ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ޑިރެކްޓަރ ޖެނެރަލް އޮފް ޕަބްލިކް ހެލްތް މައުމޫނާ އަބޫބަކުރުގެ މަންމަ ނިޔާވި ކަމަށް ބުނެ، ލިބިލެއްވީ ނުރަނގަޅު މައުލޫމާތެއް ކަމަށާއި އެ މައުލޫމާތުގެ މައްޗަށް ބިނާކޮށް ޓްވީޓެއް ކުރެއްވުނީތީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މައާފަށް އެދިވަޑައިގަންނަވައިފިއެވެ.

މައިމޫނާގެ މަންމަ ނިޔާވި ކަމަށް ލިބިލެއްވި މައުލޫމާތަކާ ގުޅިގެން ރައީސް ނަޝީދު ވަނީ އާދިއްތަ ދުވަހުގެ ވަގުތެއްގައި ޓްވީޓެއް ކުރައްވާފައެވެ. ނަމަވެސް ޓްވީޓް ކުރެއްވިތާ މާގިނަ އިރުތަކެއް ނުވަނީސް ރައީސް ނަޝީދު ވަނީ އެ ޓްވީޓް ޑިލީޓް ކުރައްވާފަ އެވެ.

އެކަމާ ގުޅިގެން ރައީސް ނަޝީދު ކުރެއްވި އެހެން ޓްވީޓެއްގައި ވިދާޅުވީ ކޮންމެ ދުވަހަކު މައިމޫނާ ކުރައްވާ ބުރަ މަސައްކަތް ހިތަށް އަރާ ކަމަށާއި އަދި ހާއްސަކޮށް މި ދަނޑިވަޅުގައި މަންމަ ބަލިވުމުން ވާނެ ގޮތް ވެސް އިހުސާސް ކުރެއްވޭ ކަމަށެވެ.

"އަޅުގަނޑަށް ނުރަނގަޅު މައުލޫމާތެއް ލިބުނީ. އެކަމަށް ނިހާޔަތަށް މައާފަށް އެދެން. އަދި މައިމޫނާ މަންމަ އަށް އަވަސް ޝިފާއަކަށް އެދެން" ރައީސް ނަޝީދު ފަހުން ކުރެއްވި ޓްވީޓްގައި ވިދާޅުވެފައި ވެއެވެ.

މިހާރު މުޅި ދުނިޔޭގައި ފެތުރިފައިވާ ކޮވިޑް-19 ރޯގާއާ ގުޅިގެން، ރާއްޖޭގައި ވެސް ކޮވިޑް-19ގެ ނުރައްކާ ވަނީ ބޮޑު ވެފައެވެ.

ކޮވިޑް-19 ރާއްޖޭގައި ފެތުރުން ކޮންޓްރޯލް ކުރުމަށްޓަކައި ކަމާބެހޭ އިދާރާތަކާއި ގުޅިގެން، އެޗްޕީއޭގެ ޑިރެކްޓަރ ޖެނެރަލް ޕަބްލިކް ހެލްތް މައުމޫނާގެ ބެލުމުގެ ދަށުން، ރާއްޖޭގައި ވެސް ގިނަ ފިޔަވަޅުތަކެއް ދަނީ އަޅަމުންނެވެ.