ސެޓްފިކެޓް ލިބުން ލަސްވާ ކުދިންނަށް ނަތީޖާގެ ޓްރާންސްކްރިޕްޓާއެކު މަތީ ތައުލީމުގެ ފުރުސަތަށް ހުށައެޅޭނެކަމަށް މިނިސްޓްރީ އޮފް އެޑިއުކޭޝަނުން ބުނެފިއެވެ.
ބުރާސްފަތި ދުވަހު އެޑިއުކޭޝަން މިނިސްޓްރީން ނެރުނު އިޢުލާނެއްގައި ބުނީ، މިދިޔަ އަހަރުގެ އޮކްޓޯބަރ/ނޮވެންބަރު ގައި އޭލެވެލް އަދި އޯލެވެލް އިމްތިޙާނު ހެދި ދަރިވަރުންނަށް ސެޓްފިކެޓުތައް ނުލިބި ލަސްވާކަމުގެ ޝަކުވާތަކެއް ހުށައެޅިފައިވާ ކަމަށެވެ. އެގޮތުން ސެޓްފިކެޓުތައް ޕްރިންޓް ކުރާނީ ރީޗެކް މަރުޙަލާ ނިމި ދަރިވަރުންގެ ނަތީޖާ ކަށަވަރު ވުމުންކަން ފާހަގަކޮށް މިނިސްޓްރީން ބުނީ، ސެޓްފިކެޓުތައް ތައްޔާރުކުރާ ޤައުމުތަކުގެ ބޯޑަރުވެސް ބަންދުކޮށްފައިުވުމާއެކު، އެކަމުގައި ދަތިތަކެއް ކުރިމަތިވެފައިވާ ކަމަށެވެ.
މިނިސްޓްރީން ބުނީ، ސެޓްފިކެޓުތައް ލިބުނުހާ އަވަހަކަށް ދަރިވަރުންނަށް ދޫކުރުމުގެ އިންތިޒާމު ހަމަޖައްސަވާނެ ކަމަށާއި، ނަމަވެސް އޭގެ ކުރިން މަތީ ތައުލީމުގެ ފުރުސަތަށް އެދި ހުށައަޅަން ބޭނުންނަމަ އެ ފުރުސަތު ހުޅުވާލެވިފައިވާ ކަމަށެވެ. އެގޮތުން މިހާރު ދޫކޮށްފައިވާ ނަތީޖާ ސްކްރިޕްޓް ހުށައެޅިދާނެ ކަމަށް މިނިސްޓްރީން ބުނެއެވެ.
އޭގެ އިތުރުން، ނަތީޖާ ކަށަވަރު ކުރުމަށް އިތުރު ލިއުމެއް ބޭނުންވާނަމަ ޑިޕާރޓްމަންޓް އޮފް ޕަބްލިކް އެގްޒެމިނޭޝަނަށް މެއިލްއަކުން ހުށައެޅުމުން އެފަދަ ލިޔުން ލިބޭނެ އިންތިޒާމު ހަމަޖެހިފައިވާ ކަމަށް މިނިސްޓްރީން ބުނެއެވެ.
