މިފްކޯގެ ދަށުން ހިންގަމުން އަންނަ ގދ. ކޫއްޑޫ މަސްފެކްޓަރީގެ ސީނިޔަރ ހަތަރު މުވައްޒަފަކު ޕީޕީއެމްގެ ރައީސް ޔާމީން ފެކްޝަނަށް ތާއީދު ނުކޮށްގެން ޅ. ފެލިވަރު މަސްފެކްޓަރީއަށް ބަދަލުކޮށްފި އެވެ.

ރާއްޖެ އެމްވީއަށް މައުލޫމާތު ލިބިފައިވާ ގޮތުގައި ކޫއްޑޫގެ ވަޒީފާއިން ވަކިކޮށް ފެލިވަރަށް ބަދަލުކުރި އެ ހަތަރު މީހުންނަކީ ކޫއްޑޫގައި 15 އަހަރަށްވުރެ ގިނަ ދުވަހު ހިދްމަތް ކުރަމުންއައި ޗީފް ސްކީޕަރގެ މަގާމުގައި ހުރި ހުސައިން ތައުފީގް އާއި ކޫއްޑުގައި އަށް (8) އަހަރަށްވުރެ ގިނަ ދުވަހު ހިދްމަތް ކުރަމުންއައި ސީނިއަރ ސްކީޕަރ އަހުމަދު ނާސިރު އާއި 13 އަހަރަށް ވުރެ ދިގުމުއްދަތަކަށް ހިދްމަތް ކުރަމުންއައި ސީނިއަރ ސްކީޕަރ އާސިފް އަހުމަދުގެ އިތުރުން 13 އަހަރަށް ވުރެ ދިގު މުއްދަތަކަށް ހިދްމަތް ކުރަމުންއައި ކޭޝިއަރެއްގެ މަގާމުގައި ހުރި މުހައްމަދު ފިރުދައުސް އެވެ.

ހޯމަ ދުވަހު ހަވީރު "ރާއްޖެއެމްވީ"އަށް މައުލޫމާތު ދެމުން ހުސައިން ތައުފީގް ބުނީ އެމީހުން ވަކިކޮށްފައިވަނީ ރައީސް ޔާމީންގެ ފެކްޝަނަށް ތާއީދުކޮށް، ގއ. ވިލިނގިލީގައި ހުންނަ ޕީޕީއެމް ކެމްޕެއިން ޖަގަހައާއި ކެމްޕެއިން ހަރަކާތްތަކުގައި ހަރަކާތްތެރިވުމަށް އެދުމުން އެކަމަށް ނޫނެކޭ ބުނުމުން ކަމަށެވެ.

އޭނާ ބުނީ ފިރުދައުސް ފިޔަވާ ދެން ތިބި ތިން މީހުންނަކީ މީގެކުރިން ޕީޕީއެމްގެ އެކިއެކި ހަރަކާތްތަކުގައި އަދި ރައީސް ޔާމީން ވެރިކަމަށް ގެނައުމަށް އެރަށުގައި ބުރަ މަސައްކަތް ކުރި މީހުން ކަމަށާއި ނަމަވެސް ޕީޕީއެމުން ރައީސް މައުމޫން ބާކީ ކުރުމުންނާއި ވިލިނގިލި ދާއިރާގެ މެމްބަރު ސައުދު ހުސައިން ގުޅިފައިވާ އިދިކޮޅު ސިޔާސީ ޕާޓީތަކުގެ ހަރަކާތްތަކާ ގުޅިވަޑައިގެންނެވުމާއެކު އެތިން މީހުންވެސް ޕީޕީއެމްގެ ރައީސް ޔާމީން ފެކްޝަންގެ ހަރަކާތްތަކުގައި ބައިވެރި ނުވާކަމަށެވެ.

ތައުފީގު ބުނީ ރައީސް ޔާމީން ފެކްޝަނަށް ތާއީދު ނުކުރުމުން އަދަބެއްގެ ގޮތުން ގިނަ ދުވަހު ކޫއްޑޫގައި އަދާކުރަމުންދިޔަ ވަޒީފާއިން ވަކިކޮށް، ފެލިވަރު މަސްފެކްޓަރީގެ ވަޒީފާއަށް ބަދަލުކޮށްފައިވާކަން އެ ހަތަރު މީހުންނަށް އަންގާފައި ވަނީ ކޫއްޑޫ މަސްފެކްޓަރީގެ ހިއުމަން ރިސޯސް ޑިޕާޓްމަންޓުން ކަމަށެވެ. އަދި ކޫއްޑޫ ވަޒީފާއިން ވަކިކޮށް ފެލިވަރުގެ ވަޒީފާއަށް ބަދަލު ކޮށްފައިވާ ކަމުގެ ލިޔުން އަންގާރަ ދުވަހުގެ ހެނދުނު 09:00 ދޭނެ ކަމަށް ބުނެފައިވާ ކަމަށާއި އަދި ފެލިވަރަށް ފުރުމަށް ހަމަޖެހިފައިވަނީ ވެސް ހަމަ އެވަގުތު ކަމަށް ތައުފީގު ބުންޏެވެ.

މިކަމާ ގުޅިގެން ކޫއްޑޫގެ ހިއުމަންރިސޯސް ހެޑް މަރިޔަމް ޝަފާ "ރާއްޖެއެމްވީ"އަށް ވިދާޅުވީ މީޑިއާއަށް އެފަދަ މައުލޫމާތު ހިއްސާ ކުރެވެން ނެތް ކަމަށާއި ނަމަވެސް މިފްކޯގެ މުވައްޒަފުން އެކުންފުނީގެ ދަށުން އުފައްދާފައިވާ ކޫއްޑޫ އަދި ފެލިވަރު ފަދަ ކުންފުނިތަކަށް އެއްކުންފުނިން އަނެއް ކުންފޫނީގެ ދަށަށް އަބަދުވެސް ބަދަލު ކުރަމުންދާ ކަމަށެވެ.

"ރާއްޖެއެމްވީ"އާ  ވާހަކަ ދައްކަމުން ފިރުދައުސް ބުނީ އޭނާއަކީ އެމްޑީޕީގެ ގއ. ދާއިރާގެ އިސް މެމްބަރެއް ކަމަށާއި އޭނާ ކޫއްޑޫ ވަޒީފާއިން ވަކިކޮށް ފެލިވަރަށް ބަދަލުކޮށްފައިވަނީ ޕީޕީއެމަށް ސޮއި ކުރުމަށް ދެކޮޅު ހެދުމުން ކަމަށެވެ.

ކޫއްޑޫގެ ހަތަރު މުވައްޒަފަކު ފެލިވަރަށް ބަދަލު ކޮށްފައިވާއިރު، ފެލިވަރުގެ ދެ މުވައްޒަފަކު ކޫއްޑޫއަށް ވަނީ ބަދަލު ކޮށްފަ އެވެ. އެ ދެ މީހުން ކޫއްޑޫއަށް ބަދަލުކޮށްފައިވަނީ ސިޔާސީ ނުފޫޒު ބޭނުންކޮށްގެން ކަމަށް ވެއެވެ.