މާލެ ސަރަހައްދު ފުރަބަންދަށް ދިއުމުގެ ސަބަބުން ޚިދުމަތް ދިނުން ހުއްޓާލާފައިވާ ކ.ތިލަފުށީ ބޯޓު ޔާރޑުގެ މަސައްކަތް އަލުން ރައްޔިތުންނަށް ހުޅުވާލަން އެމްޓީސީސީން ނިންމައިފިއެވެ.
އެގޮތުން މި ޚިދުމަތް 20 ސެޕްޓެމްބަރ 2020 އަލުން އާންމު ކަސްޓަމަރުންނަށް ހުޅުވާލާނެ ކަމަށާއި އެކަމަށް ވާންޖެހޭ އެންމެހާ ތައްޔާރީތައް މިހާރު ނިމިފައިވާ ކަމަށް އެމްޓީސީސީން ބުންޏެވެ.
އެމްޓީސީސީ ބޯޓްޔާޑަކީ ރާއްޖޭގައި ޑޮކިންގް ޚިދުމަތް ފޯރުކޮށްދޭ އެންމެ ބޮޑު އެއް ބޯޓްޔާޑް ކަމަށްވާއިރު ޚިދުމަތަށް ހުޅުވާލާއިރު އަޅަންޖެހޭ ރައްކާތެރިކަމުގެ ފިޔަވަޅުތަށް ވެސް އެކަށައެޅިފައިވާ ކަމަށް އެ ކުންފުނިން ބުންޏެވެ.
މާލެ އަތޮޅު ތިލަފުށީގައި ޤާއިމްކޮށް ހިންގަމުންދާ މިބޯޓްޔާޑަކީ އެއްފަހަރާ ތަފާތު ސައިޒްގެ 20 އުޅަނދު ޑޮކްކުރުމުގެ ޖާގަ އޮތް ބޯޓްޔާޑެކެވެ.
2017 ވަނަ އަހަރު ޚިދުމަތަށް ނެރުނު 200 ޓަނުގެ ބޯޓް ހޮއިސްޓާއެކު، އެމްޓިސީސީ ބޯޓްޔާޑް ވެފައިވަނީ ޑޮކްކުރުމުގެ ކެޕޭސިޓީއާއި ޖާގައިގެ ގޮތުން ރާއްޖޭގެ އެންމެ ބޮޑު އެއް ބޯޓްޔާޑަށެވެ.
ހަމަ އެއާއިއެކު ރާއްޖޭގެ ކަނޑުދަތުރުފަތުރުގެ ސިނާއަތު ބޮޑުވަމުން ދާއިރު، ކަނޑުގައިދުއްވާ އުޅަނދުތައް ގެންގުޅޭ ފަރާތްތަކުގެ، ބޭނުންވާ އެއްމެހާ ޙިދުމަތެއް އެއްހަމައެއްގައި ފޯރުކޮށްދިނުމުގެ ޤާބިލުކަން އިތުރުކުރުމުގެ މަސައްކަތް މިހާރުދަނީ ކުރަމުން ކަމަށްވެސް އެކުންފުނިން ވަނީ ހާމަކޮށްފައެވެ.
އަދި ކަސްޓަމަރުންނަށް ބޭނުންވާ އެންމެހާ ޚިދުމަތްތަކެއް އެއްތަނަކުން ފޯރު ކޮށްދިނުމުގެ މަޤްޞަދުގައި އަޅުގަނޑުމެންގެ ބޯޓް ޔާރޑުން ތަފާތު ގިނަ އިންޖިނިއަރިންގް ޚިދުމަތްތަކާއި ޙައްލު ފޯރުކޮށްދެއެވެ. އެގޮތުން ބޯޓް ހޮއިސްޓް، ސްލިޕްވޭ، ބޯޓް ޓްރެއިލަރ އާއި އެއާބޭގް ޓެކްނޮލޮޖީ ބޭނުންކޮށްގެން ޑޮކްކުރުމުގެ ޚިދުމަތްވެސް ފޯރުކޮށްދެއެވެ.
މީގެ ތެރޭގައި ވެލްޑިންގް، މެޓަލް ފެބްރިކޭޝަން، މެރިން އިންޖިނިއަރިންގް، އިލެކްޓްރިކަލް މަސައްކަތް، މެޝިނިންގް، ފައިބަރުގެ މަސައްކަތް އަދި ވަޑާމުގެ މަސައްކަތް ހިމެނެއެވެ. އަދި ވޭތުވެދިޔަ އަހަރުތަކުގެ ތެރޭގައި އަންޑަރވޯޓަރ ވެލްޑިންގް އާއި ކަޓިންގް ޚިދުމަތް ވަނީ ތަޢާރަފްކޮށްފައެވެ.
