މަސްވެރިންނަށް ދިމާވާ ދަތިތަކާއި ގޮންޖެހުންތައް ނައްތާލުމަށް އެކުލަވާލާ ގަވާއިދުތައް ގެޒެޓް ކުރެވި އަމަލު ކުރެވެން ފެށުމާއެކު ގިނަ މައްސަލަތަކަށް ހައްލު ލިބޭނެ ކަމަށް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ފިޝަރީޒް މިނިސްޓްރީގެ ސްޓޭޓް މިނިސްޓަރު ހަސަން ރަޝީދު ވިދާޅުވީ މަސްވެރިންނަށް ދިމާ ގޮންޖެހުންތަކަށް ހައްލު ހޯދުމަށް ވަރަށް ގިނަ މަސައްކަތްތައް ކުރަމުންދާ ކަމަށާއި، އުންމީދު ކުރަނީ މަސްވެރިކަން ކުރިއެރުމަށް އެކުލަވާ ގަވާއިދު ގެޒެޓް ކުރެވި ތަންފީޒު ކުރެވިގެން ދިއުމާއެކު ބޮޑެތި ހައްލުތަކެއް ލިބިގެންދާނެ ކަމަށެވެ.
މަސްވެރިކަމާ ގުޅުންހުރި ދެގަވާއިދެއް ގެޒެޓްކޮށް ނިމިފައިވާކަން ފާހަގަކުރައްވައި ހަސަން ރަޝީދު ވިދާޅުވީ މިހާރު ހަތަރު ގަވާއިދު ގެޒެޓް ކުރުމުގެ މަގުމަތީގައިވާ ކަމަށެވެ.
ދެން މިހާރު އަޅުގަނޑުމެން ކުރާ އެއް މަސައްކަތަކީ މެނޭޖްމެންޓްސް ޕްލޭން ތައްޔާރު ކުރުން. އެގޮތުން އަޅުގަނޑުމެން 12 މެނޭޖްމެންޓް ޕްލޭން ހަދަން ހަމަޖެހިފައި އޮތީ. އޭގެ ތެރެއިން 8 މެނޭޖްމެންޓް ޕްލޭން މިމަހުގެ އަޅުގަނޑުމެންނަށް ދީފައިވާ ޑިއުޓީތައް ނިންމާފަ އަޅުގަނޑުމެން މިހާރު އެނިންމުމުގެ މަސައްކަތް ކުރިއަށް މިދަނީ. މިހާރުގެ މަރުހަލާގައި ރައްޔިތުންގެ ހިޔާލު ހޯދުން، މަސްވެރިންގެ ހިޔާލު ހޯދުން އެމެނޭޖްމެންޓްތައް ޕްލޭންތަކަށް. އެކަމާ ގުޅޭ ހުރިހާ ފަރާތަކަށް ގުޅާގެން އޮންލައިންކޮށްނާއެކު އަޅުގަނޑުމެން ހިޔާލު ހޯދާ އެއްޗެހިތައް އިސްތިހާރު ކުރުމުން އެބޭފުޅުންގެ ވެސް ފެންނަ ކަންތައްތައް އޭގެ ތެރެއަށް ކޯޕްރޭޓް ކުރުމަށް މިދަނީ.ފިޝަރީޒް މިނިސްޓްރީގެ ސްޓޭޓް މިނިސްޓަރު ހަސަން ރަޝީދު
ހަސަން ރަޝީދު ވިދާޅުވީ މި ގަވާއިދުތައް ހެދުމުގައި ވަރަށް ގިނަ ކަންތައްތައް ބަލަންޖެހޭ ކަމަށާއި، ގަވާއިދުތަކަކީ އަވަސް އަރުވަލައިގެން ކުރެވޭނެ މަސައްކަތެއް ނޫން ކަމަށެވެ. އަދި ވަރަށް ގިނަ ޓެކްނިކަލް ބައިތައް އެކުލެވިގެންވާކަން އޭނާ ފާހަގަކުރެއްވިއެވެ.
ހަސަން ރަޝީދު ވިދާޅުވީ މަސައްކަތްތައް ކުރަނީ ވަރަށް ބޮޑަށް ޕްލޭން ކުރެވިގެންދާ ކަމަށާއި، މި މަސައްކަތަށް މަސްވެރިންގެ ހިޔާލު ވެސް ހޯދާ ކަމަށެވެ. މިހާރުގެ ހާލަތާއި، މީގެ ކުރިން ކަންތައްތައް ހިނގާފައިވާ ގޮތަށް ވެސް ބައްލަވާ ކަމަށް އޭނާ ވިދާޅުވިއެވެ.
ގަވާއިދުތައް އަޅުގަނޑުމެން ހަދަން ބަލާއިރުގަ ވަރަށް ގިނަ ބޭފުޅުން ބުނާނެ ވަރަށް ފަސޭހައިން މީހުން ހަޔަރ ކުރެވިދާނޭ. އެހެންނަމަވެސް ހަޔަރކޮށްގެން އެކަމެއް ނުކުރެވޭ އެނގޭތޯ. މިދާއިރާގެ ނެޓްނިކަލް ކަންތައްތައް އެނގެންޖެހޭ. އެއީ އަޅުގަނޑުމެންނަށް ކުރިމަތިވި ވަރަށް ބޮޑު ގޮންޖެހުމެއް. އެހެންވީމަ އަޅުގަނޑުމެންގެ ސްޓާފުންނަށް ބަލާއިރު ވަރަށް މިހާރު މިތިބެނީ މިކަމުގައި ކުރެވޭ މަސައްކަތް ކުރެވޭ ފެންވަރުގަ ވަރަށް މަދު ކިޔަވައިގެން ތިބި ސްޓާފުން. ނަމަވެސް އެކުދިންނާއެކު އަޅުގަނޑޫމެން މަސައްކަތް މިދަނީ ކުރިއަށް. އެހެންވީމަ އެއާއެކު އަޅުގަނޑުމެން އިރާދަކުރެއްވިއްޔާ މާ ލަސްތަކެއް ނުވެ މިގަވާއިދުތައް މިހާރު ނިމިފައި.ފިޝަރީޒް މިނިސްޓްރީގެ ސްޓޭޓް މިނިސްޓަރު ހަސަން ރަޝީދު
ހަސަން ރަޝީދު ވިދާޅުވީ ގަވާއިދު އެކުލަލާވާލައި ގެޒެޓް ކުރުމުގައި ވަރަށް ގިނަ މަރުހަލާތައް ކަނޑައްތު ކުރަންޖެހޭ ކަމަށެވެ. މިމަސައްކަތަކީ ވަގުތު ބޭނުންވާ މަސައްކަތެއްގެ ގޮތުގައި އޭނާ ސިފަކުރެއްވިއެވެ.
ހަސަން ރަޝީދު ވިދާޅުވީ މަސައްކަތް ކުރަނީ ވަރަށް މަސްވެރިންގެ ކަންބޮޑުވުންތަކާއި، ދިމާވާ ގޮންޖެހުންތަކަށް ހައްލު ލިބޭ ވަރަށް ފުރިހަމަ ގަވާއިދެއް ތަންފީޒު ކުރުމަށް ކަމަށެވެ. އެގޮތުން މާލަސްތަކެއް ނުވެ ހުރިހާ ގަވާއިދެއް ގެޒެޓް ކުރެވިގެންދާނެ ކަމަށް ވެސް ހަސަން ރަޝީދު ވިދާޅުވިއެވެ.
