ކޮންޓެކްޓް ޓްރޭސިންގެ މަސައްކަތައް ކުރިއަށްދާއިރު، މައުލޫމާތުގެ ސައްހަކަން ދެނެގަތުމަށް ވަރަށް ގިނަ ގޮތްތަކުން ބަލަމުންދާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ އެޕިޑޮމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ ކޮވިޑް-19 ކޮންޓްރޯލް ކުރުމަށް ކުރާ މަސައްކަތުގެ ތެރެއިން އެންމެ ޚާއްސަ އިސްކަމެއްދީގެން ކުރާ މަސައްކަތަކީ ކޮންޓެކްޓް ޓްރޭސިންގެ މަސައްކަތް ކަމަށެވެ. ނަމަވެސް މި މަސައްކަތަށް ބައެއް މީހުންގެ ފަރާތުން އެއްބާރުލުން ނުލިބި ސައްހަ ނޫން މައުލޫމާތު ހިއްސާ ކުރާ ކަމަށް ޑރ. އަފްޒަލް ވިދާޅުވިއެވެ.
ޑރ. އަފްޒަލް ވިދާޅުވީ ބައެއް ހާލަތްތަކުގައި މައުލޫމާތު ހިއްސާ ކުރުމުން ކަނޑައެޅިގެން އެއީ ސައްހަ މައުލޫމާތު ނޫންކަން އެނގޭ ފަހަރު އަންނަ ކަމަށާއި، އެ ހާލަތުގައި އެމީހެއްގެ ފޯނުގެ މޫވްމަންޓަށް ބަލައިގެން އިތުރު ކަންކަން ދެނެގަންނަ ކަމަށެވެ. އެގޮތުން އެމީހާ ދިޔައީ ކޮންތޯކަށްތޯ އަދި ބައްދަލުވީ ކޮންބަޔަކާތޯ ވެސް ބަލާ ކަމަށް ޑރ. އަފްޒަލް ވިދާޅުވިއެވެ.
އެގޮތަށް ވެސް ބަލަން ޖެހޭ ހާލަތަށް އާދޭ. އެވަރަށް އެއިންވެސްޓިގޭޓް ކުރަން ޖެހެނީ ވެސް ދެފަރާތަކުން ދޭ މައުލޫމާތެއް ފުށޫ އަރާގޮތްވީމަ. އެހެންނޫނިއްޔާ އޮންނަ ގޮތަކީ ހަގީގަތުގަ މިހާރުގެ ކޭސް ލޯޑާ މިހުރިހާ ކޮންޓެކްޓް އަންނަ މީހުންގެ އަދަދަށް ބަލާއިރު އޭގެ ތެރެއިން ކޮންމެ ފަރާތެއް ވަރަށް އިންޑެޕްތް އިންވެސްޓިގޭޝަނެއް ނުވަތަ ޕޮލިސް އިންވެސްޓިފގޭޝަނެއް ހިނގާ ކަހަލަ ގޮތަކަށް. ނަމަވެސް ފުލް އިންވެސްޓިގޭޝަނެއް ކުރުމަށް އެވަރުގެ ވަގުތެއް ނޯންނާނެ. އެވަރުގެ ސޯސްއެއް އަޅުގަނޑުމެންގެ އަތުގައި ނޯންނާނެ. ނަމަވެސް އަޅުގަނޑުމެން ބަލާނެ އަބަދުވެސް މިދޭ މައުލޫމާތުތަކަށް އެކޮންޓެކްޓް ކޭސްގެ ފަރާތުން ލިބޭ މައުލޫމާތު ކޭސްގެ ފަރާތުން އެކޮންޓެކްޓްވާ ފަރާތްތަކުން ލިބޭ މައުލޫމާތަށް. މިހުރިހާ ފަރާތްތަކުން ލިބޭ މައުލޫމާތަށް ބަލާއިރު އެމައުލޫމާތުގައި ފުރޫއެރުން ހުންނަ ކަމުގައިވާނަމަ ދެން އަޅުގަނޑުމެން އެކަން ވަކިން ބަލާނެ.އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް
ޑރ. އަފްޒަލް ވިދާޅުވީ އައުޓް ބްރޭކް ފެށިގެން އައިރުގައި ކޮންޓެކްޓުންގެ ގޮތުގައި ގިނަ ބަަޔަކު ފާހަގަކުރެވުނު ނަމަވެސް މިހާރު ކޮންޓެކްޓުންގެ ގޮތުގައި ފާހަގަ ކުރެވޭ މީހުންގެ އަދަދު ނިސްބަތުން މަދު ކަމަށެވެ. އަދި ކުއްލިއަކަށް ޑޭޓާތައް ގިނަވެފައި މިހާރު މަދުވާނީ ސައްހަ މައުލޫމާތު ނުލިބޭތީކަން ފާހަގަކުރެވިފައިވާ ކަމަށް ޑރ. އަފްޒަލް ވިދާޅުވިއެވެ.
މީގެ އިތުރުން ޑރ. އަފްޒަލް ވިދާޅުވީ ކޮންޓެކްޓުންގެ ގޮތުގައި ނަން ނުދިން ނަމަވެސް ޕޮޒިޓިވްވާ ބައެއް މީހުން ކުރީގެ ބައެއް ކޭސްތަކާ ގުޅޭ ކަމަށެވެ. އެހިސާބުން އެމައޫލުމާތު ހަނދާން ނެތުމުގެ ސަބަބުން ހިއްސާ ނުކުރެވުނީ ކަމަށް ބައެއް މީހުން ބުނާ ކަމަށް ވެސް ޑރ. އަފްޒަލް ވިދާޅުވިއެވެ.
ޑރ. އަފްޒަލް ވިދާޅުވީ ކޮވިޑް-19 ކޮންޓްރޯލް ކުރުމަށް އެންމެން ގުޅިގެން މަސައްކަތް ކުރަން ޖެހޭ ކަމަށާއި، މިކުރަމުންދާ މަސައްކަތަށް އާންމު ރައްޔިތުންގެ އެއްބާރުލުން ވަރަށް މުހިންމު ކަމަށެވެ. އެހެންކަމުން ކޮންޓެކްޓް ޓްރޭސިންގެ މަސައްކަތަށް ވެސް އެއްބާރުލުން ދިނުމަށް ބާރު އަޅާ ކަމަށާއި، މަސައްކަތް ކުރަނީ ހަރުކަށި ފިޔަވަޅު އަޅައިގެން މައްސަލަތައް ހައްލު ކުރަން ނޫން ކަމަށް ޑރ. އަފްޒަލް ވިދާޅުވިއެވެ.
