ދައުލަތުގެ އާމްދަނީ އިތުރުކުރުމަށް އަޅާ ފިޔަވަޅުތަކުގެ ސަބަބުން ކުދި އަދި މެދު ފަންތީގެ ވިޔަފާރިތަކަށް ކުރާނެ އަސަރު ދެނެގަނެ، އޭގެ ތަފުސީލު ރައްޔިތުން މަޖިލީހަށް ހުށަހެޅުމަށް ފިނޭންސް މިނިސްޓްރީއަށް ދެންނެވުމަށް މާލިއްޔަތު ކޮމެޓީން ނިންމައިފި އެވެ.

ކޮވިޑް-19 އާގުޅިގެން މަލީގޮތުން ދިވެހިރާއްޖެއަށް ކުރާނެ އަސަރުތަކާއި އަދި ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަދި އެމްޑީޕީ ޕާލަމެންޓްރީ ގްރޫޕްގެ ލީޑަރ އަލީ އާޒިމް ހުށަހަޅުއްވާފައިވާ މައްސަލާގައި މާލިއްޔަތު ކޮމެޓީގެ ދާއިރާގެ ތެރޭގައި ހިމެނޭ ކަންތައްތައް ދިރާސާކޮށް ނިންމިގޮތުގެ ރިޕޯޓުގައި 19 ހުށަހެޅުމެއް ހިމެނެ އެެވެ.

އެގޮތުން، ދިވެހިރާއްޖެއަަށް މިވަގުތު ދިމާވެފައިވާ އިގްތިޞާދީ ހީނަރުކަމުން އަރައިގަތުމަށާއި، ދައުލަތުގެ ޚަރަދުތައް ފޫބެއްދުމަށް ނަގާފައިވާ ދަރަންޏާއި، ފައިސާ ސާޕްލައި އިތުރުކޮށްފައިވާ މިންވަރަށް ބަލައި އާމްދަނީ އިތުރުކުރުމަށް މަސައްކަތްކުރަން ޖެހިފައިވާ ކަމަށެވެ. މި އާމްދަނީ ހޯދުމަށް ޓެކްސް ރޭޓުތައް ބަދަލުކޮށް، ޓެކްސް ބޭސް ފުޅާކޮށް، ޔޫޒަރ ފީތައް ނެގުމަށާއި، ފީތައް ބޮޑުކުރުން ފަދަ ކަންތައްތައް ކުރުމަށް ގަސްދު ކުރާނަމަ، އާމްދަނީ އިތުރުކުރުމަށް އަޅުއްވަން ގަސްދުކުރައްވާ ކަންތައްތަކުގެ ޕްލޭނެއް އެކުލަވާލައި، މީގެ ސަބަބުން ރައްޔިތުން ރައްޔިތުންނާއި، ކުދި އަދި މެދުފަންތީގެ ވިޔަފާރިތަކަށް ކުރާނެ އަސަރު ދެނެގަނެ، އޭގެ ތަފްސީލް ރައްޔިތުންގެ މަޖިލީހަށް ހުށަހެޅުމަށް ފިނޭންސް މިނިސްޓްރީއަށް ދެންނެވުން ހިމެނެއެވެ.

މީގެއިތުރުން، ދައުލަތަށް 2020 ވަނަ އަހަރު ލިބޭނެ ކަމަށް އަންދާޒާ ކޮށްފައިވާ އަދަދުގެ ދެބައިކުޅަ އެއްބަޔަށްވުރެ ބޮޑަށް ދަށްވެފައި ވާއިރު، މި ކާރިޘާއިން އަރައިގަތުމަށް، ދައުލަތުގެ ހުރިހާ އޮފީސްތަކާއި، ރައްޔިތުންގެ މަޖިލީހާއި ސަރުކާރު ހިއްސާވާ ހުރިހާ ކުންފުނިތަކުން ސަރުކާރަށް އެއްބާރުލުން ދެއްވުމަށް ދެންނެވުމަށްވެސް ކޮމެޓީން ހުށަހަޅާފައި ވެއެވެ.

ޖުމުލަ ގޮތެއްގައި، އާމްދަނީ ދަށްވާ މިންވަރު، އިމްޕޯޓު ދަށްވާ މިންވަރަށްވުރެ މަތިވާނެކަމަށް ބެލެވޭތީ، އެކްސްޗޭންޖް ރޭޓު ދެމެހެއްޓުމަށް ރިޒާވުން ހޭދަ ކުރާ މިންވަރު އިތުރުވާނެކަމަށް ބެލެވޭ ކަމަށެވެ. އިތުރު ބޭރު ފައިސާގެ އާމްދަނީ ނުލިބި، އިތުރަށް ޚަރަދުކުރަން ޖެހުމުން ބޭރު ފައިސާގެ ރިޒާވް ދަށްވެ، ދައުލަތުގެ ރިޒާވަށް އަންނަ ދަތިކަން އިތުރުވެ، އެކްސްޗޭންޖް ރޭޓަށް އޮންނަ ޕްރެޝަރު ބޮޑުވާނެތީ، މި ޕްރެޝަރު ކުޑަކުރުމަށް ސަރުކާރުންނާއި، މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އަޅާ ފިޔަވަޅުތަކާއި، ބޭނުންކުރާ ވަސީލަތްތަކާއި ގުޅޭ މައުލޫމާތު މާލިއްޔަތު ކޮމެޓީއަށް ހިއްސާކުރުމަށް ދެންނެވުމަށް ވެސް މާލިއްޔަތު ކޮމެޓީގެ ހުށަހެޅުމެއްގައި ވެއެވެ.

މީގެއިތުރުން. ސަރުކާރުން ހިލޭ އެހީއާއި ދަރަނީގެ ގޮތުގައި ބޭރު ފައިސާ ހޯދުމަށް ކުރާ މަސައްކަތުގެ ތަފުސީލު މާލިއްޔަތު ކޮމެޓީއަށް ހިއްސާކޮށް ދެއްވުމަށް އެ ކޮމެޓީން އެދިފައި ވެއެވެ. އަދި ބަޖެޓު ޑެފިސިޓް ކުޑަކުރުމަށްޓަކައި އަޅާ ފިޔަވަޅުތަކުގެ ތަފުސީލު އަދި ލިބޭނެ ކަމަށް އަންދާޒާ ކުރާ އާމްދަނީގެ ތަފުސީލު އަދި ފައިނޭސިންގ ގެޕް ފޫބައްދާނެ ގޮތުގެ ތަފުސީލު ފޮނުއްވުމަށް ފިނޭންސް މިނިސްޓްރީއަށް ދެންނެވުމަށް ވެސް މަޖިލީހުގެ މާލިއްޔަތު ކޮމެޓީގެ ރިޕޯޓުގައި ވެއެވެ.

މާލިއްޔަތު ކޮމެޓީގެ މި ރިޕޯޓަށް މަޖިލީހުގެ ގިނަ މެންބަރުން ބަހުޘް ކުރައްވާފައި ވާއިރު، ރާއްޖޭގެ އިގްތިޞާދާ މެދު ގިނަ މެންބަރުން ކަންބޮޑުވުން ފާޅުކުރައްވައި، އިގްތިޞާދު ރަނގަޅު ކުރުމަށް ކުރެވޭނެ ކަންކަމާމެދު ބަހުޘް ކުރައްވާފައި ވެއެވެ.