ޚާއްސަ އުސޫލުތައް ހިނގާ ހާލަތްތަކުގައި ދައުވާގެ މުއްދަތު ނުހިނގާ ގޮތަށް ޖިނާއީ އިޖުރާއަތުގެ ޤާނޫނަށް ގެންނަން ހުށައަޅާފައިވާ އިސްލާހަށް ތާއީދު ކުރައްވާކަމަށް ޖުޑީޝަލް އެޑްމިނިސްޓްރޭޓަރ ޑރ އަބްދުﷲ ނަޒީރް ވިދާޅުވެއްޖެއެވެ.

ހޯމަ ދުވަހުގެރޭ ރާއްޖެޓީވީގެ ކޮވިޑް-19 ކަވަރޭޖަށް ދެއްވި އިންޓަރވިއުއެއްގައި ނަޒީރް ވިދާޅުވީ، ޖިނާއީ އިޖުރާއަތުގެ ޤާނޫނަށް ސަރުކާރުގެ ފަރާތުން މަޖިލީހަށް ހުށައަޅާފައިވާ އިސްލާޙަކީ ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިންވެސް ބޭނުންވާ އިސްލާޙެއް ކަމަށެވެ. އެގޮތުން ދައުވާލިބޭ މީހާގެ ޝަރީއަތް ހިނގަންޖެހެނީ ފަނޑިޔާރެއްގެ ކުރިމަތީގައިކަން ޤާނޫނު އަސާސީންވެސް ލާޒިމު ކޮށްފައިވާކަން ފާހަގަ ކުރައްވައި ނަޒީރް ވިދާޅުވީ، އެ ޙައްޤު ލިބިގަތުމާއި ދޫކޮށްލުމުގެ އިހުތިޔާރު ދައުވާލިބޭ މީހާއަށް ލިބިގެންވާ ކަމަށެވެ.

އަދި ޖިނާއީ އިޖުރާއަތުގެ ޤާނޫނަށް ހުށައަޅާފައި މިވާ އިސްލާޙަކީ ވީޑިއޯ ކޮންފަރެންސް މެދުވެރިކޮށް ފަނޑިޔާރެއްގެ ކުރިމަތީގައި ޝަރީއަތް ހިންގޭނެ މަގު ޤާނޫނުގެ ތެރެއިން ފަހިކޮށްދޭނެ އިސްލާޙެއްކަމަށް ވިދާޅުވިއެވެ.

ސުޕީރިއާރ ކޯޓުތަކުގައިވެސް ވީޑިއޯ ކޮންފަރެންސް މެދުވެރިކޮށް ޝަރީއަތްތައް ކުރިއަށް ގެންދެވޭނެ އިންތިޒާމް ހަމަޖެހިފައިވާކަން ފާހަގަ ކުރައްވައި ނަޒީރް ވިދާޅުވީ، ރާއްޖޭގެ 132 މެޖިސްޓްރޭޓް ކޯޓުގައި އޯޑިއޯ ކޮންފަރެންސް ސިސްޓަމް ބެހެއްޓިފައިވާ ކަމަށާއި، 101 ކޯޓުގައި ވިޓްނަސް އެންޑް ވިކްޓިމް ޕްރޮޓެކްޝަން ސިސްޓަމްތަކާއި ވީޑިއޯ ކޮންފަރެންސް ސިސްޓަމްތައް ބެހެއްޓިފައިވާކަމަށެވެ.

އޭގެ އިތުރުން، ރާއްޖޭގައި މެޖިސްޓްރޭޓެއް ނެތް 79 ކޯޓު އެބަހުރި ކަމަށާއި، މެޖިސްޓްރޭޓަކު ކަނޑައެޅިފައިވަނީ 109 ކޯޓުގައިކަން ފާހަގަ ކުރައްވައި ނަޒީރް އިތުރަށް ވިދާޅުވީ، މެޖިސްޓްރޭޓް ނެތް ކޯޓުތަކަށް ދަތުރު ކުރައްވައި ޝަރީއަތްތަކުގެ ކަންކަން ކުރިއަށް ގެންދަނީ އެ މެޖިސްޓްރޭޓުން ބޭނުން ކޮށްގެން ކަމަށެވެ.

ނަޒީރް އެހެން ވިދާޅުވެފައިވާއިރު، ފާއިތުވި އަހަރު މިފަދަ ދަތުރުތަކަށް ޕީޖީ އޮފީހުން އެކަނި ކޮށްފައިވާ ޚަރަދުތަކުގެ ޖުމުލަ އަދަދުވެސް 3،131،607.39 ( ތިން މިލިއަން އެއްލައްކަ ތިރީސް އެއްހާސް ހަސަތޭކަ ހަތް ރުފިޔާ ތިރީސް ނުވަ ލާރިއަށް) އަރާ ކަމަށް ޕީޖީ އޮފީހުގެ ތަފާސްހިސާބުތަކުން ވަނީ ދައްކާފައެވެ. އެއާއެކު ވީޑިއޯ ކޮންފެރެންސް މެދުވެރިކޮށް ޝަރީޢަތް ކުރިޔަށް ގެންދިޔުމުގެ މަގު ފަހިވެގެންދާގޮތަށް ހުށައެޅި މި އިސްލާޙު ފާސްވެއްޖެނަމަ ޚަރަދު ކުޑަކުރެވޭނެކަން ޕީޖީ ހުސައިން ޝަމީމްވެސް ވަނީ ފާހަގަ ކުރައްވާފައެވެ.

ސަރުކާރުގެ ފަރާތުން މި ބިލު މަޖިލީހަށް ހުށަހަޅުއްވަމުން ފޮނަދޫ ދާއިރާގެ މެންބަރު މޫސާ ސިރާޖު ވަނީ މި އިޞްލާޙުގެ ދަށުން ވީޑިއޯ ކޮންފެރެންސް މެދުވެރިކޮށް ޝަރީޢަތް ކުރިޔަށް ގެންދިޔުމުގެ މަގު ފަހިވެގެންދާނެކަން ފާހަގަ ކުރައްވާފައެވެ.