ރާއްޖެއަށް ކުރިމަތިވެފައިވާ ކޮވިޑްގެ ބަލިމަޑުކަން ރޯދަ މަހާ އެކީ ނިމިގެންދާނެ ކަމަށް ދިވެހި ރާއްޖޭގެ ގައުމީ ޔުނިވަސިޓީގެ ޗާންސެލަރ ޑރ. ހަސަން ހަމީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކަ ކޮމިޓީގެ ބައްދަލުވުމުގައި ހޯމަ ދުވަހުގެ ރޭ ވާހަކަފުޅު ދައްކަވަމުން ޑރ. ހަސަން ހަމީދު ވިދާޅުވީ، މި ބަލިމަޑު ކަމާ މެދު ނާއުއްމީދީ ގޮތަކަށް ނުދެކުމަށެވެ.
ޑރ. ހަސަން ހަމީދު ވިދާޅުވީ ގިނަ ބަޔަކަށް ކޮވިޑްގެ ކަންތައްތައް ވަރަށް ދިގުލައި ހިނގައިދާނެ ކަމަށް ހީވެފައި ވިޔަސް ދުނިޔޭގެ ކަންތައްތައް ހިނގާ ގޮތައް ބަލައިފިނަމަ މިކަން އެންމެ ކާމިޔާބު ކޮށް ކޮންޓްރޯލް ކުރި ނިއުޒިލޭންޑުގައި ހޯމަ ދުވަހު ޔުނީފޯމުގައި ހުރިހާ ކުދިން އަނބުރާ ސްކޫލަށް ގޮސްފި ކަމުގައެވެ.
ޑރ. ހަސަން ވިދާޅުވީ، ނިއުޒޭލެންޑުން ލޮކްޑައުން ގައި ހޭދަ ކުރީ 49 ދުވަސް ކަމަށެވެ. އެހެން ކަމުން، މި އުއްމީދީ ސިނާރިއޯ އިން ބަލައިފި ނަމަ، ރާއްޖޭން ލޮކްޑައުން ކުރީ އޭޕްރީލް މަހުގެ 15 ވަނަ ދުވަހު ކަމަށް ވުމާއެކު، ރާއްޖެއަށް މިކަމުން ޖޫން މަހުގެ 3 ވަނަ ދުވަހާ ހަމައިން އަރައި ގަނެވޭނެ ކަމަށް ލަފާ ކުރެއްވޭ ކަމުގައެވެ.
ގިނަ ބަޔަކަށް ހީވެފައި އޮންނަނީ ކޮވިޑްގެ ކަންތައްތައް ވަރަށް ދިގުލައި ހިނގައިދާނެ ކަމަށް ވިޔަސް ދުނިޔޭގެ ކަންތައްތައް ހިނގާ ގޮތައް ބަލައިފިނަމަ އެނގިވަޑައިގަންނަވާނެ މިކަން އެންމެ ކާމިޔާބު ކޮށް ކޮންޓްރޯލް ކުރި ނިއުޒިލޭންޑުގައި މި އަދު މި ހޯމަ ދުވަހު ކުދިން ޔުނީފޯމުގައި ހުރިހާ ސްކޫލް ކުދިން އަނބުރާ ސްކޫލަށް ގޮސްފި. ނިއުޒޭލެންޑުން ލޮކްޑައުން ގައި ހޭދަ ކުރީ 49 ދުވަސް...އަޅުގަނޑުމެން ލޮކްޑައުން މިކުރީ އޭޕްރީލް މަހުގެ 15 ވަނަ ދުވަހު، އެހެން ވީމާ އެންމެ އަވަހަށް އަޅުގަނޑުމެންނަށް މިކަމުން އަރައި ގަނެވޭނެ ކަމަށް ލަފާ ކުރެވޭ ޖޫން މަހުގެ 3 ވަނަ ދުވަހު.ޗާންސެލަރ ޑރ. ހަސަން ހަމީދު
އެންމެ ނާއުއްމީދީ ގޮތައް މިކަން ބެލި ކަމުގައި ވިޔަސް، އިޓަލީގެ ތަޖުރިބާ އިން މިސާލު ދައްކަވަމުން ޑރ. ހަސަން ހަމީދު ވިދާޅުވީ، ޖުލައި މަހުގެ 1އާ ހަމައިން މިކަމުން ސަލާމަތް ވެވޭނެ ކަމަށް ދެކެވަޑައިގަންނަވާ ކަމުގައެވެ. ޑރ. ހަސަން ހަމީދު ވިދާޅުވީ، އިޓަލީން ލޮކްޑައުންގައި ހޭދަ ކޮށްފައިވަނީ، 76 ދުވަހުގެ މުއްދަތެއް ކަމުގައެވެ.
