ޖުމްހޫރީ ޕާޓީގެ ލީޑަރު ގާސިމް އިބާރާހިމް ހައްޔަރުކުރުމުން ސީދާ ހަރަކާތަށް ނުކުތުމަށް އިދިކޮޅު އެންމެ ބޮޑު ދެ ޕާޓީ ކަމުގައިވާ އެމްޑީޕީ އާއި ޖޭޕީ އަދާލަތު ޕާޓީން ބުރާސްފަތި ދުވަހުގެ ރޭ ނިންމައިފި އެވެ.
އެމްޑީޕީގެ ހަރުގޭގައި ބޭއްވި އެ ޕާޓީގެ ގައުމީ މަޖިލީހުގެ ކުއްލި ބައްދަލުވުމަށް، ގައުމީ މަޖިލީހުގެ ނޮޅިވަރަމް ދާއިރާގެ މެމްބަރު އިބްރާހިމް ވަހީދު ހުށަހަޅުއްވި ގަރާރު ފާސްކުރީ ބައްދަލުވުމުގެ ބައިވެރީންގެ އިއްތިފާގު ވޯޓުންނެވެ. އެ ގަރާރުގައި ބުނެފައިވާ ގޮތުގައި ގާސިމް އިބްރާހިމްގެ މައްޗަށް ތުހްމަތުކޮށްފައިވަނީ އަސްލެއް ނެތް ކަންކަން ކަމަށާއި އެއީ ސިޔާސީ މަގުސަދެއްގައި ކުރި ހައްޔަރެއް ކަމަށެވެ.
ގަރާރުގެ ބަހުސްގައި ރައްޔިތުންގެ މަޖިލީހުގެ މާފަންނު ހުޅަނގު ދައިރާގެ މެންބަރު މުހައްމަދު ފަލާހު ވިދާޅުވީ ސީދާ ހަރަކާތުން ކަންކަން ކާމިޔާބު ކުރާނެ ކަމަށާެއި، ސިޔާސީ ހައްޔަރީންނާއި ވެރިން ސަލާމަތް ކުރުމަށް މަސައްކަތް ކުރާނެކަމަށެވެ.
ގާރާރަށް ބަހުސް ކުރައްވަމުން މާފަންނު އުތުރު ދާއިރާގެ މެންބަރު، އިމްތިޔާޒް ފަހުމީ ވިދާޅުވީ، ގާސިމް އިބްރާހިމްގެ ހައްޔަރަކީ އެއްވެސް މީހެއް ގަބޫލު ކުރާނެ ހައްޔަރެއްކަމަށާއި، އެއްވެސް އަސާސެއްގެ މައްޗަށް ހިންގި ކަމެއް ނޫންކަމަށެެވެ.
މި ޖަލްސާގައި ވާހަކަ ދެއްކެވި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސާ ވިދާޅުވީ، ފެނިގެން މި ދަނީ، ރައީސް ޔާމީނުގެ ވެރިކަން ނޭވާ ހޮޅިޔަށް އެޅޭ މަންޒަރުކަމަށެވެ. އަދި ކުޑަ ދުވަސް ކޮޅެއްގެ ތެރޭގައި ރައީސް ޔާމީން ބަލި ކުރާނެކަމަށް އޭނާ ވިދާޅުވިއެވެ. އީސަ ވިދާޅުވީ، ސީދާހަރަކާތަށް މިހާރުވެސް ނުކުތުމަށް ތައްޔާރަށް ހުންނެވިކަމަށާއި، ގާސިމް އިބްރާހިމް އާއި އެކު ދޫނިދޫއަށް ދާން ތައްޔާރަށް ހުންނެވިކަމަށެވެ.
"އަޅުގަނޑު މި އައީ ގާސިމާއެކު ޖަލަށް ދާން ތައްޔާރުވެގެން. އަޅުގަނޑުގެ އާއިލާއށް ކުރަން ޖެހޭ ވަސިއްޔަތެއްކޮށް، ފޯނުގައި ހުރި، މުހިއްމު މައުލޫމާތު ރައްކާކޮށްފައި މިއައީ، އަޅުގަޑު އެއްވެސް ޖެހިލުމެއް ނުވޭ.ހަމަ ހަގީގަތުގައިވެސް. މި ވެރިކަން ބަދަލު ކުރަން ޖެހޭ. ރައްޔިތުންގެ ވެރިކަން މިއަދު ދިފާއުކުރަން ޖެހޭ" އީސަ ވިދާޅުވިއެވެ.
