ކާބޯތަކެތީގެ 10 ޓަނުގެ އެހީއާއެކު ބަންގްލަދޭޝްގެ އަސްކަރީ މަތިންދާބޯޓެއް މިއަދު ރާއްޖެއަށް އައިސްފި އެވެ.
ފޮރިން މިނިސްޓްރީން ބުނީ މަތިންދާބޯޓުގައި ގެނައި ތަކެތީގެ ތެރޭގައި ހިމެނެނީ ފިޔާ، ބިސް މުގު، އަލުވި، ކުކިންގ އޮއިލް، ބަރަބޯ، ތޮރާ، ކަރާ އަދި އަލަނާސި ހިމެނޭ ކަމަށެވެ. މީގެ އިތުރުން މި ފްލައިޓްގައި ބޭހާއި ބައެއް މެޑިކަލް އިކުއިޕްމަންޓް ރާއްޖެއަށް ގެނެސްފައި ވެއެވެ. ހިލޭ އެހީގެ ގޮތުގައި ބަންގްލަދޭޝްއިން ފޮނުވި މި އެހީއަކީ ދެ ޤައުމުގެ ގާތް ގުޅުމުގެ ރަމްޒެކެވެ.
ބަންގްލަދޭޝްއިން މީގެ ކުރިންވެސް އެޤައުމުގެ އަސްކަރީ މަނަވަރެއްގައި 100 ޓަނުގެ ހިލޭ އެހީ ފޮނުވާފައި ވެއެވެ.
ފޮރިން މިނިސްޓަރ އަބްދުﷲ ޝާހިދު ވަނީ ބަންގްލަދޭޝް ސަރުކާރުން ފޯރުކޮށްދެއްވި އެހީތެރިކަމަށްޓަކައި އެޤައުމުގެ ސަރުކާރާއި ރައްޔިތުންނާއި އަދި ޚާރިޖީ ވަޒީރާއި، އެއަރފޯސް އަށް ޝުކުުރު އަދާކުރައްވާފައެވެ.
މި މަތިންދާބޯޓު އަނބުރާ ބަންގްލަދޭޝްއަށް ފުރާނީ އާދިއްތަ ދުވަހު ހެނދުނެވެ. އަދި އަނބުރާ ބަންގްލަދޭޝަށް ދާއިރު ، ޤަވާޢިދާ ޚިލާފަށް ރާއްޖޭގައި އުޅޭ މީހުން އަނބުރާ ގައުމަށް ފޮނުވާލުމަށް ކުރަމުންދާ މަސައްކަތުގެ ތެރެއިން، ރާއްޖޭގައި ގަވާއިދާ ޚިލާފަށް އުޅެމުން އަންނަ ބަންގްލަދޭޝްގެ 70 މީހަކު މި މަތިންދާބޯޓުގައި ބަންގްލަދޭޝަށް ގެންދާނެ ކަމަށް ފޮރިން މިނިސްޓްރީން މަޢުލޫމާތު ދެއެވެ. އެ މަސައްކަތް ކުރިއަށްދާނީ ފޮރިން މިނިސްޓްރީއާއި، އިކޮނޮމިކް މިނިސްޓްރީގެ އިތުރުން ރާއްޖޭގައި ހުންނަ ބަންގްލަދޭޝް ހައިކޮމިޝަން ގުޅިގެންނެވެ.
