ކޮވިޑް-19 ގެ ޙާލަތުގައި ޓޫރިސްޓް ފެސިލިޓީތަކުގައި ޗުއްޓީ ހޭދަކުރެވޭނީ ހެލްތް ޕްރޮޓެކްޝަން އޭޖެންސީ (އެޗްޕީއޭއިން) ކަނޑައަޅާފައިވާ އުސޫލަކުން ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިސްޓް ފެސިލިޓީތަކުގައި ދިވެހިން ޗުއްޓީ ހޭދަ ކުރުމާއި، އެތަންތަން ބޭނުން ކުރުން މަނާކޮށް މިނިސްޓްރީން ނިމިދިޔަ ހަފްތާގައި ވަނީ ސާރކިއުލަރ އެއް ނެރިފައެވެ. އަދި އެކަމާ ގުޅޭގޮތުން މިނިސްޓްރީން އާދިއްތަ ދުވަހު ނެރުނު ބަޔާނެއްގައި ބުނީ، ކޮވިޑް-19 އާ ގުޅިގެން އެކި ފަހަރުމަތިން މިނިސްޓްރީން ނެރިފައިވާ ބަޔާންތަކާއި އެންގުންތައް ބިނާވެފައިވަނީ އެކި ކަންކަމާ ގުޅޭގޮތުން ހެލްތު ޕްރޮޓެކްޝަން އޭޖެންސީން ނިންމާ ނިންމުންތަކަށް ކަމަށެވެ.
އެހެންކަމުން ޓޫރިސްޓް ފެސިލިޓީތަކުގައި ޗުއްޓީ ހޭދަކުރެވޭނީ އެޗްޕީއޭއިން ކަނޑައަޅާފައި އޮންނަ އުޞޫލުން ކަމަށްވެސް މިނިސްޓްރީން ބުނެފައިވެއެވެ. މިނިސްޓްރީން ވަނީ ދިވެހިރާއްޖޭގެ ފަތުރުވެރިކަމުގެ ޞިނާޢަތުގައި މަސައްކަތް ކުރާ ފަރާތްތަކުން ދެމުން ގެންދާ އެއްބާރުލުން ފާހަގަކޮށް ޝުކުރު އަދާކޮށްފައެވެ.
