ބަލިވެގެން ޑޮކްޓަރަށް ދައްކާ މީހުން އިތުރު ފަރުވާއަށް މާލެ ދިއުމަށް ރިފަރ ކުރެވޭ ނިސްބަތް 60 އިންސައްތައަށް ދަށް ކުރެވިފައިވާ ކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެފިއެވެ.

ބުދަ ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ކުޅުދުއްފުށީ ރީޖަނަލް ހޮސްޕިޓަލުގެ މެނޭޖަރ އަހުމަދު ދާއޫދު ވިދާޅުވީ، އައު ސަރުކާރު އައިއިރު ހޮސްޕިޓަލުގެ ހިންގުމުގެ ބޮޑެތި މައްސަލަތަކެއް ހުރި ކަމަށެވެ. އެހެން ނަމަވެސް ކުރިއާ އަޅާބަލާއިރު، މާލެއަށް ރިފަރ ކުރާ ނިސްބަތް މިހާރު 60 އިންސައްތައަށް ދަށް ކުރެވިފައިވާ ކަމަށް އޭނާ ވިދާޅުވިއެވެ.

ދާއޫދު އިތުރަށް ވިދާޅުވީ، އައު ސަރުކާރު އައިއިރު މަސައްކަތް ކުރަމުން ދިޔައީ 19 ޑޮކްޓަރުން ކަމަށާއި، އެހެން ނަމަވެސް މިހާރު ޖުމުލަ 45 ޑޮކްޓަރުން މަސައްކަތް ކުރައްވަމުން ގެންދަވާ ކަމަށެވެ. އަދި ޖޫން މަހުގެ ތެރޭގައި ގިނަ އަދަދެއްގެ ސިއްޙީ އާލަތްތައް ވެސް ލިބިފައިވާކަން ފާހަގަ ކުރައްވައި ދާއޫދު އިތުރަށް ވިދާޅުވީ، ކުރިއަށް އޮތް ތަނުގައި ވެސް ހޮސްޕިޓަލުގެ ޚިދުމަތްތައް އިތުރަށް ފުޅާ ކުރުމަށް މަސައްކަތް ކުރައްވަމުން ގެންދަވާނެ ކަމަށެވެ. އެގޮތުން ކަށީގެ ސާރޖަރީތައް ހެދުމަށް ބޭނުންވާ ސާމާނު ޖޫން މަހުގެ ތެރޭގައި ލިބިފައިވާ ކަމަށާއި، ވަރަށް އަވަހަށް ކަށީގެ ސާރޖަރީ ވެސް ފެށިގެންދާނެ ކަމަށް ދާއޫދު ވިދާޅުވިއެވެ.

އެހެން ނަމަވެސް، މި ވަގުތު ކޮވިޑް-19 ގެ މި ޙާލަތާއި ގުޅިގެން ނަރުހުން ގެނައުމުގައި ދަތިތަކެއް ހުރި ކަމަށް އޭނާ ވިދާޅުވިއެވެ.

އޭގެ އިތުރުން ވެސް ކޮވިޑް-19 ގެ މި ޙާލަތުގައި އަމަލު ކުރަންޖެހޭ ވަކި އުސޫލުތަކެއް ހުރިކަން ފާހަގަ ކުރައްވައި އޭނާ ވިދާޅުވީ، ކޮވިޑް-19 އަށް ޝައްކުވާ ކޭސްތަކާއި، މޮނިޓަރިންގެ ޙާލަތުގައި އޮންނަ ރަށްރަށުން އަންނަ މީހުންނާ ދޭތެރޭގައި އަމަލު ކުރާނެ ޚާއްސަ އުސޫލުތަކެއް ޤާއިމު ކުރެވިފައިވާ ކަމަށެވެ.

ކުޅުދުއްފުށީ ރީޖަނަލް ހޮސްޕިޓަލަށް ދުވާލެއްގެ މައްޗަށް 300 އެއްހާ މީހުން ޚިދުމަތް ހޯދަން އަންނައިރު، މަހެއްގެ މައްޗަށް ގާތްގަނޑަކަށް 10،000 މީހުން ޚިދުމަތް ހޯދާ ކަމަށް ހޮސްޕިޓަލުން މައުލޫމާތުދެއެވެ.