ރާއްޖޭގެ ޓެސްޓިންގް ކެޕޭސިޓީ މިހާރަށް ވުރެ އިތުރު ނުކުރެވިއްޖެ ނަމަ ކުރިއަށް 2 ހަފުތާގެ ތެރޭގައި ފެށޭ ސަރޖް ދެނެނުގަނެވިދާނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑަމޮލޮޖިސްޓް، ޑރ. އިބްރާހިމް އަފްޒަލް ވިދާޅުވެއްޖެ އެވެ.

ކޮވިޑް-19 އާއި ގުޅޭ އެންމެ ފަހުގެ މައުލޫމާތު ހިއްސާ ކުރައްވަމުން ޑރ. އިބްރާހިމް އަފްޒަލް ވިދާޅުވީ ޓެސްޓު ކުރެވޭ މިންވަރު އިތުރު ނުކުރެވިއްޖެނަމަ މި މަހުގެ ފަހުކޮޅު އަންނާާނެ ކަމަށް ބެލެވޭ ސަރޖު ދެނެނުގަނެވިދާނެ ކަމަށެވެ. ނަމަވެސް، ޓެސްޓު ކުރެވޭ މިންވަރު އިތުރު ކުރެވިއްޖެ ނަމަ، ސަރޖްއާއި ގުޅިގެން އިތުރު ޔަގީން ކަމެއް ލިބޭނެ ކަމަށް ޑރ. އަފްޒަލް ވިދާޅުވި އެވެ.

އެގޮތުން، ރާއްޖޭގައި ބަލި ޖެހޭ މީހުންގެ ތެރެއިން 50 އިންސައްތަ މީހުންނަކީ ބަލީގެ އެއްވެސް އަލާމާތެއް ނުހުންނަ މީހުން ކަން ފާހަގަކުރައްވާ ޑރ. ވިދާޅުވީ، ޓެސްޓު ނުކުރެވިއްޖެ ނަމަ، އެފަދަ ކޭސްތައްވެސް ދެނެނުގަނެވޭނެ ކަމަށެވެ.

ބަލި ޖެހޭމީހުންގެ 50 އިންސައްތަ މީހުންނަކީ އަލާމާތެއް ނުފެންނަ މީހުންކަމަށް ވާއިރު ސަރޖް އައިތޯ ނުވަތަ ނޫންތޯ ޔަގީން ކުރެވޭނީ އެކްޓިވް ސަރވެއިލެންސްގެ ތެރެއިން ކަމަށް ޑރ. އަފްޒަލް ވިދާޅުވި އެވެ.

މީގެ އިތުރުން ޑރ. އަފްޒަލް ވިދާޅުވީ ލޮކްޑައުން އާއި ގުޅިގެން އެޅިފައިވާ ފިޔަވަޅުތަކަށް ބޯލަނބާ، ސާފުތާހިވުމުގެ ފިޔަވަޅުތަކަށް އިތުރު އިސްކަމެއްދީ، އުޅުމަށް ތަފާތު އަންނަ ވަރަކުން ބަލި ފެތުރޭ މިންވަރަށް ވެސް ބަދަލު އަންނާނެ ކަމަށެވެ.

އެޗްޕީއޭއިގެ ޕްރޮޖެކްޝަންސްތަކުން ދައްކާ ގޮތުގައި، މި ހިނގާ މެއި މަހުގެ 31 ވަނަ ދުވަހު ކުއްލިއަކަށް ފެންނަ ކޭސްތަކުގެ އަދަދު އިތުރުވާނެ އެވެ. އަދި އެ ދުވަހު، 1523 ޕޮޒިޓިވް ކޭސް މުޖުތަމައުގެ ތެރޭގައި އަލަށް ފެންނާނެ އެވެ. އަދި މީގެ ތެރެއިން ދެނެގަނެވޭނީ 300 އެއްހާ މީހުން ކަމަށް ދައްކަ އެވެ. ނަމަވެސް، ޓެސްޓުކުރެވޭ މިންވަރު އިތުރުކުރެވިއްޖެނަމަ، މި ކޭސްތަކުގެ ތެރެއިން ދެނެގަނެވޭ އަދަދު އިތުރުވާނެ އެވެ.

ޓެސްޓު ކުރެވޭ އަދަދު މަދުވުމަކީ ރާއްޖެއަށް ދިމާވެފައިވާ އެންމެ ބޮޑު އެއް ގޮންޖެހުމެވެ. އަދި މިކަން ހައްލުކުރުމަށް، ޓެސްޓިންގ ކެޕޭސިޓީ އިތުރުކުރުމަށް ގިނަގުނަ މަސައްކަތްތަކެއް ކުރެވެމުންދާ ކަމަށް އެންއީއޯސީގެ ތަރުޖަމާނު މަބްރޫކް އަޒީޒް ވަނީ ވިދާޅުވެފަ އެވެ. އެގޮތުން، މި ހިނގާ މެއި މަހުގެ 17 ވަނަ ދުވަހު، 200 ޓެސްޓު ހެއްދޭ މެޝިނެއް ގެނެވޭނެ ކަމަށް ހާމަކުރެއްވި އެވެ.

މެޝިންތައް ހޯދުމުގައި ދިމާވެފައިވާ ގޮންޖެހުންތައް ހިއްސާކުރައްވަމުން މަބްރޫކް ވިދާޅުވީ، ކޮވިޑް-19 އާ ގުޅިގެން ގިނަ ގައުމުތައް ލޮކްޑައުން ކޮށްފައިވުމާއި ގުޅިގެން ބޭނުންވާ މެޝިންތައް ގެނައުމަށް އުނދަގޫތައް ދިމާވާ ކަމަށެވެ. މި ގޮންޖެހުންތަކާއި އެކުވެސް، ރައީސް އޮފީހާއި، ސިއްހީ ވުޒާރާ އަދި އެސްޓީއޯއިން މި ވަގުތު ވެސް ކުރަމުންދާ ކަމަށް ވިދާޅުވި އެވެ.