މަޑަގަސްކަރައިން ކޮވިޑް-19 ޖެހިގެން ފުރަތަމަ ފަހަރަށް މީހަކު މަރުވެގެން ރިޕޯޓު ކޮށްފި އެވެ.

އަލްޖަޒީރާގައި ރިޕޯޓު ކޮށްފައިވާ ގޮތުން މަޑަގަސްކަރައިން ކޮވިޑް-19 ޖެހިފައިވާ 57 އަހަރުގެ ޞިއްޙީ އެހީތެރިއަކު ވަނީ ހޮނިހިރު ދުވަހުގެ ރޭގެ ވަގުތެއްގައި މި ބަލީގައި މަރުވެފަ އެވެ. އޭނާއަކީ ހަކުރުބަލީގެ އިތުރުން، ލޭމައްޗަށް ދިއުން ފަދަ ސިއްޙީ މައްސަލަތައް ހުރި މީހެއް ކަމަށް ރިޕޯޓުގައި ވެއެވެ.

އޭގެ އިތުރުން، އޭނާ މަރުވިކަމާއި، އެއީ އެ ޤައުމުގެ ސިއްޙީ މަސައްކަތް ކުރާ ޓީމުގައި ހިމެނޭ މީހެއްކަން އެ ޤައުމުގެ ކޮވިޑް-19 ޓާސްކްފޯހުގެ ތަރުޖަމާނު ހެންޓާ ޑެނިއަލް ވެސް ވަނީ ކަށަވަރު ކޮށްދެއްވާފަ އެވެ.

އެ ޤައުމުގައި ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ވެރިރަށް އަންތަނަނަރީވޯ، ފިނަރަނަންސޫގެ އިތުރުން ބޮޑެތި އެހެން ސިޓީތަކުގައި މާސްކު އެޅުމަށް ވަނީ މަޖުބޫރު ކޮށްފަ އެވެ.

އަލަށް އަމަލުކުރަން ފެށި މި ގާނޫނަށް އަމަލު ކުރަންވެސް ފަށާފައިވާއިރު، މީހަކު މަރުވެގެން ރިޕޯޓް ކޮށްފައި މިވަނީ ބޮޑެތި ސިޓީ ތަކުގައި ލޮކްޑައުންގެ ފިޔަވަޅުތަކަށް މަޑު މަޑުން ދޫދޭން ފަށާފައިވަނިކޮށެވެ. މަޑަގަސްކަރައިން މިހާތަނަށް ކޮވިޑް-19 ގެ 304 ކޭސް ރިޕޯޓް ކުރެވިފައި ވެއެވެ.