އިތުރު 51 މީހަކު ކޮވިޑް-19 އަށް ޕޮޒިޓިވްވެ ޖުމްލަ އަދަދު 955ށް އަރައިފި އެވެ.

މިއީ ބުދަ ދުވަހުގެ މިހާތަނަށް ރިޕޯޓްކުރެވުނު ހަމައެކަނި ކޭސްތެކެވެ. މާލެ ތެރެއިން ވައިރަސް ފެތުރިގެން ދިޔަތާ މަސް ދުވަސް ވާން ކައިރިވެފައި ވާއިރު، މީގެ ތެރެއިން 935 މީހުންނަކީ އޭގެ ފަހުން ވައިރަސް އަށް ޕޮޒިޓިވްވެގެން ރިޕޯޓްކުރެވުނު ފަރާތްތަކެވެ.

ރާއްޖެއިން މިހާތަނަށް ފެނިފައިވާ ކޮވިޑް-19 ޖެހިފައިވާ މީހުންގެ ތެރެއިން އެންމެ ގިނަ އަދަދެއްގެ ބަޔަކު ނިސްބަތްވަނީ ބަންގްލަދޭޝް އަށެވެ. ދެވަނަ އަށް އެންމެ ގިނަ އަދަދެއްގެ ބަކު ނިސްބަތްވަނީ ދިވެހިރާއްޖެ އަށެވެ. ޕޮޒިޓިވްވީ މީހުންގެ ތެރޭގައި ގިނަ އަދަދެއްގެ އިންޑިއާ ރައްޔިތުން ވެސް ހިމެނެ އެވެ.

ކުރިއަށް އޮތް ދެ ހަފުތާއަކީ ރާއްޖޭގައި ވައިރަސް ފެތުރޭ މިންވަރު އެންމެ އިތުރުވާނެ ދެ ހަފުތާ ކަމަށް އަންދާޒާތަކުން ދައްކާއިރު، މި ސަރޖް ތިރިކުރަން ރައްޔިތުން ހާއްސަ ސަމާލުކަމެއް ދިނުމަށް މާހިރުން ވަނީ އިލްތިމާސްކޮށްފަ އެވެ. ސަރުކާރާއި ކަމާއިބެހޭ އިދާރާތަކުން އަންނަނީ މި ސަރޖަށް ތައްޔާރީތައް ވަމުންނެވެ.