ފެނުގެ ރައްކާތެރިކަން ކަށަވަރު ކުރުމަށް މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)ން ކުރިއަށް ގެންދާ ޕްރޮޖެކްޓްގެ މަސައްކަތް ހުއްޓުމެއް ނެތި ކުރިއަށްދާ ކަމަށާއި، މަޑު ޖެހުމެއް އައީ ކޮވިޑް-19އާ ގުޅިގެން ކަމަށް އެކުންފުނިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާހު ވިދާޅުވީ މާލެސިޓީގެ ފެނުގެ ރިޒާވު ހުންނާނީ އެންމެ ދުވަހަކަށް ވާވަރަށް ކަމަށާއި، ހާދިސާއެއް ހިނގާފިނަމަ ފެނުގެ ޝޯޓޭޖެއް އައުމަކީ އެކަށީގެންވާ ކަމެއް ކަމަށެވެ.
ޝާހު ވިދާޅުވީ ފެނުގެ ރިޒާވް އިތުރު ކުރުމުގެ ގޮތުން މާލޭގައި ތާންގިތައް ބެހެއްޓުމުގެ މަސައްކަތް ކުރިއަށްދާ ކަމަށެވެ. ކޮވިޑް-19ގެ މިހާލަތު ކުރިމަތިނުވި ނަމަވެސް ސެޕްޓެންބަރު މަހު މިޕްރޮޖެކްޓްގެ އަމަލީ މަސައްކަތުގެ ބޮޑުބައެއް ކުރެވިފައިވާނެ ކަމަށެ އެވެ.
މީގެ އިތުރުން ޝާހު ވިދާޅުވީ އެސްޓީއޯގެ ކުރީގެ ރެޑީ މިކްސް ކޮށީގައި ކުރަމުން އައި މަސައްކަތް ހުއްޓުވުމަށްފަހު މިޕްރޮޖެކްޓްގެ މަސައްކަތައް ކުރިއަށް ގެންދިއުމަށް އެމްޑަބްލިއުއެސްސީއާ ހަވާލުކޮށްފައިވާ ކަަމަށެވެ.
ޝާހު ވިދާޅުވީ މިހާރު މަސައްކަތް ކުރަމުންދަނީ ޕެންޑަމިކްގެ ހާލަތު ރަނގަޅުވުމުން އަދި ޓޭންކްތައް ލިބެންވާއިރަށް ކުރަންޖެހޭ މަސައްކަތްތައް ނިންމުމަށް ކަމަށެވެ. އެގޮތުން އެކޮށި ސާފުކޮށްފައި ކޮށީގައި ގާއިމްކޮށްފައިވާ ކޮންކްރީޓް ފައުންޑޭޝަންތައް ނަގާ ޑިޒައިންގެ މަސައްކަތް ނިންމާނެ ކަމަށް ޝާހު ވިދާޅުވިއެވެ. އަދި ޑިޒައިންގެ މަސައްކަތް ނިމުމާއެކު ޓޭންކުތައް ލިބޭނެ ކަމަށެވެ.
އެނގިވަޑައިގަންވާނެ ފަދައިން މިދިމާވި ލޮކްޑައުންއާއެކު މުހިންމު ޕްރޮޖެކްޓްތަކެއް އެބަހުރި ލަސްތަކެއް ވެފައި. މިފްރޮޖެކްޓަކީ އެމެރިކާގެ ކުންފުންޏެއް ކަމަށްވާ ޓޭން ކަނެކްޝަނާއި އެޑްވާންސް ވެސް ދައްކާ، މިތަނުގައި ތޭރަހާސް ސީބީއެމްގެ ދެ ޓޭންކް ބަހައްޓައިގެން މާލެއަށް ފެނުގެ އިތުރު ރިޒާވެއް ގެނައުމަށްޓަކައި ހިންގާ ޕްރޮޖެކްޓެއް. ސީދާ ރައީސުލްޖުމްހޫރިއްޔާއަށް ދަންނަވާގެން އެމްޑަބްލިއުއެސްސީން މާލޭގައި ދިރިއުޅުއްވާ ބޭފުޅުންނަށް ފެނުގެ ރައްކާތެރިކަމާއި، ފެނުގެ ޝޯޓެއްވިޔަ ނުދީ ކުރިއަށް ގެންދާ ޕްރޮޖެކްޓެއް. އެސްޓީއޯގެ ކުރީގެ ރެޑީ މިކްސް ކޮށީގައި ކުރަމުން އައި މަސައްކަތް ހުސްކޮށްލާފަ އެމްޑަބްލިއުއެސްސީއާ އެއޮތީ ހަވާލުކޮށްލާފަ. ނަމަވެސް އެކޮށީގެ އަޑީގަ ރެޑީމިކްސްގެ މަސައްކަތްތައް ކުރިއަށް ގެންދިއުމަށްޓަކައި ވަރަށް ބޮޑެތި ކޮންކްރީޓް ބުޑުތަކާއި ފައުންޑޭޝަންތައް ވަނީ އަޅާފަ.މެނޭޖިންގ ޑިރެކްޓަރ ހަސަން ޝާހު
މިޕްރޮޖެކްޓުގެ މަސައްކަތް ނިމުމާއެކު ފެނުގެ ރިޒާވެއް މާލޭގެ ރައްޔިތުންނަށް ބިލްޑްވެގެންދާނެކަން ފާހަގަކުރައްވައި ޝާހު ވިދާޅުވީ "ސިނަމާލެ ބްރިޖު" ދަށުން ކަލާފާނު ޓޭންކާ ހަމައަށް ގުޅުމަށްޓަކައި ކުރަން ޖެހޭ މަސައްކަތްތައް ކުރަމުންދާ ކަމަށެވެ.
އެގޮތުން މިމަސައްކަތް ކޮށްދޭނެ ފަރާތެއް ހޯދުމަށް މާޗްމަހު އިއުލާން ކުރި ކަމަށާއި، މިހިނގާ ސެޕްޓެންބަރު މަހު ކޮންޓްރެކްޓަރަކަށް އެވޯޑް ކުރެވޭ ހިސާބަށް ގޮސްފައިވާ ކަމަށް ޝާހު ވިދާޅުވިއެވެ. އަދި މިމަސައްކަތުގެ ތެރެއިން ވެސް މާލޭގެ ނެޓްވޯކަށް ބުރުލެއް އެރުމެއްނެތި މަސައްކަތް ކުރިއަށް ގެންދެވިދާނެ ކަމަށް ޝާހު ވިދާޅުވިއެވެ.
ގްރެޓަރ މާލެ ކަނެކްޓިވިޓީގެ ދަށުން މާލެއާއި ވިލިމާލެ އާއި ގުޅީފަޅު އަދި ތިލަފުށި މިކަނެކްޓިވީގެ ދަށުން ފެނުގެ ނެޓްވޯކް އެޅުމަކީ މިސަރުކާރުގެ ވިސްނުމެއް ކަމަށް ޝާހު ވިދާޅުވިއެވެ. އަދި ކުރިއަށް އޮތްތާގައި މިމަޝްރޫއު ކުރިއަށް ގެންދެވޭނެ ކަމުގެ އުންމީދު އޮތްކަން ވެސް ޝާހު ފާހަގަކުރެއްވިއެވެ.
