ޖޯޖް ފްލޮއިޑްގެ މަރުގެ މައްސަލައާއި ގުޅިގެން އޭނާގެ 6 އަހަރުގެ ދަރިފުޅުގެ މަންމަ ފުރަތަމަ ފަހަރަށް މީޑިއާގައި އޭނާގެ ޝުއޫރުތައް ހިއްސާކޮށްފި އެވެ.
ރޮކްސީ ވޮޝިންގޓަން މީޑިއާތަކާ ބައްދަލުކޮށް، އޭނާގެ ޝުއޫރުތައް ހިއްސާކޮށްފައި ވާއިރު، އެކަމާ ގުޅިގެން ދައްކާނެ މާގިނަ ވާހަކައެއް ނެތްކަމަށް އޭނާ ބުނެއެވެ. އަދި ޖޯޖް ފްލޮއިޑްގެ މަރަށް ޒިންމާވާ ފުލުސް އޮފިސަރުން އޭނާގެ ކިބައިން ނިގުޅައިގަތީ އޭނާގެ ދަރިފުޅުގެ މުސްތަޤްބަލު ކަމަށް ރޮކްސީ ސިފަ ކުރެއެވެ.
އަދި އެ ފަރާތްތަކަށް އާއިލާއާއެކު ވަގުތު ހޭދަ ކުރުމުގެ ފުރުސަތު ލިބުނު ނަމަވެސް، އޭނާގެ ދަރިފުޅު ޖިއާނާއަކީ މިއަދު ބައްޕައެއްގެ ލޯބިން މަޙުރޫމު ވެފައިވާ ކުއްޖެއްކަމަށް ރޮމުން ރޮކްސީ ބުނެއެވެ. އަދި ޖިއާނާ ބޮޑުވެގެން އަންނަ މަންޒަރާއި، އޭނާގެ ގްރެޖުއޭޝަންގެ އިތުރުން އޭނާގެ ކައިވެނީގައިވެސް އޭނާގެ ބައްޕައަށް ނުހުރެވޭނެ ކަމަށް ރޮކްސީ ބުނެފައިވެ އެވެ.
އޭގެ އިތުރުން، ދަރިފުޅަށް ދިމާވާ ކޮންމެ ކަމެއްގައިވެސް ބައްޕަގެ އެހީތެރިކަން ބޭނުންވާނެކަން ފާހަގަކޮށް ރޮކްސީ ބުނީ، އެ އުފާ މިއަދު އޭނާގެ ދަރިފުޅަށް ލިބެން ނެތް ކަމަށެވެ. އެ ހުރިހާ ކަމަށްޓަކައި އިންސާފު ބޭނުންވާކަމަށް ވެސް ރޮކްސީ ބުނެއެވެ.
ރޮކްސީ ސިފަ ކުރާ ގޮތުގައި ޖޯޖްއަކީ ރަނގަޅު އިންސާނެކެވެ. އަދި ޖިއާނާ ފަދަ ރަނގަޅު ދަރިއެއް ހުރުމަކީ ފްލޮއިދް ގެ ހިތްހެޔޮކަން ދައްކުވައިދޭ ހެއްކެއްކަމަށް ރޮކްސީ ބުނެފައި ވެއެވެ.
ޖޯޖް ފްލޮއިޑްގެ މަރުގެ މި ހާދިސާ ހިނގައިދިޔައީ އެމެރިކާގެ މިނިއާޕޮލިސް ގައެވެ. މަންޒަރު ބަލަން ހުރި މީހަކު ސޯޝަލް މީޑިއާއަށް ދޫކޮށްލާފައިވާ ވީޑިއޯއަކުން، ދޮން ނަސްލުގެ ފުލުހަކު، ޑެރެކް ޝޯވިން، ފްލޮއިޑް ގެ ކަނދުރާ މައްޗަށް ކަކޫ ލައިގެން ހުންނަ މަންޒަރު ފެނެ އެވެ. އަދި އޭނާ ބިންމަތީގައި އޮވެގެން ނޭވާ ނުލެވިގެން، އަހަަންނަކަށް ނޭވާ ނުލެވެޔޭ ބުނާ އަޑު ދެތިން ފަހަރަކު އިިވެ އެވެ.
މަންޒަރު ބަލަން ތިބި މީހުން ފްލޮއިޑް އަށް ނޭވާ ނުލެވޭ ކަމަށް ބުނުމުން ވެސް، ފުލުސް މީހާ އަޅާ ވެސް ނުލަ އެވެ. ފްލޮއިޑް ނޭވާ ހާސްވެގެން އާދޭސް ކުރިއިރު، އޭނާ އޮތީ އަނގަވަތަށް، ފަހަތަށް ބިޑި އަޅުވާފަ އެވެ. އެތަނުން އެމްބިއުލާންސެއްގައި ހޮސްޕިޓަލަށް ގެންދިޔަ އިރުވެސް، ފްލޮއިޑް މަރުވެފައިވާ ކަމަށް ޑޮކްޓަރުން ވަނީ ހާމަކޮށްފަ އެވެ.
