ގދ. ހޯނޑެއްދޫގައި ކޮމިއުނިޓީ ސްޕްރެޑެއް އޮތްކަން ހާމަކޮށްފައިވާ އިރު، އެ ރަށުން އިތުރު މީހަކު ކޮވިޑަށް ޕޮޒިޓިވްވެފައިވާ ކަމަށް ހެލްތް އެމަރޖެންސީ އޮޕަރޭޝަން ސެންޓަރުން ބުނެފިއެވެ.
ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ބުދަ ދުވަހު ޕޮޒިޓިވްވި މީހާއެކު އެރަށުން 36 މީހަކު ކޮވިޑް-19ށް ޕޮޒިޓިވްވެފައިވާ ކަމަށެވެ. މީގެ ތެރޭގައި ހިމެނެނީ 3 ސެޕްޓެމްބަރުގައި ހޯމް ކަރަންޓީނުން ދޫކޮށްލުމުގެ ކުރިން ސާމްޕަލް ނެގި މީހުންގެ ތެރެއިން 4 މީހަކާއި، ކޮންޓެކްޓުންގެ ގޮތުގައި ހިމެނޭ 32 މީހެއް ކަމަށެވެ.
4 ސެޕްޓެމްބަރުގައި އިތުރު 2 ކޭސްއެއް ޕޮޒިޓިވްވި އަދި އެއާއި ގުޅިގެން 36 ކޮންޓެކްޓުން އަޅުގަނޑުމެންނަށް އައިޑެންޓިފައި ކުރިވިފައިވޭ. ދެން އެ ކޮންޓެކްޓުންގެ ތެރެއިން އަދި އަލާމާތްތައް ހުރި މީހުންގެ ތެރެއިން ޓެސްޓް ކުރި އިރުގައި 19 މީހުން ޕޮޒިޓިވްވެފައިވަނީ 5 ވަނަ ދުވަހު. އެމީހުންގެ 111 ކޮންޓެކްޓުން އަޅުގަނޑުމެންނަށް ފާހަގަކުރެވިފައިވޭ. އޭގެ ތެރެއިން 63 މީހުންގެ އަލާމާތްތައް ހުރިކަން ފާހަގަކުރެވުނު. ދެން މި ކޮންޓެކްޓުން ޓެސްޓް ކުރުމާއެކު އިއްޔެ (އަންގާރަ ދުވަހު) 10 ކޭސްއެއް ފެނިފައި މިވަނީ. އޭގެ އިތުރަށް ސާމްޕަލް ނަގާ ޓެސްޓް ކުރަމުން ގެންދިއުމާއެކުގައި އޭގެ ތެރެއިން އެކަކު މިއަދު ޕޮޒިޓިވްވެފައިވަނީ،ހެލްތް އެމަރޖެންސީ އޮޕަރޭޝަން ސެންޓަރުގެ ތަރުޖަމާނު ޑރ. ނަޒްލާ ރަފީގު
ޑރ. ނަޒްލާ ވިދާޅުވި ހޯނޑެއްދޫން އިތުރު ސަމްޕަލްތައް ނެގުމުގެ މަސައްކަތް ކުރަމުންދާ ކަމަށާއި، އޭގެތެރޭގައި ހިމެނެނީ އަލާމާތްތައް ހުރި މީހުންނާއި ކޮންޓެކްޓުން ކަމަށެވެ. މާލެ ފިޔަވައި ރާއްޖޭގެ ރަށަކުން އެންމެ ގިނަ ޕޮޒިޓިވް ކޭސްތައް މިހާރު ފެނިފައިވަނީ ހޯނޑެއްދޫންނެވެ. ހޯނޑެއްދޫ މިވަގުތު މޮނިޓަރިންގެ ހާލަތަށް ގެނެސްފައިވާ އިރު، އެ ރަށާއި ގުޅިފައިވާ މަޑަވެލި ވެސް ވަނީ މޮނިޓަރިންގެ ހާލަތަށް ގެނެސްފައެވެ.
އަތޮޅު ތެރެއިން މިހާތަނަށް 92 މީހަކު ޕޮޒިޓިވްވެފައިވާ އިރު، މީގެ ތެރޭގައި ހިމެނެނީ 85 ދިވެހިންނާއި، 7 ބިދޭސީންނެވެ. ކޮވިޑް ފެސިލިޓީތަކަށް ބަލާއިރު މާލެ ފިޔަވައި އަތޮޅު ތެރޭގެ 3 ފެސިލިޓީއެއްގައި 7 މީހަކަށް ދަނީ ފަރުވާ ދެމުންނެވެ.
