އާންމު ސިއްހަތު ރައްކާތެރިކުރުމުގެ ގާނޫނުގެ 5 ވަނަ މާއްދާއަށް އަމަލު ކުރުމަށް ހެލްތު މިނިސްޓަރ އަބްދުﷲ އަމީންއަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގޮވާލައްވައިފި އެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި، ކޮވިޑް-19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން އާއިލާތަކާއި ވިޔަފާރިތަކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒުކުރުމާ މެދު ރައްޔިތުންގެ މަޖިލީހުން ދެކޭގޮތް ކަނޑައެޅުމާ ގުޅޭގޮތުން ރައްޔިތުންގެ މަޖިލީހަށް ހުށަހެޅި މައްސަލައާ ގުޅުގެން އިޖުތިމާއީ ކޮމެޓީގެ ދާއިރާގެ ތެރޭގައި ހިމެނޭ މަސައްކަތް، ކޮމިޓީން ދިރާސާކޮށް، ނިންމިގޮތުގެ ރިޕޯޓާ ގިނަ މެންބަރުން ބަހުޘް ކުރެއްވިއިރު، މަޖިލީހުގެ ރައީސް މުހައްމަދު ނަޝީދު ވެސް އެމަނިކުފާނުގެ ބައެއް ކަންބޮޑުވުންތައް ވަނީ ހިއްސާ ކުރައްވާފަ އެވެ.

މަޖިލީހުގެ މެންބަރުންނާއި މަޖިލީހުގެ ރައީސްގެ އެންމެބޮޑު އެއް ކަންބޮޑުވުމަކީ، ރަށަށް ނުދެވި މާލޭގައި ތާށިވެފައިވާ 10،000 މީހުންނާ ގުޅޭ މައްސަލަ އެވެ.

އެގޮތުން ރައީސް ނަޝީދު ވިދާޅުވީ، މިހާ ގިނަ ބަޔަކު މާލޭގައި ތާށިވެފައި ތިބެން ޖެހުމަކީ ވަރަށް ބޮޑަށް ކަންބޮޑުވެ ވަޑައިގަންނަވާ ކަމެއް ކަމަށާއި މިކަން މެދުވެރިވުމުގައި، އަދި މިހާލަތުގައި އާންމު ސިއްހަތު ރައްކާތެރިކުރުމުގެ ގާނޫނުން ހެލްތު މިނިސްޓަރު އަމަލު ކުރައްވަންޖެހޭ ހާއްސަ ކަންތައްތަކެއް ވާއިރު، އެކަންކަން ކުރައްވާފައި ނުވާތީ، ދިވެހި އެތައް ރައްޔިތުންނަކަށް ވަރަށް ބޮޑެތި ދަތިތަކާ ކުރިމަތިލާން ޖެހިފައިވާ ކަމަށެވެ.

ރައީސް ނަޝީދު ވަނީ އާންމު ސިއްހަތުގެ ގާނޫނުގައި ވާއެއްޗެއް ޖަލްސާގައި ވިދާޅުވެ ދެއްވާފަ އެވެ.

އާންމު ސިއްހަތު ރައްކާތެރިކުރުމުގެ ގާނޫނު 5 ވަނަ މާއްދާއަކީ ލާމަރުކަޒީ ބައެއް އުސޫލުތައް ކަމަށްބުނާ މާއްދާ އެވެ. މިމާއްދާގައި ބުނަނީ، ރަށު ކައުންސިލްތަކާއި އަތޮޅު ކައުންސިލްތަކާއި ސިޓީ ކައުންސިލްތަކުގެ އިހްތިޞާސް ހިނގާ ސަރަހައްދުތަކުގައި މި ގާނޫނުގެ ދަށުން ވަޒީރާ ކަންކަން ތަންފީޒުކުރުުގެ މަސްއޫލިއްޔަތު އެ ކައުންސިލްތަކުން އުފުލުމަށް މަގުފަހިކޮށްދީ، އެކަމަށް ގާނޫނީ ބާރު ލިބިދިނުމުގެ ގޮތުން، އޭގެތެރެއިން ކައުންސިލެއް ނުވަތަ ކައުންސިލްތަކެއް އެއީ، ކައުންސިލެއް ނިސްބަތްވާ ސަރަހައްދުގައި، މިގާނޫނު ތަންފީޒުކުރުމަށްޓަކައި އެސަރަހައްދަށް އައްޔަންކުރެވޭ އޭޖެންޓްކަމުގައި، މިގާނޫނުގެ ދަށުން ކަނޑައެޅުގެ އިޚުތިޔާރު ވަޒީރަށް ލިބިގެންވާ ކަމަށެވެ.

