދާޅުވި އެވެ.

ސަފީރު ވިދާޅުވީ ކޮވިޑާއި ގުޅިގެން ގައުމުތަކަށް ލިބެމުން އަންނަ ގެއްލުންތަކުން އަރައިގަތުމަށް ޖަޕާނު ސަރުކާރުން އެހެން ގައުމުތަކަށް ވެސް އެހީތެރިކަން ފޯރުކޮށްދެމުންދާ ކަމަށެވެ. އަދި ކުރިޔަށް އޮތްތަނުގައިވެސް ޖަޕާނު ސަރުކާރުން ރާއްޖޭގެ އިގްތިޞާދު ނަގާކޮޅަށް ޖެހުމަށް އެހީތެރިކަން ފޯރުކޮށްދެމުންދާނެ ކަމަށް ސަފީރު ވިދާޅުވިއެވެ.