ބަނގްލަދޭޝްގައި ޑޮކްޓަރުކަން ކިޔަވަމުން ދަނިކޮށް މަރުވެފައިވާ ރައުދާ އާތިފްގެ އިތުރު އޮޓޮޕްސީއެއް ހެދުމަށް ގަބުރު ކޮނެގެން ނަގަން ބޭނުން ނުވާކަމަށް ރައުދާގެ އާއިލާއިން ބުނެފިއެވެ.

ރައުދާގެ އާއިލާއިން މިހެން ބުނެފައިމިވަނީ ނިމިގެން ދިޔަ މާޗް 29 ވަނަ ދުވަހު ބަނގްލަދޭޝްގެ ރާޖްޝާހީގައި މަރުވި ދިވެހި ދަރިވަރު ރައުދާ އާތިފްގެ އިތުރު އޮޓޮޕްސީއެއް ހެދުމަށް، އޭނާގެ ގަބުރު ކޮނެގެން ނެގުމުގެ ހުއްދައަށް ބަންގާޅު ފުލުހުންގެ ސީއައިޑީއިން ރާޖްޝާހީގެ ކޯޓެއްގައި އެދެފައި ވަނިކޮށެވެ.

ރާއްޖެ ޓީވީއަށް މައުލޫމާތު ދެމުން ރައުދާގެ އާއިލާއިން ބުނީ ރައުދާގެ ގަބުރު ކޮނެގެން ނަގަން ބޭނުން ނުވާ ކަމަށާއި ކޯޓުގައި އެކަމަށް އެދޭނެ ކަމަށެވެ.

ރައުދާގެ ހަށިގަނޑު ވަޅުލީ އޭޕްރިލް އެއްވަނަ ދުވަހު، ރާޖްޝާހީގެ ހަތިމް ޚާން ޤަބުރުސްތާނުގައެވެ. އޭނާގެ ހަށިގަނޑު ވަޅުލި އިރު، އޮޓޮޕްސީއެއް ވަނީ ހަދައިފައެވެ. އާއިލާއިން އިތުރު އޮޓޮޕްސީއެއް ހަދަން އޭރު ބޭނުންވި ނަމަވެސް، އިތުރު އޮޓޮޕްސީއެއް ހެދޭނެ ސަރަހައްދަކަށް ހަށިގަނޑު ގެންދިއުމަކީ ކުރަން އުނދަގޫ ކަމަކަށް ވުމުން ހަށިގަނޑު ވަޅުލީއެވެ.

ރައުދާގެ އާއިލާގެ ފަރާތުން ބައްޕަ  ޑރ. މުހައްމަދު އާތިފް، ރާޖްޝާހީ މެޖިސްޓްރޭޓު ކޯޓަށް މިދިޔަ ހަފްތާގައި ވަނީ، ރައުދާ މަރައިލީ ކަމަށާއި އެ މައްސަލަ ރަނގަޅަށް ތަހުގީގުކޮށްދިނުމަށް އެދި މައްސަލައެއް ވައްދައިފައެވެ. އެ މައްސަލަ ކޯޓުން ބަލައިގަނެ، ރަނގަޅަށް ތަހުގީގުކުރުމަށް ކޯޓުން އަމުރުކުރި އިރު، އެ މައްސަލަ ބެލުމަށް މިހާރު ހަވާލުކޮށްފައިވަނީ ބަންގާޅުގެ ސީއައިޑީއާއެވެ. ސީއައިޑީ ފަރާތުން އިންސްޕެކްޓަރ އަސްމާއުލް ހައްޤު ރާޖްޝަހީ މެޓްރޮޕޮލިޓަން މެޖިސްޓްރޭޓު ކޯޓަށް ހުށަހަޅަން ނިންމާފައިވާ މައްސަލައިގައި ވަނީ، ރައުދާގެ ކަށްވަޅު ކޮނެގެން ހަށިގަނޑު ނެގުމުގެ ހުއްދައަށް އެދުމެވެ. ނަމަވެސް މި ޕެޓިޝަން އަދި ކޯޓަށް ހުށަހަޅާފައި ނުވާކަމަށް ރާޖްޝަހީ ކޯޓުގެ އޮފިޝަލަކު "ދަ ޑެއިލީ ސްޓާ" ނޫހަށް ވިދާޅުވިއެވެ.

ރާޖްޝާހީ ސީއައިޑީގެ ސުޕަރިންޓެންޑެންޓް ނަޒްމުލް ކަރީމް ޚާން ވިދާޅުވީ، ރައުދާގެ ހަށިގަނޑުގެ ދެވަނަ އޮޓޮޕްސީއެއް ހެދުމަކީ މުހިންމު ކަމެއް ކަމަށެވެ. ސަބަބަކީ، ކުރީގެ އޮޓޮޕްސީއިން ރައުދާ އަމިއްލައަށް މަރުވީކަން ހާމަވެފައިވާ އިރު، ރައުދާގެ ބައްޕަ އެކަން ގަބޫލުނުކޮށް، ބަޔަކު ރައުދާ މަރައިލީ ކަމަށް ބުނަމުންދާތީ ކަމަށް ސުޕްރިންޓެންޑެންޓް ނަޒްމުލް ކަރީމް ވިދާޅުވިއެވެ.

"މި ތަހުގީގުގައި އެއްވެސް އުނިކަމެއް އޮތުމަށް ބޭނުމެއް ނޫން. ރައުދާގެ ހަށިގަނޑަކީ މި މައްސަލައިގެ އެންމެ މުހިންމު ހެކި،" ނަޒްމުލް ކަރީމް ޚާން ވިދާޅުވިއެވެ.

ބަންގާޅު ފުލުހުން މިހާރު ދަނީ ރައުދާގެ ފޯނާއި ލެޕްޓޮޕް  ބަލާ ފާސް ކުރަމުންނެވެ.

ރައުދާގެ މަރުގެ ތަހުގީގުގައި ބައިވެރިވުމަށް ދިވެހި ފުލުހުން ވެސް ބަންގާޅަށް ދިޔަ އިރު، މިދިޔަ ހަފްތާގައި ފުލުހުން ވަނީ އެ ތަހުގީގުން ފާހަގަވި ކަންކަން އާންމުކޮށްފައެވެ.