އައްޑޫ ސިޓީގައި ކޮވިޑް-19 ފެތުރިފައިވާ މިންވަރު ދެނެގަތުމުގެ ގޮތުން ސަވައިލެންސް ސާމްޕަލް ނެގުމަށް ހަމަޖެހިފައިވާ ކަމަށް އައްޑޫ އިކުއެޓޯރިއަލް ހޮސްޕިޓަލުން ބުނެފިއެވެ.
މިކަން ހާމަކޮށް އެ ހޮސްޕިޓަލުން އާންމުކޮށްފައިވާ އިއުލާނެއްގައި ބުނެފައިވަނީ މިމަހުގެ 26 އަދި 27 ގައި އައްޑޫގެ އެކި ސަރަހައްދުތަކުގައި ސަވައިލެންސް ސާމްޕަލްތައް ނެގުމަށް ހަމަޖެހިފައިވާ ކަމަށެވެ. އަދި މިކަމަށް އައްޑޫ ސިޓީގެ ހުރިހާ ރައްޔިތުން ވެސް އެއްބާރުލުން ދިނުމަށް ވަނީ އެދިފައެވެ.
އައްޑޫ ސިޓީން މިހާތަނަށް 14 މީހަކު ކޮވިޑް-19 އަށް ވަނީ ޕޮޒިޓިވްވެފައެވެ.
ރާއްޖެއިން މިހާތަނަށް އައިއިރު 10014 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. މިހާރު ރާއްޖޭގެ 22 ރަށެއްގައި އެކްޓިވް ކޭސްތައް ފެނިފައިވާ ކަމަށް ހެލްތު ޕްރޮޓެކްޝަން އެޖެންސީން ވަނީ ބުނެފައެވެ.
