ވެލާނާ އިންޓަރނޭޝަނަލް އެއާރޕޯޓް ތަރައްގީ ކުރުމުގެ މަޝްރޫއުގެ ދަށުން ތަރައްގީކުރާ އެއާރޕޯޓްގެ އާއްމު ފެރީ ފުރާ ސަރަހައްދު އާދިއްތަ ދުވަހުން ފެށިގެން ބަންދުކުރާ ގޮތަށް ނިންމައިފި އެވެ.

މޯލްޑިވްސް އެއާރޕޯޓް ކޮމްޕެނީ ލިމިޓެޑް (އެމްއޭސީއެލް)އިން ބުނީ އެއާރޕޯޓް އާއްމު ފެރި ފުރާ ސަރަހައްދު ތަރައްގީ ކުރުމަށްޓަކައި އޭޕްރީލް 16 ވަނަ ދުވަހުން ފެށިގެން ބަންދު ކުރުމަށް ނިންމާފައިވާ ކަމަށެވެ. އަދި އާއްމު ފެރީ ފުރާ ސަރަހައްދު ތަރައްގީކޮށް ނިމެންދެން އާއްމު ފެރީ ފުރާ ގޮތަށް ހަމަޖައްސާފައި ވަނީ ވެލާނާ އިންޓަރނޭޝަނަލް އެއާރޕޯޓްގެ އާއްމު ފެރީ ލަފާ ސަރަހައްދުން ކަމަށެވެ.

ދާދިފަހުން ވަނީ އިބްރާހީމް ނާސިރު އިންޓަރނޭޝަނަލް އެއާރޕޯޓްގެ ނަން ވެލާނާ އިންޓަރނޭޝަނަލްގެ ނަމަށް ބަދަލުކޮށް ރީ ބްރޭޑް ކޮށްފަ އެވެ. އަދި އިތުރު ރަންވޭއެއްގެ ހެދުމުގެ އަމަލީ މަސައްކަތް ފަށާފައިވާއިރު، އެ މަޝްރޫއުއަށް ޗައިނާގެ އެގްޒިމް ބޭންކުން 373 މިލިއަން ޑޮލަރުގެ ލޯނެއް ވަނީ ނަގާފައެވެ.

މީގެއިތުރުން ވެސް އެއާރޕޯޓް ތަރައްގީ ކުރުމަށް ގިނަ ކަންތައްތަކެއް ހިމަނާފައިވާއިރު، އެމަޝްރޫއުތައް ހިންގުމަށް ނިންމާފައިވަނީ ދެ ފިޔަވައްސަކަށް ބަހާލައިގެންނެވެ. އެ ދެ ފިޔަވަހި ނިމޭއިރު، އެއާރޕޯޓްގެ މުޅި ޕްރޮޖެކްޓަށް 800 މިލއަން ޑޮލަރު ހަރަދު ވާނެ ކަމަށް ސަރުކާރުން ބުނެއެވެ.