ކުރިޔަށް އޮތް ތަނުގައި ރާއްޖޭގައި ހޯމް ކަރަންޓީނު ކުރުމުގެ ކަންކަން ކުރިޔަށް ގެންދާއިރު އެކަން ކުރާނީ އެކަމަށްޓަކައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ ޝަރުތުތައް ފުރިހަމަވާ ތަންތަނުގައި ކަމަށް އެޗްޕީއޭގެ ޑޮކްޓަރ ޑރ. އިބްރާހީމް އަފްޒަލް ވިދާޅުވެއްޖެ އެވެ.
ހޮނިހިރު ދުވަހުގެ ރޭ ކުރިޔަށް ދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ ހޯމް ކަރަންޓީނު ކުރާނީ އެސެޓަޕް ފުރިހަމަ ވެފައި ހުންނަ ތަންތަނުގައި ކަމަށެވެ. އެގޮތުން ވަކިން އެމީހަކަށް ކޮޓަރިއަކާއި ފާހާނާއެއް ހުންނަންޖެހޭނެ ކަމަށް ޑރ. އަފްޒަލް ވިދާޅުވި އެވެ.
މީގެއިތުރުން ހޯމް ކަރަންޓީނަށް ލާ މީހާއަށް ތަފާތު އިރުޝާދުތައް އަޅުގަނޑުމެން ދޭނެ. އަމަލު ބަހައްޓަންޖެހޭނެ ގޮތްތައް. ކަރަންޓީނުގައި ގޭގައި ހުރި މީހާއާއި ގޭގެ އެހެން މީހުން މުއާމަލާތްތް ކުރަން ޖެހޭނެ ގޮތާއި ގޭތެރޭގެ ކަންކަން ބަހައްޓަންވީ ގޮތުގެ އިރުޝާދު ދެމުންދާނެ. އަދި ހަމަ އެކަހެރިވުން އޮންނަންވާނެ ކަރަންޓީނު ފެސިލިޓީއަކާ އެއްވަރަށް ގޭގައިވެސް. އޭރަށް ހޯމް ކަރަންޓީނަށް ދެވޭނީ.ޑރ އިބްރާހީމް އަފްޒަލް
ހޯމް ކަރަންޓީނަށް ލާ މީހަކަށް ތަފްސީލު ކޮށް ވިސްނޭނެ ވަރަށް އެކަންކަން ކިޔައިދޭނެ ކަމަަށާއި ހޯމް ކަރަންޓީނަށް ލާނީ އެކަންކަން ފުރިހަމަކުރެވޭ ކަމަށްވާނަމަ ކަމަށް ޑރ. އަފްޒަލް ވިދާޅުވި އެވެ.
ޑރ. އަފްޒަލް ވިދާޅުވީ މިހާރުވެސް ގޭތެރޭގައި އެފަދަ އާދަތައް ހަރުލެއްވުމަށް ފަރިތަކުރެވިދާނެ ކަމަށެވެ. އެގޮތުން ތަނެއްގައި އަތް ލާނަމަ އެތަނެއް ސާފުކުރަން ހަނދާން ކުރުން ކަހަލަ ކަންކަން މިހާރުވެސް ކުރެވިދާނެ ކަމަށް ޑރ. އަފްޒަލް ވިދާޅުވި އެވެ. އެގޮތުން ފާހާނަ ފަދަ ތަންތަނާއި ސިންކް ފަދަ ތަންތާންގައި އަތްލާ ނަމަ އެތަންތަން ސާފުކުރުން މުހިންމު ކަމަށް ޑރ. އަފްޒަލް ވިދާޅުވި އެވެ.
