ބޯކޮށް ވާރޭވެހި އައްޑޫ ސިޓީގައި ފެންބޮޑުވެއްޖެ އެވެ.
ރާއްޖެ އެމްވީއަށް މައުލޫމާތު ދެއްވަމުން އައްޑޫ ސިޓީގެ މޭޔަރު އަބްދުﷲ ޞާދިޤު ވިދާޅުވީ ބުދަ ދުވަހުގެ ރެއިން ފެށިގެން އައްޑޫ ސިޓީއަށް ބޯކޮށް ވާރޭ ވެހެމުން ދާ ކަމަށެވެ.
އެކަމުގެ ސަބަބުން އައްޑޫ ސިޓީގެ ގުޅިފައިވާ ރަށްތަކުގެ މަގުތަކުގައި ފެންބޮޑުވެފައިވާ ކަަމަށް ޞާދިޤު ވިދާޅުވިއެވެ.
ފެންބޮޑުވުމުގެ ސަބަބުން ގޭގެއަށް ފެންވަދެ ގޭގޭގައި ބޭނުންކުރާ ފަރުނީޗަރު ތަކާއި ހިފާ ގެންގުޅޭ ތަކެއްޗަށް ގެއްލުން ވެފައިވާކަމަށް ކައުންސިލުން މައުލޫމާތު ދެއެވެ.
ޕަންޕް ބޭނުންކޮށްގެން ފެން ހިންދުމާއި ވެލި ބަސްތާ ޖެހުމުގެ މަސައްކަތް އެމްއެންޑީއެފާއި، ފުލުހުން އަދި ކަމާގުޅޭ އެހެނިހެން މުއައްސަސާތައް ގުޅިގެން ކުރަމުންދާ ކަމަށް ޞާދިޤު ވިދާޅުވިއެވެ.
މޫސުން ގޯސްވުމުގެ ސަބަބުން ލ. އަތޮޅުން ފެށިގެން އައްޑޫ ސިޓީއާއި ދެމެދުގެ ރަށްތަކަށް މޫސުމާއި ބެހޭ ގައުމީ އިދާރާއިން ވަނީ ޔެލޯ އެލަރޓް ނެރެފައެވެ. މެޓް އޮފީހުން ބުނީ މި އަތޮޅުތަކުގެ ރަށްތަކަށް ބޯކޮށް ވާރޭވެހި ގުގުރުން އެކަށީގެންވާ ކަމެވެ. އަދި ވިލާގަނޑުގައި 45 މޭލަށް ވައިގަދަވާނެ ކަމަށް މެޓް އޮފީހުން މައުލޫމާތު ދެއެވެ.
