މެއި މަހުގެ މުސާރަ ކުޑަ ކުރަން ރައްޔިތުންގެ މަޖިލީހަށް ހުށަހަޅާނީ މެއި މަހުގެ ތެރޭގައި ނޫންކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.

ރާއްޖޭގައި ކޮވިޑް-19 ރޯގާ ފެތުރި، "ކޮމިއުނިޓީ ސްޕްރެޑް" އާއެކު ޙާލަތު އިތުރަށް ގޯސްވުމާއި ގުޅިގެން، ދައުލަތުގެ ޚަރަދު ކުޑަކުރުމުގެ ގޮތުން މުވައްޒަފުންގެ މުސާރައާއި އިނާޔަތްތަކުން އުނިކުރުމަށް ނިންމާފައިވާ ގޮތުގެ ތަފުޞީލު ފިނޭންސް މިނިސްޓްރީން ރައްޔިތުންގެ މަޖިލީހަށް ފޮނުވާފައިވާ ލިޔުމާއި ގުޅިގެން ރައްޔިތުންގެ މަޖިލީހުގެ ރައީސް، ރައީސް ނަޝީދު ވިދާޅުވީ، މެއި މަހުގެ މުސާރަ ކުޑަ ކުރަން ހުށަހަޅާނީ މެއި މަހު ނޫން ކަމަށާއި އެފަދަ ވާހަކައެއް މީހެއްގެ ގާތު ބުނަންވެސް އުނދަގޫވާނެ ކަމަށެވެ.

ރައީސް ނަޝީދު ވިދާޅުވީ، ވަޒީފާއާ ބެހޭ ޤާނޫނުގައި ތިން މަސް ދުވަހުގެ މުއްދަތެއް މިކަހަލަ ބާވަތުގެ ކަންކަމަށް ދީފައިވާ ކަމަށެވެ. އެގޮތުން ދައުލަތުގެ އަދި ސިވިލް ސަރވިސް މުވައްޒަފުންގެ ވެސް މުސާރައާ ގުޅޭ ކަންކަން ހިނގަން ޖެހޭނީ ވަޒީފާއާ ބެހޭ ޤާނޫނާ އެއްގޮތަށް ކަމަށް ޤަބޫލު ކުރައްވާ ކަމަށެވެ.

ރައީސް ނަޝީދު ވިދާޅުވީ މުސާރަތައް އުނިކުރަން ފިނޭންސް މިނިސްޓްރީ އެދިފައިވާ ގޮތަށް މަޖިލީހުން ދެކޭގޮތް ބެލުމަށް ފޮނުވި ނަމަވެސް މިއަދު ފާސްކޮށްފައި، ޖެހިގެން އަންނަ ދުވަހު މުސާރަ އުނި ކުރުމަކީ އެއްގޮތަކަށް ވެސް ހަމަޖެހޭ ގޮތެއް ކަމަށް ޤަބޫލުފުޅު ނުކުރައްވާ ކަމަށެވެ.

ރައީސް ނަޝީދު ވިދާޅުވީ، މަޖިލީހުގެ އިދާރާގެ މުވައްޒަފުންގެ މުސާރައަކީ މަޖިލީހުގެ ޢާންމު ކޮމެޓީން ނިންމާ ނިންމުމެއް ކަމަށްވާތީ، އެކަން އެކޮމެޓީން ބަލަމުންދާނެ ކަމަށެވެ. އަދި ފިނޭންސް މިނިސްޓްރީގެ މުސާރައިގެ އެ އޮނިގަނޑުން، މަޖިލީހުގެ އިދާރާގެ 8 މުވައްޒަފެއްގެ މުސާރައަށް ބަދަލު އަންނާނެ ކަމަށް ވެސް ރައީސް ނަޝީދު ވިދާޅުވި އެވެ.

ފިނޭންސް މިނިސްޓަރ އިބްރާހީމް އަމީރު ރައްޔިތުންގެ މަޖިލީހަށް ފޮނުއްވާފައިވާ ލިޔުމުގައި ވާގޮތުން، ދައުލަތުގެ އެންމެހައި މުވައްޒަފުންގެ އަސާސީ މުސާރައިގެ ނިޞްބަތުން އަސާސީ މުސާރައިން އުނިކުރަން ނިންމާފައި ވަނީ، 20،001ރ އަށްވުރެ މަތިން އަސާސީ މުސާރަ ލިބޭ ފަރާތްތަކުގެ މުސާރައިން ނެވެ.

މީގެއިތުރުން، ދައުލަތުގެ މުވައްޒަފުން ޖުމުލަ މުސާރައިން އެންމެ ގިނައިން ގެއަށް (ޓޭކް ހޯމް ޕޭ) ގެންދެވޭނެ މިންވަރު ވެސް ފިނޭންސް މިނިސްޓްރީން ވަނީ ސީލިންގތަކެއް ކަނޑައަޅާފަ އެވެ.