ކޮވިޑް-19ށް ޓެސްޓު ކުރުމުގެ މަސައްކަތުގައި މޯލްޑިވްސް ޕޮލިސް ސަރވިސްގެ ފޮރެންސިކްސް ޑިޕާޓްމެންޓުގެ ޓީމެއް މަސައްކަތް ކުރަމުންދާ ކަމަށް ޕޮލިސް ކޮމިޝަނަރ މުޙައްމަދު ޙަމީދު ވިދާޅުވެއްޖެ އެވެ.

ކޮވިޑް-19ށް މީހުން ޓެސްޓު ކުރުމުގެ 'ކެޕޭސިޓީ' އިތުރު ކުރުމަށް ކަމާ ބެހޭ މުއައްސަސާތަކުން ދަނީ މަސައްކަތް ކުރަމުންނެވެ. އެގޮތުން، ފުލުހުން ކުރަމުންދާ މަސައްކަތްތައް ހިއްސާ ކުރައްވާ ސީޕީ ހަމީދު ވިދާޅުވީ ކޮވިޑް-19ށް ޕީސީއާރް ޓެސްޓު ކުރުމުގެ މަސައްކަތުގައި ފުލުހުންގެ ފޮރެންސިކްސްގެ 12 އެނަލިސްޓަކު ޙަރަކާތްތެރިވަމުން އަންނަ ކަމަށެވެ.

މީގެ އިތުރުން، އޭޑީކޭ ހޮސްޕިޓަލުގެ ލޭބޯރެޓަރީގެ ހަތަރު ޓެކްނީޝަނުން ތަމްރީނު ކުރުމުގެ މަސައްކަތްތައް ކުރިޔަށްދާ ކަމަށް ވެސް ސީޕީ ހަމީދު ވިދާޅުވި އެވެ.

މާލެ ސިޓީގައި ކޮވިޑް-19 ހަލުވި މިނެއްގައި ފެތުރެމުން ދާއިރު، ކޮންޓޯލް ކުރުމަށް ކުރާ މަސައްކަތުގައި ފުލުހުންގެ ދައުރު ވަރަށް ބޮޑެވެ. އެގޮތުން ހުރިހާ ދިމާލެއްގައި ވެސް ފުލުހުން ދަނީ ޚިދުމަތް ކުރަމުން ދެއެވެ.

ކޮވިޑް-19 ގެ މަސައްކަތުގައި އިސް ސަފުގައި ޙަރަކާތްތެރިވާ 199 ޚިދުމަތްތެރިން ވައިރަސްއަށް ޕޮޒިޓިވްވެފައި ވާއިރު، މީގެ ތެރޭގައި 23 ފުލުހަކު ހިމެނެއެވެ.