ފޮނަދޫ ދާއިރާގެ ކުރީގެ މެމްބަރު އަދި ޕީއެންސީގެ ރައީސް އަބްދުއްރަޙީމް އަބްދުﷲ (އަދުރޭ) އަށް ސަރުކާރުގެ ސައްތައިން ސައްތަ ހިއްސާ އޮންނަ ކުންފުންޏެއް ކަމަށްވާ ގްރޭޓަރ މާލެ އިންޑަސްރްރިއަލް ޒޯން ޕްރައިވެޓް ލިމިޓެޑުން ގިނަ އަދަދެއްގެ ފައިސާ ދީފައިވާކަން ހާމަ ވެއްޖެއެވެ.

އިތުބާރު ހުރި މަސްދަރަކުން ރާއްޖެއެމްވީ އަށް އެނގިފައިވާ ގޮތުގައި ކުރީގެ ރައީސް ޔާމީންގެ އެންމެ އަރިސް އެއް ބޭފުޅެއްގެ ގޮތުގައި ހުންނަވާކަން ފާހަގަ ކުރެވިފައިވާ އަބްދުއްރަހީމަށް ފައިސާ ދޫކޮށްފައިވަނީ، ނިމި ދިޔަ ރިޔާސީ ކެމްޕޭނުގެ ދުވަސްވަރުއެވެ.

ފައިސާ ދީފައިވަނީ އަބްދުއްރަހީމްގެ ނަމުގައި ހަދާފައިވާ އަބްދުއްރަޙީމް ފައުންޑޭޝަނުން ލ ފޮނަދޫގައި ހިންގާ އަރަފާ ޕްރީ ސްކޫލު އިތުރަށް ފުޅާކުރުމަށް ކަމަށް ބުނެ ޕްރޮޕޯސަލެއް ހުށަހަޅައިގެންނެވެ.

ޖީއެމްއައިޒެޑުން 2018 ވަނަ އަހަރު އެކި އެކި ފަރާތްތަކަށް 6 މިލިއަން ރުފިޔާ ދޫކޮށްފައެވެ. މީގެ ތެރޭގައި ހިމެނެނީ އަބްދުއްރަހީމް ފައުންޑޭޝަނަށް އެހީ ދިން ފަދައިން ޕްރީ ސުކޫލެއް އިމާރަތް ކުރުމަށް، ނުވަތަ ރައްޔިތުންނަށް ބޭނުން ޖެހިފައިވާ ކޮންމެވެސް ކަމެއް ފުރިހަމަ ކުރުމަށް ކަމަށް ބުނެއެވެ.

އެކި އެކި ޕްރޮޕޯސަލްތައް ހުށަހަޅައިގެން ދޫކޮށްފައިވާ 6 މިލިއަން ރުފިޔާ ދޫކޮށްފައިވާ ފަރާތްތަކުގެ މައުލޫމާތު ރާއްޖެއެމްވީއަށް ލިބިފައިވާއިރު، އޭގެ ތެރޭގައި ހިމެނެނީ ރައީސް ޔާމީންގެ ސަރުކާރުގެ ވެރިންނާއި ނިމިދިޔަ މަޖިލީހުގެ ޕީ.ޕީ.އެމް އަށް ނިސްބަތްވާ މަޖިލިސް މެންބަރުންނާއި އެފަރާތްތަކާއި ގުޅުންހުރި ފަރާތްތައްކަން ވަނީ ހާމަވެފައެވެ.

އަބްދުއްރަޙީމް ފައުންޑޭޝަން ހިމެނޭގޮތަށް 6 މިލިއަން ރުފިޔާ ދޫކޮށްފައިވާއިރު އެގޮތައް އާއްމުކޮށް ފައިސާ ދޫކުރާ "ސްޕޮންސަރޝިޕް އުސޫލެއް" ގްރޭޓަރ މާލެ އިންޑަސްރްރިއަލް ޒޯން ޕްރައިވެޓް ލިމިޓެޑުގައި ނޯވެއެވެ.

ޕްރޮޕޯސަލް ހުށަހަޅައިގެން މިފަދަ ގިނަ އަދަދެއްގެ ފައިސާ ސަރުކާރުގެ ކުންފުނިތަކުން އަމިއްލަ ފަރާތްތަކަށް ދިނުމަކީ އާއްމުކޮށް ހަމަޖެހިފައިވާ އޮންނަ އޮންނަ އުސޫލެއް ކަމުގައި ނުވިޔަސް ކުރީ ސަރުކާރުން ވަނީ ސަރުކާރުގެ ކުންފުނިތައް ބޭނުންކޮށްގެން ނާޖާއިޒް ފައިދާ މީހުންނަށް ހޯދައިދިނުމުގެ ގިނަ ކަންތައްތައް ކޮށްފައިކަން ފެންނަން ހުރި ލިޔުންތަކުން ވަނީ ހާމަވެފައެވެ.

ޕްރީސްކޫލް ތައް އިމާރާތް ކުރުމާއި، ގްރޭޓަރ މާލޭ އިންޑަސްޓްރިއަލް ޒޯން ތަރައްގީ ކުރުމާ ހުރި ގުޅުން އެ ކުންފުނީގެ މަގްސަދަތުތަކަށް ބަލައިގެން، ދެނެގަނެވޭނެ ގޮތެއް ނުވިއެވެ.