ވަގަށް ނަގާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާން އަބްދުﷲ ގެ މައްސަލައިގެ ތަހުގީގު ކުރިއަށްދާ ގޮތާއި، ހޯދުނު ކަންތައްތަކަކާ ގުޅޭ ގޮތުން ފުލުހުން އެއްވެސް މައުލޫމާތު ހާމަނުކުރާތާ އަހަރެއް ވެއްޖެ އެވެ.

ރިލްވާން ވަގަށް ނެގީ 2014 ވަނަ އަހަރުގެ އޯގަސްޓް 8 ވަނަ ދުވަހުގެ ރޭ އެވެ. އެންމެ ފަހުން އޭނާ ފެނިފައިވަނީ ހުޅުމާލޭ ފެރީ ޓާމިނަލުންނެެވެ. ވީނުވީއެއް ނޭނގި އޭނާ ގެއްލުނު އިރު ލައިގެން ހުރީ ކަޅު ގަމީހަކާއި، ކަޅު ފަޓުލޫނެކެވެ.

ރިލްވާނު ވަގަށް ނެގިތާ ދެ އަހަރާއި ހަ މަސް ދުވަހަށް ވުރެ ގިނަ ދުވަސް ވެފައިވާއިރު، އެ މައްސަލައާ ގުޅޭ ގޮތުން އެންމެ ފަހުން ފުލުހުން މައުލޫމާތު ހާމަކޮށްފައިވަނީ މިދިޔަ އަހަރުގެ އޭޕްރީލް 2 ވަނަ ދުވަހު އެވެ.

މިދިޔަ އަހަރުގެ އޭޕްރީލް 2 ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި އާންމުކޮށްފައިވާ މައުލޫމާތުތަކަށް ބަލާއިރު، ހުޅުމާލެއިން ރިލްވާން ވަގަށް ނަގައިގެން އަރުވާފައިވަނީ ރަތް ކުލައިގެ ކާރަކަށެވެ. އެ ކާރުން ފެނުނު އިސްތަށިތަކުން ރިލްވާންގެ މަންމަގެ ޑީއެންއޭ ވަނީ ފެނިފަ އެވެ. އަދި ރިލްވާނަށް މާލެއިން ފެށިގެން ބަޔަކު މީހުން ފާރަލި ކަމަށް ވެސް ފުލުހުން ބުނެފައިވާއިރު، މި މައްސަލައާ ގުޅިގެން ފުލުހުން ހައްޔަރުކުރި އެންމެން ވެސް ވަނީ ދޫކޮށްލާފަ އެވެ.

އެ ބައްދަލުވުމުގައި ފުލުހުންގެ ސުޕްރިންޓެންޑެންޓް އަބްދުﷲ ޝަތީހު ވިދާޅުވީ ރިލްވާނު ވަގަށް ނެގި ރޭ ދަންވަރު އޭނާ ދިރިއުޅެމުންދިޔަ ފްލެޓް ކައިރިން ވަރަށް ބާރަށް މީހަކު ދެތިން ފަހަރު ހަޅޭއްލަވައިގަތް އަޑު ބަޔަކަށް އިވިފައިވާ ކަމަށާއި އަދި ފުލެޓު ކަންމަތިން ކާނޭޝަން މަގާވީ ކޮޅަށް ރަތް ކުލައިގެ ކާރެއް ދަތުރު ކުރަމުން ދިޔަކަމަށެވެ. އަދި އޭރު އެކާރު ވައަތް ފަރާތު ފަހަތު ދޮރު ހުޅުވާފައި ހުރި ކަމަށާއި އަދި އެދޮރާއި ދިމާލުން ކާރު ތެރެއިން އަތެއް ހޫރަނިކޮށް ބަޔަކަށް ފެނިފައިވާ ކަމަށް ޝަތީހު ވިދާޅުވި އެވެ.

ޝަތީހު ވިދާޅުވީ އެ ކާރު ފެނުނު ސަރަހައްދުން ބެނެޓް ވަޅިއެއް ފެނިފައިވާ ކަމަށާއި އެ ވަޅި ފުލުހުންގެ ބެލުމުގެ ދަށަށް ގެންގޮސް ފޮރެންސިކް ތަހުލީލުތަކަށް ފޮނުވި ކަމަށެވެ. ނަމަވެސް، އެ ވަޅިން މާއްދީ އެއްވެސް ހެއްކެއް ލިބިފައިނުވާ ކަމަށް އޭނާ ވިދާޅުވި އެވެ.

ޝަތީހު ވިދާޅުވި ގޮތުގައި ރިލްވާންގެ ޑީއެންއޭ ފެނުނު ކާރަކީ ހ. ހިލްޓަން، އާލިފް ރައޫފްގެ ކާރެކެވެ. އަދި ރިލްވާނަށް މާލެއިން ފާރަލި މީހުންގެ ތެރޭގައި އައްޑޫ ސިޓީ ހުޅުދޫ، އަތިރިއާގޭ މުހައްމަދު ސުއައިދު ހިމެނޭ ކަމަށް ވެސް އޭނާ ވިދާޅުވި އެވެ.

ރިލްވާނުގެ މައްސަލައާ ގުޅިގެން 2015 ވަނަ އަހަރުގެ ތެރޭގައި ސުއައިދު ހައްޔަރުކުރި އެވެ. ނަމަވެސް، ހެކި ނުލިބޭ ކަމަށް ބުނެ އޭނާ ދޫކޮށްލިއިރު، ސީރިއާގައި ހިނގަމުންދާ ހަނގުރާމައިގައި އޭނާ މަރުވެފައިވާ ކަމަށް އަޑުތައް ވަނީ ފެތުރިފަ އެވެ.

ކުރީގެ ހޯމް މިނިސްޓަރު އުމަރު ނަސީރު ވިދާޅުވެފައިވާ ގޮތުގައި ރިލްވާން ގެއްލުނު މައްސަލައިގެ ތަހުގީގުގައި އެންމެ ބޮޑަށް ތުހުމަތު ކުރެވޭ މީހަކީ ޑރ. އަފްރާޝީމް އަލީ އަވަހާރަކޮށްލި މައްސަލައިގެ ތުހުމަތުގައި ވެސް ހައްޔަރުކުރި، ހ. ހިލްޓަން އަޒްލިިފް ރައޫފެވެ.

ސީރިއާ ހަނގުރާމާގައި އަޒްލިފް ވެސް މަރުވެފައިވާ ކަމަށް އަޑުފެތުރިފައިވާއިރު، އޭނާ މަރުވެފައި އޮތްވާ ނަގާފައިވާ ފޮޓޯތަކެއް ކަމަށް ބުނާ ފޮޓޯތަކެއް ވެސް ސޯޝަލް މީޑިއާގައި ދައުރުވި އެވެ.  

ރިލްވާނުގެ މައްސަލައާ ގުޅޭގޮތުން ބުރާސްފަތި ދުވަހު ވެސް ފުލުހުން، ބުނީ އާންމުކޮށް ބުނަމުންދާ ބަސްތަކެވެ. އެގޮތުން މައްސަލަ ތަހުގީގުކުރަމުންދާ ކަމަށާއި، ތަހުގީގާ ގުޅޭ މައުލޫމާތު ހާމަކުރެވެން އޮތް މިންވަރަކުން ހާމަކުރަމުންދާނެ ކަމަށެވެ.