ހުޅުމާލޭގައި ޒަމާނީ ދަނޑުވެރިކަން ނުވަތަ އާރބަން ފާރމިންއަށް ބިން ދޫކުުރުމުގެ މަސައްކަތް ވަރަށް އަވަހަށް ފަށާނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީން) ބުނެފިއެވެ.
ރާއްޖެޓީވީ ދެއްވި ހާއްސަ އިންޓަވިއުއެއްގައި އެޗްޑީސީގެ ޑިރެކްޓަރ މުނިސިޕަލް ޑިޕާޓްމަންޓް އާދަމް އަޒްމީލް ވިދާޅުވީ އާރބަން ފާރމިން އަކީ ހުޅުމާލޭގައި ދިރިއުޅޭ ފަރާތްތަކުން ކާބޯތަކެތި އުފައްދާ ވިއްކުމަށް ފުުރުސަތު ހޯދައި ދިނުމުގެ ގޮތުން ކުރިއަށް ގެންދިއުމަށް ހަމަޖެހިފައިވާ ޕްރޮގްރާމެއް ކަމަށެވެ.
ހުޅުމާލޭގައި ދިރިއުޅޭ ފަރާތްތަކުން ފްލެޓްގެ ކައިރީގައި ބޮޑެތި ގަސްތައް އިންދާ ހެއްދުމަކީ އިމާރާތަށް ބޮޑެތި ގެއްލުން ތަކެއް ލިބޭނެ ކަމެއް ކަމަށް އަޒްމީ ފާހަގަ ކުރެއްވިއެވެ.
ފްލެޓްގައި އިންނަ ކޮމަން އޭރިއާގައި ގަސް އިންދަން އެއްވެސް ވަރަކަށް ނޭދެން. ޕޮޓެއްގައި ގަހެއް އިންދާފައި ބެހެއްޓުން އަޅުގަނޑުމެން ނުބަލަން އެއީ އިންދުން ކަމަކަށް.ފްލެޓް ކުރިމަތީ އާއި ފުރަގަހުގައި ގަސް އިންދާފައި ހުރުމުން ވަރަށް ދަތިވޭ، އަޅުގަނޑުމެންގެ ސާރވިސްތައް ހުންނާތީ އެ ކޮމަން އޭރިއާގައި އިންދާފައި ހުންނާތީ ވަރަށް ދަތިވޭ އަސްލު، ފްލެޓެއްގެ ކައިރީގައި ބޮޑު ގަހެއް އިންދީމާ އެ ފްލެޓަށް ލިބޭ ގެެއްލުން ގަބޫލުކުރަންވާނެ.ކުރިއަށް އޮތް 20 ނުވަތަ 30 އަހަރުވެސް އެބޭފުޅުން ދިރިއުޅުއްވާނީ އެ ބިލްޑިންގް ގަ ކަންނޭންގޭ. ފްލެޓްގެ ހެތްދީވެސް އެއީ ވަރަށް މުހިއްމު ކަމެއް، ބޮޑެތި ބަނބުކެޔޮގަސް ކެޔޮގަސް އެފަދަ ތަކެތި އިންދާ އެއީ ހުއްދަ ކުރާނެ ކަމެއ ނޫން
އެހެންކަމުން އާބަން ފާރމިން އަށް ބިން ދޫކުރުމަށް އެޗްޑީސީން ވަރަށް އަވަހަށް އިއުލާން ކުރާނެ ކަމަށާއި ހުރިހާ ފަރާތްތަކަށް ވެސް ފޯމް ހުށަހެޅުމުގެ ފުރުސަތު ހުޅުވާލެވިގެންދާނެ ކަމަށް އޭނާ ވިދާޅުވިއެވެ.
އާރބަން ފާރމިންގެ ތެރެއިން 40 އަކަށް މީހުންނަށް 500 ސްކޮއަރ ފީޓްގެ ބިން ދޫކުރުމަށް ވަނީ ހަމަޖެހިފައެވެ. ބިން ދޫކުރުމަށް ހަމަޖެހިފައިވަނީ ރެހެންދީ ސްކޫލް ހުންނަ ސަރަހައްދުގެ ކައިރިން ކަމަށް އަޒްމީ ވިދާޅުވިއެވެ.
އަޒްމީ ވިދާޅުވީ އާބަން ފާރމިންގެ ކޮންސެޕްޓް ހަދާފައިވާ ގޮތުން ދަނޑުވެރިން ހައްދާ ތަކެތި އެތަނުގައި ތިބެގެންވެސް ވިއްކޭނެ އިންތިޒާމް ހަމަޖެހިގެންދާނެ ކަމަށެވެ.
މިހާރު ވެސް ހުޅުމާލޭގެ އެކި ސަރަހައްދު ތަކުގައި މާރުކޭޓްތައް ހިންގަމުންދާއިރު ރަނގަޅު މާކެޓެއް އޮންނަކަން ފާހަގަ ކުރައްވާ އަޒްމީ ވިދާޅުވީ އާބަން ފާރމިންގެ ތެރެއިން ވެސް ރަނގަޅު އާމްދަނީއެއް ހޯދޭނެ ކަމަށެވެ.