އީސަ ވިދާޅުވިގޮތުގައި، ދުވަހަކުވެސް ހައްޔަރުވާން ތައްޔާރު ނުވާ ވަރަށް މިއަދު ހުރީ ހައްޔަރުވާން ތައްޔާރަށެވެ.
ޖުމްހޫރީ ޕާޓީން ބުނި ގޮތުގައި ގާސިމާއި ސިޔާސީ ކުށްވެރިން މިނިވަންކޮށް ގައުމު އިސްލާހުކުރުމަށްޓަކައި ސީދާ ހަރަކާތަށް ނުކުތުމަށް ފާސްކުރީ އެ ޕާޓީގެ ހިންގާ ކޮމިޓީން ކަމަށެވެ.
އެ ޕާޓީގެ ގައުމީ ހިންގާ ކޮމިޓީން ނިންމާފައިވަނީ ސީދާ ހަރަކާތަށް ނުކުތުމާއި ކުރަންޖެހޭ އެންމެހާ ކަންކަން ކުރުމަށާއި ގުޅިފައިވާ ޕާޓީތަކުން ކުރަމުން ގެންދާ އިސްލާހީ މަސައްކަތްތައް ހުއްޓާނުލައި ކުރިއަށެވެ.
ޖޭޕީން ނެރުނު ބަޔާނުގައި ބުނެފައިވަނީ މާފަންނު ވިލާގައި ހުންނަވަނިކޮށް ގާސިމް އިބްރާޙިމް ހައްޔަރުކުރިއިރު، އާއިލާގެ ބޭފުޅަކާ ބައްދަލުކުރައްވަން ވެސް ފުރުސަތު ނުދެއްވާ ކަމަށެވެ. ގާސިމް ކުއްލި ގޮތަކަށް ކޯޓް އަމުރެއްގެ ދަށުން ހައްޔަރުކުރީ، އެ މަނިކުފާނު ކުރައްވަމުން ގެންދަވާ ސިޔާސީ ހަރަކާތްތަކަށް ހުރަސް އަޅައި އެ މަނިކުފާނާއި އެހެން ސިޔާސީ ޕާޓީތަކުގެ ލީޑަރުން ގުޅިގެން ހިންގަމުންދާ ސިޔާސީ އިސްލާހީ މަސައްކަތަކަށް ހުރަސް އެޅުމުގެ ގޮތުން ކަމަށެވެ.
"މި ނާތަހުޒީބީ އަމަލު އެންމެ ހަރުކަށި އިބާރާތުން ކުށްވެރިކުރަމެވެ،" ޖޭޕީގެ ބަޔާނުގައިވެ އެވެ.
ގާސިމް ދޫކޮށްލުމަށް ޖޭޕީން ވަނީ ގޮވާލައިފަ އެވެ.
ޖޭޕީ އާއި އެމްޑީޕީން ސީދާ ހަރަކާތަށް ދިއުމަށް ނިންމާފައި ވަނިކޮށް، އަދާލަތު ޕާޓީން ވެސް ވަނީ ސާިދާ ހަރަކާތަށް ނުކުތުމަށް ނިންމައިފަ އެވެ. ގާސިމް ހައްޔަރު ކުރުމަކީ ފިނޑި އަމަލެއް ކަމަށާއި އޭނާ ހައްޔަރުކުރީ ސިޔާސީ ނުފޫޒު ފޯރުވައިގެން ކަމަށެވެ.
Press Release: Jumhooree Partyge leader hayyaru kurumaai gulhey! pic.twitter.com/XUWZZSodfY
— Adhaalath Party (@AdhaalathOffice) April 6, 2017
ގާސިމް އިބްރާހިމް ހައްޔަރުމިކުރީ ރައްޔިތުންގެ މަޖިލީހުގެ ނައިބު ރައީސް ރީކޯ މޫސާ މަނިކުގެ އިތުބާރު ނެތްކަމުގެ މައްސަލަ އަންގާރަ ދުވަހަށް ތާވަލުކޮށްފައި ވަނިކޮށެވެ. އިދިކޮޅު ފަރާތްތަކުން ބުނެފައިވަނީ މަޖިލީހުގެ ނައިބު ރައީސްގެ އިތުބާރު ނެތްކަމަށް ފާސްކުރާނެ ކަމަށެވެ.
