ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ގެކޮޅުކަމުގައިވާ މ. މާފަންނުވިލާ އާއި ގާސިމްގެ ދެ އޮފީހެއް ބަލައި ފާސްކޮށްފި އެވެ. 

މާފަންނު ވިލާގެ އިތުރުން ފުލުހުން ވަދެފައިވަނީ ވިލާ ބިލްޑިން އާއި ވިލާ ހައުސް އަށެވެ. އެ ހުރިހާ ތަނެއް ބަލައި ފާސްކޮށްފައިވާ ކަމަށް ގާސިމް އިބްރާހިމް ވަނީ ވިދާޅުވެފަ އެވެ. 

ފުލުހުން މި އިމާރާތްތަކަށް ވަދެފައިވަނީ މެންދުރު 2:00 ހާއިރު އެވެ. އަދި މާފަންނު ވިލާ ބަލައި ފާސްކުރުމަށް ފަހު ފުލުހުން ދިޔައީ 3:30 ހާއިރު އެވެ. ވިލާ ބިލްޑިންގައި މިހާރު ވެސް ފުލުހުން ހަރަކާތްތެރިވަމުން އެބަދެ އެވެ. 

ކްރިމިނަލް ކޯޓްގެ އިސް ގާޒީ އަބްދުލް ބާރީ ޔޫސުފް ސޮއިކުރައްވާ ނެރެފައިވާ ކޯޓް އަމުރުގައި ބުނެފައިވަނީ ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް ބޭނުންވާ ވަކި ގޮތަކަށް ރައްޔިތުންގެ މަޖިލީހުގައި ނަގާ ވޯޓްތައް އަނބުރާ ލުމަށްޓަކައި މަޖިލީހުގެ މެމްބަރުންނަށް ރިޝްވަތު ދީ ވޯޓަށް ނުފޫޒު ފޯރުވަން މަސައްކަތްކުރާ ކަމަށް ތުހްމަތު ކުރެވޭތީ އާއި ދިވެހިރާއްޖޭގައި ގާނޫނީ ގޮތުގައި އުފެދިފައިވާ ސަރުކާރު ގާނޫނާ ހިލާފަށް ބަދަލުކުރުމަށް ހިތްވަރު ލިބޭ ފަދަ އަމަލުތަކެއް ކުރަމުންދާ ކަމަށް ތުހްމަތު ކުރެވޭތީ އާއި ދައުލަތުގެ ސަލާމަތީ ބާރުތަކުގެ ތެރޭގައި ފިތުނަ ފަސާދަ އުފައްދައި، ގައުމުގެ ސުލުހަ މަސަަލަސްކަމާއި އަމާން އަމާންކަން ގެއްލުވާލަން މަސައްކަތް ކުރާ ކަމަށް، ތުހްމަތު ކުރެވޭ މައްސަލައިގައި ވިލާ ބިލްޑިން އާއި މައްސަލަ އާއި ގުޅުންހުރި ތަކެތި ރައްކާކޮށްފައި ހުރި ކަމަށް ބެލެވޭތީ މައްސަލައާ ގުޅުންހުރި ކަމަށް ބެލެވޭ އެންމެހާ ތަކެތި ފުލުހުންގެ ބެލުމުގެ ދަށަށް ގެނައުމަށެވެ. 

މި ކޯޓްގެ އަމުރުގެ ބާރު 48 ގަޑިއިރަށް ދެމިގެންދާއިރު، ބަލައި ފާސްކުރަން ކަނޑައަޅާފައިވަނީ 24 ގަޑިއިރެވެ. 

މާފަންނުވިލާއަށް ފުލުހުން ވަދެފައި މިވަނީ "މެމްބަރުންގެ އަދަދު ހަމަވެފައިވާ ކަމަށް" ޖުމްހޫރީ ޕާޓީގެ މައި ޖަގަހަ ކުނޫޒުގައި ހޮނިހިރު ދުވަހު ބޭއްވި ޖަލްސާގައި ގާސިމް ވިދާޅުވެފައި ވަނިކޮށެވެ. 

މި މަހުގެ6 ވަނަ ދުވަހު ގާސިމް ހައްޔަރު ކުރީ ވެސް މިއަދު ފުލުހުން ކުރި ތުހްމަތުއެވެ. ނަމަވެސް އޭނާ ހައްޔަރުކުރީ އިމްތިޔާޒުގެ ގާނޫނާ ހިލާފަށް ކަމަށް ކަނޑައަޅައި ހައި ކޯޓުން ގާސިމް ދޫކޮށްލީ މި މަހުގެ 13 ވަނަ ދުވަހު އެވެ. 

މިއީ ޖަރީމާއެއް ކަމަށް ޖުމްހޫރީ ޕާޓިން ވަނީ ބުނެފަ އެވެ.