ހޯމް ކަރަންޓީނަށް މިހާރު ދެވޭނީ ވަކި ޝަރުތުތަކެއް ފުރިހަމަވާ ފަރާތްތަކަށް އެކަނި ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ކަރަންޓީނަށް ދިއުމަށް މިހާރު އަމަލު ކުރަންވީ އުސޫލު އެކުލަވާލާ އެޗްޕީއޭ އިން ބުނީ އޮގަސްޓް 8 އަކުން ފެށިގެން ހޯމް ކަރަންޓީނަށްދާ ފަރާތްތަކުގެ ވަކި ޝަރުތުތަކެއް ހުންނަން ޖެހޭ ކަމަށެވެ.
އެގޮތުން ހޯމް ކަރަންޓީނަށް ދެވޭނީ މެޑިކަލް އެމަރޖެންސީއެއްގައި ޑޮކްޓަރަށް ދައްކަން މާލެ އައުމާއި ގުޅިގެން، މާލޭގައި ދިރިއުޅޭ ތަން ދޫކޮށްލަން ޖެހުމާއި ގުޅިގެން، ރަސްމީ ބޭނުމަކަށް މާލެ އައިސް ރަށަށް ދިޔުން، ވަޒީފާ ގެއްލިގެން ނުވަތަ ވަޒީފާ ރަށަށް ބަދަލުވުމާއި ގުޅިގެން ނުވަތަ ޝަރުއީ ކޯޓަކަށް ހާޒިރުވާން ޖެހުމުންނެވެ.
ހޯމް ކަރަންޓީނަށް އެދުމަށްފަހު ކަމާއި ގުޅޭ ލިޔެކިޔުންތައް އީމެއިލް މެދުވެރިކޮށް ރަށު ކައުންސިލަށް ހުށަހަޅަންވާނެ ކަމަށާއި ކަރަންޓީންވާން އެދޭ ތަން ބަލާ ޗެކްކުރުމަށްފަހު ހޯމް ކަރަންޓީން ވުމަށް ގުޅޭ ގޮތުން އެކުލަވާލާފައިވާ މިންގަޑަށް ޝަރުތުތައް ހަމަވާންވާނެ ކަމަށް އެޗްޕީއޭ އިން ބުނެއެވެ.
ކައުންސިލުތަކުން "ފާސްޓް ޕޯޓަލް" މެދުވެރިކޮށް ބަލައިގަތުމުން ހޯމް ކަރަންޓީްނވުމަށް އެދިފައިވާ ފަރާތުން ހުށަހަޅާފައިވާ ލިޔެކިޔުންތައް އެޗްޕީއޭގެ ފަރާތުން ބަލާ ވެރިފައި ކުރުމަށްފަހު އެމީހަކު ދަތުރުކުރުމަށް އެދިފައިވާ ތާރީހަށް ކަރަންޓީން ލިޔުން އަދި ބިލްޑިން މޮނީޓަރިންގ ނޯޓިސް ހާލު ބެލުން ޕޯޓަލްއަށް އަޕްލޯޑް ކުރެވޭނެ ކަމަށް ވެސް އެޗްޕީއޭ އިން ބުންޏެވެ.
މީގެ އިތުރުން އެމީހެއް ފުރުމަށްޓަކައި ޓިކެޓް ނަގަންވާނީ ކަރަންޓީން ލިޔުން އަދި ބިލްޑިން މޮނީޓަރިންގ ނޯޓިސް ލިބުމުން ކަމަށް އެ އެޖެންސީން ވަނީ ބުނެފައެވެ.
އެޗްޕީއޭ އިން އިތުރަށް ބުނީ މީގެ ކުރިން ހޯމް ކަރަންޓީން ވުމަށް އެދި ހުށަހަޅާ، އެ ހުށަހެޅުންތައް ބަލައި ނުގަނެވާ ފަރާތްތަކަށް އަލުން ޕޯޓަލް މެދުވެރިކޮށް ހުށަހެޅޭނެ ކަަމަށާއި އެ ފަރާތްތަކަށް އެސްއެމްއެސް މެދުވެރިކޮށް އެކަން އަންގާފައިވާނެ ކަމަށެވެ. އަދި ދަތުރު ކުރެވޭނީ ޝަރުތުތައް ފުރިހަމަ ފަރާތްތަކަށް އެކަނި ކަމަށް ވެސް އެޗްޕީއޭ އިން ބުންޏެވެ.
