އުމުރުން ދުވަސްވީ މީހުންގެ ސާމަޕަލް ނެގުމަށް އާންމުންގެ އެއްބާރުލުން ލިބެމުން ނުދާކަމަށް ވިދާޅުވެ، ޑރ. އިބްރާހިމް އަފްޒަލް ކަނބޮޑުވުން ފާޅުކުރައްވައިފި އެވެ.

ބުދަ ދުވަހު ނޫސްވެރިންނަށް މައުލޫމާތު ދެއްވަމުން، ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑަމޮލޮޖިސްޓް، ޑރ. އަފްޒަލް ވިދާޅުވީ އުމުރުން ދުވަސްވީ މީހުންގެ ރެންޑަމް ސާމްޕަލް ނެގުމުގައި އާއްމުންގެ އެއްބާރުލުން ނުލިބޭ ކަމަށެވެ. އެގޮތުން، ސާމްޕަލް ނަގަން އެދުމުން ސާމްޕަލް ދިނުމަށް އިންކާރުކުރާ ކަމަށް ޑރ. ވިދާޅުވި އެވެ.

ޑރ .އަފްޒަލް ވިދާޅުވީ މިގޮތަށް ރެންޑަމްކޮށް ސާމްޕަލް ނެގުމަކީ ވަރަށް މުހިންމު ކަމެއް ކަމަށެވެ. އަދި ޑރ. ވިދާޅުވީ މިކަން ކުރުމުގެ އެންމެ ބޮޑު އެއް މަގްސަދަކީ ހައި ރިސްކް ގްރޫޕްގެ ތެރޭގައި ހިމެނޭ އުމުރުން ދުވަސްވީ މީހުންގެ ކެޓެގެރީގައި ބަލި ހުރީ ކިހާ މިންވަރަކަށްތޯ ދެނެގަތުން ކަމަށެވެ. ސާމްޕަލް ނެގުމަށް އިންކާރު ކުރަމުންދަނީ ކޮވިޑް-19 އަށް ޕޮޒިޓިވް ވެދާނެ ކަމުގެ ބިރު އޮތުމުން ކަމަށް ވުމަކީ އެކަށިގެންވާކަމެއް ކަމަށް ޑރ. އަފްޒަލް ވިދާޅުވި އެވެ.

މި ރޯގާގެ އަސަރު އެންމެ ބޮޑަށް، އެންމެ އަވަހަށް ކުރަނީ، އުމުރުން ދުވަސްވީ މީހުންނަށް ކަމަށް ސިއްހީ ހޯދުންތަކުން ދައްކާއިރު، އާއިލާތަކުގައި ތިބި ދޮށީ އުމުރުގެ މީހުންނަށް އާއިލާތަކުން ޚާއްސަ ސަމާލުކަމެއް ދިނުމަށް ސަރުކާރުން ވަނީ އެދިފަ އެވެ. ގޭބިސީތަކުގައި އުޅޭ އުމުރުން ދުވަސްވީ މީހުންގެ މައުލޫމާތު ދެނެގަތުމުގެ ގޮތުން ސަރުކާރުން ވަނީ ގޭބިސީ ސަރވޭއެއް ފަށާފަ އެވެ.