އެންމެ ގިނަ ދުވަހު ލޮކްޑައުން ކޮށްފައި އޮތީ އިޓަލީ ވިލާތް. އިޓަލީން ލޮކްޑައުން ނިންމާލީ 76 ދުވަހުން. އަޅުގަނޑުމެން އޭޕްރީލް 15ން ފަށައިގެން 76 ދުވަސް ގުނައިފިއްޔާ އަންނާނީ ޖުލައި މަހުގެ 1 އާ ހަމައަށް. އެހެންވީމާ ޖުލައި މަހުގެ 1އާ ހަމަ އިން މި ލޮކްޑައުން ނިމޭނެ. އެއީ އެންމެ މާޔޫސީ ގޮތައް ވިސްނާއިރު. އެންމެ އުއްމީދީ ގޮތަށް ވިސްނާ ކަމުގައި ވަނީ ވިއްޔާ ހަގީގަތުގައި އީދު ދުވަސް އައުމާ އެކީގައި މިކަން ނިމިގެން ދާނެ."ޗާންސެލަރ ޑރ. ހަސަން ހަމީދު
ބަލީގެ ހާލަތުން ރާއްޖެ އަރައިގަތުމާ ބެހޭ ގޮތުން އިތުރަށް ވާހަކަފުޅު ދައްކަވަމުން ޑރ. ހަސަން ހަމީދު ވިދާޅުވީ، ބައެއް ފަރާތްތަކަށް މިއީ ވަރަށް ދިގުލައި ހިނގައިދާނެ ކަމެއް ކަމަށް ހީވިޔަސް އެކަން އެގޮތަށް ހިނގައިދާނެ ކަމަށް ގަބޫލު ނުކުރައްވާ ކަމުގައެވެ. އެހެން ބުނާ މީހުން އެބުނާ ވާހަކައަކީ އެއްވެސް ދަލީލެއް ނެތި ދައްކާ ވާހަކަ އެއް ކަމަށް ވެސް ޑރ. ހަސަން ހަމީދު ވިދާޅުވިއެވެ.
ބައެއް ބޭފުޅުން އެބަވިދާޅުވޭ މިއީ އަހަރަކަށް ދެ އަހަރަށް ދެމިގެން ދާނެ ކަމެއް ކަމަށް. އެކަމަކު އެހެން އެ ބޭފުޅުން ވިދާޅު ވަމުން ދާ އިރު އެކަމުގެ އެއްވެސް ދަލީލެއް ނެތް. އޭގެ ބަދަލުގައި ފަހަރަކު ގައުމަކުން އޯޕަން އަޕް ކުރަމުން އެދަނީ.ޗާންސެލަރ ޑރ. ހަސަން ހަމީދު
ބައްޔާ މެދު މާޔޫސްވާން ޖެހޭ މިންވަރު ކުޑަކަން ފާހަގަ ކުރައްވާ ޑރ. ހަސަން ހަމީދު ފާހަގަ ކުރެއްވި ގޮތުގައި، ދުނިޔޭގައި ބަލި ފުރަތަމަ ފެނުނު ވޫހާންގައި ބައްޔަށް ޕޮސިޓިވް ވީ މީހުންގެ ތެރެއިން އެއްވެސް ނިޝާނެއް ނުފެނި ބަލި ޖެހުނު މީހުންގެ ނިސްބަތް 17.8 އިން ސައްތަ ކަމުގައި ދިރާސާގައި އޮތް އިރު، ރާއްޖޭގައި ބަލި ޖެހޭ މީހުންގެ ތެރެއިން ބަލީގެ އަލާމާތެއް ނުފެންނަ މީހުންގެ ނިސްބަތަކީ 54 އިން ސައްތަ ކަން އޭނާ ފާހަގަ ކުރެއްވިއެވެ. އޭގެ މާނައަކީ ރާއްޖޭން ބަލި ޖެހޭ މީހުންގެ ތެރެއިން ދެބައިކުޅަ އެއްބައި މީހުންނަށް ބަލީގެ އެއްވެސް އަސަރެއް ނުކުރާ މީހުން ކަމުގައި ވުމެވެ.
އޭގެ އިތުރުން ޑރ. ހަސަން ހަމީދު ފާހަގަ ކުރެއްވި ގޮތުގައި، ބަލީގެ ނުރައްކާ އޮތް މިންވަރު ބޮޑުކޮށްގެން ވާހަކަ ދެއްކި މީހުން ބަލި ޖެހިގެން މަރުވާމީހުންގެ ނިސްބަތަކީ 3-4 އިން ސައްތަ ކަމަށް ބަލީގެ ކުރީކޮޅުގައި ބުނި ނަމަވެސް، ޖަރުމަނު ވިލާތުގެ ސައިންސްވެރިން މިހާރު ބުނަނީ ހަގީގަތުގައި، ބަލީގައި މަރުވާ މީހުންގެ ނިސްބަތަކީ 0.24 ކަމުގައެވެ.
ޑރ. ހަސަން ހަމީދު ވިދާޅުވީ، ރާއްޖޭގައި ބަލީގެ ޕީކް މާޒީވެ ހިނގައްޖެ ކަމަށް އޭނާ ދެކެވަޑައިގަންނަވާ ކަމުގައެވެ.
"އަޅުގަނޑަށް ވަރަށް ބޮޑަށް ހީވޭ ޕީކް މާޒީވެއްޖެ ހެން.ޗާންސެލަރ ޑރ. ހަސަން ހަމީދު
ޑރ. ހަސަން ހަމީދު ވިދާޅުވީ، އެހާ ނާ އުއްމީދީ ގޮތަކަށް ބައްޔާ މެދު ނުވިސްނާ، މިރޯދަ މަސް ނިމޭ އިރު މިކަން ނިމިގެން ސްކޫލްތަކާއި، ޔުނިވަރސިޓީތައް ފެށޭނެ ކަމަށް ބަލާ އެކަމަށް ތައްޔާރުވާންވީ ކަމުގައެވެ.
އެހާ ނާ އުއްމީދީ ގޮތަކަށް ނުވިސްނާ، މިރޯދަ މަސް ނިމޭ އިރު މިކަން ނިމިގެން ސްކޫލްތަކާއި، ޔުނިވަރސިޓީތައް ފެށޭނެ ކަމަށް ބެލުން ރަނގަޅު ކަމަށް ޑރ. ހަސަން ހަމީދު ވިދާޅުވިއެވެ. އެހެން ވީމާ އެކަމަށް ތައްޔާރު ވާންވީ.ޗާންސެލަރ ޑރ. ހަސަން ހަމީދު
