ފްލެޓްތަކުގެ މައްސަލަ ބަލާ ކޮމިޓީ“ އިން ނެރެފައިވާ "ހިޔާ" މަޝްރޫއުގެ ބައެއް ކެޓަގަރީތަކުގެ ވަގުތީ ލިސްޓްތަކުގައި ޕޮއިންޓް ދީފައިވާ ގޮތާމެދު ޝަކުވާ ހުށައެޅުމުގެ ފުރުސަތު ހުޅުވާލައިފިއެވެ.
ރައީސް އޮފީހުން ބުނީ ޝަކުވާ ކުރުމުގެ ފުރުސަތު ހުރިހާ ފަރާތްތަކަށް ވެސް ހުޅުވާލާފައިވާ ކަމަށާއި އެގޮތުން އެހެން ފަރާތަކަށް ޕޮއިންޓް ލިބިފައިވާ ގޮތާމެދު ޝަކުވާއެއް ހުށަހަޅަން ބޭނުންވާ ފަރާތްތަކަށް ވެސް ޕޯޓަލް މެދުވެރިކޮށް އެ ޝަކުވާއެއް ހުށަހެޅޭނެ ކަމަށް ފްލެޓްތަކުގެ މައްސަލަ ބަލާ ކޮމިޓީ އިން ބުނެފައިވާ ކަމަށެވެ.
ފްލެޓްތަކުގެ މައްސަލަ ބަލާ ކޮމިޓީ އިން މިކަން ހާމަކޮށްފައި ވަނީ ރައީސުލްޖުމްހޫރިއްޔާގެ އޮފީހުން އާދިއްތަ ދުވަހު ގެޒެޓު ކުރި ފްލެޓްތަކުގެ މައްސަލަ ބަލާ ކޮމިޓީގެ ބަޔާނުގައި ކަމަށާއި އެ ބަޔާނުގައި "ހިޔާ" މަޝްރޫއުގެ ދާއިމީ ލިސްޓްތައް އެކުލަވާލުމުގައި ޝަކުވާ ހުށަހެޅުމަށް ހަދާފައިވާ ޕޯޓަލް މެދުވެރިކޮށް ހުށަހެޅޭ ކޮންމެ ޝަކުވާއަކަށް ވެސް ރިއާޔަތް ކުރާނެ ކަމަށް ބުނެފައިވާ ކަމަށް ރައީސް އޮފީހުން ފާހަގަކުރެއެވެ.
"ހިޔާ" މަޝްރޫޢުގެ ކެޓަގަރީތަކުގެ ތެރެއިން، ޑޮކްޓަރުންނާއި ނަރުހުންނަށް ހާއްސަ ކެޓަގަރީއާއި، ޓީޗަރުންނަށް ހާއްސަ ކެޓަގަރީއާއި، މާލޭ ރަށްވެހިންނަށް ހާއްސަ ކެޓަގަރީއާއި، ނުކުޅެދުންތެރިކަން ހުންނަ ފަރާތްތަކާއި އާއިލާތަކަށް ހާއްސަ ކެޓަގަރީއަށް ފޯމު ހުށަހަޅާފައިވާ ފަރާތްތަކުގެ ތެރެއިން ފްލެޓްތަކުގެ މައްސަލަ ބަލާ ކޮމިޓީން ބެލިބެލުމުގައި އެ ކެޓަގަރީއަކަށް ފޯމު ހުށަހެޅުމަށް ޝަރުތު ހަމަވާ ފަރާތްތަކާއި ޝަރުތު ހަމަނުވާ ފަރާތްތަކުގެ، ޝަރުތު ހަމަނުވާކަމަށް ކޮމިޓީއަށް ފެންނަ ސަބަބާއެކު ވަގުތީ ލިސްޓު ގައި ވަނީ ހިމަނާފައެވެ. އަދި އެދުވަހުން ފެށިގެން ސެޕްޓެންބަރު މަހުގެ 14 ވާ ހޯމަ ދުވަހުގެ 15:00 ގެ ނިޔަލަށް އެ ލިސްޓްތަކަށް މިލިންކުމެދުވެރިކޮށް ޝަކުވާ ހުށަހެޅުމުގެ ފުރުސަތު ފްލެޓްތަކުގެ މައްސަލަ ބަލާ ކޮމިޓީ އިން ވަނީ ހުޅުވާލާފައެވެ.