މީގެއިތުރުން، 5 ވަނަ މާއްދާގެ (ބ) ބުނަނީ، ރަށު ކައުންސިލްތަކާއި އަތޮޅު ކައުންސިލްތަކާއި ސިޓީ ކައުންސިލްތަކަށް، މިގާނޫނުގެ ދަށުން ހަވާލުކުރެވޭ މަސްއޫލިއްޔަތުތައް މި ގާނޫނުގެ ދަށުން ހަދާ ގަވާއިދެއްގައި ތަފުސީލުކޮށް ބަޔާންކޮށް، އާންމުކޮށް، އިއުލާނުކޮށް، ގެޒެޓްގައި ޝާއިއު ކުރަންވާނެ ކަމަށެވެ.

ރައީސް ނަޝީދު ވިދާޅުވީ، ރަށްރަށަށް ބަލި ދާނީ ހަމައެކަނި އިންސާނުންގެ ފަރާތުން ނޫންކަމަށާއި، އެހެންކަމުން، ރަށަށް ދާން ބޭނުންވާ ރައްޔިތުންނަށް ރަށަށް ދެވޭނެ އަދި ރަށުގައި ކަރަންޓީން ފެސިލިޓީއެއް ގާއިމުކުރުމަށް ފަހު، ކަރަންޓީން މުއްދަތު ހަމަވުމުން، އާއިލާއާއެކު ދިރިއުޅެވޭނެ އިންތިޒާމު ހަމަޖައްސަން ޖެހޭ ކަމަށެވެ.

ރައީސް ނަޝީދު އާއި މަޖިލީހުގެ މެންބަރުން ވަނީ ރަށްރަށުގައި ކަރަންޓީން ފެސިލިޓީތައް ގާއިމުކޮށް، ރަށްރަށަށް ދާންބޭނުންވާ ފަރާތްތަކަށް ވީހާވެސް އަވަހަކަށް ރަށަށް ދެވޭނެ އިންތިޒާމުތައް ހަމަޖައްސާ ދެއްވުމަށް ކަމާބެހޭ ފަރާތްްތަކުގެ ކިބައިން އެދިލައްވާފަ އެވެ.

މީގެއިތުރުން ރައީސް ނަޝީދު ވިދާޅުވީ، އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނު ކުރުމުގެ ކުރިން ވެސް ރާއްޖެއަށް ކޮވިޑް-19 އަންނާނެކަން ހުހިހާ އެއްމެންވެސް ގަބޫލު ކުރި ކަމަށާއި އަދި ރާއްޖޭގައި ކޮވިޑް-19 ފެތުރެން ފެށުމުން ލޮކްޑައުން ކުރި ނަމަވެސް، ރޯގާ ހަމަ ފެތުރެމުންދާ ކަމަށެވެ. އެހެންކަމުން، ރަށްރަށަށް ދާން ބޭނުންވާ ފަރާތްތައް މާލޭގައި ބޭތިއްބުމުގެ ބަދަލުގައި ރަށްރަށުގައި ކަރަންޓީން ފެސިލީޓަށް ހަދައި، އެތަންތަނަށް ފޮނުވުން މުހިއްމު ކަމަށެވެ. އަދި ކަރަންޓީންގެ މުއްދަތުގައި ވެސް އެމީހެއްގެ އާއިލާއިން ކާބޯތަކެތި ފޯރުކޮށްދީ، އަދި ކަރަންޓީން މުއްދަތު ހަމަވުމުން އާއިލާއާއެކު ވަގުތުތައް ހޭދަކުރެވޭނެ ގޮތް ވުމަކީ ވަރަށް މުހިއްމު ކަމެއް ކަމަށް ވެސް ރައީސް ނަޝީދު ވިދާޅުވި އެވެ.