ބޭހަކީ އާސަންދައިގެ ބަޖެޓުން އެންމެ ބޮޑު ހަރަދުކުރާ އެއް ކަމަކަށްވާއިރު ޒިންމާދާރު ކަމާއި އެކު ބޭސް ނެގުމުގައި އަމަލު ކުރުމަށް އާސަންދަ ކުންފުނިން އިލްތިމާސް ކޮށްފި އެވެ.
ރާއްޖެޓީވީގެ ކޮވިޑް-19 ކަވަރޭޖަށް ފޯނު މެދުވެރިކޮށް ދެއްވި ބަސްތީގަތުމެއްގައި، އާސަންދަ ކުންފުނީގެ ޑެޕިއުޓީ މެނޭޖަރ އައިޝަތު ޒަމީރާ ވިދާޅުވީ، މުއްދަތު ހަމަވެފައި ހުންނަ ބޭސް ސިޓީ އާއި ރަނގަޅަށް ޗެކްނުކޮށް ބޭސް ސިޓީ ފޮނުވުމުގެ ސަބަބުން ބޭސްތައް ޑެލިވަރީ ކުރުމުގައި ލަސްތަކެއް ދިމާވެފައިވާ ކަމަށެވެ. ޒަމީރާ ވިދާޅުވީ އެކަންތައް ކޮންމެވެސް ވަރަކަށް މިހާރު ހައްލުވެފައިވާ ކަމަށެވެ. ނަމަވެސް ޒިންމާދާރުކަމާއި އެކު ބޭސް ސިޓީ ފޮނުވުމުގައި އަމަލު ކުރުމަށް އޭނާ އިލްތިމާސް ކުރެއްވި އެވެ.
ބޭހަކީ އާސަންދަ ހަރަދުގެ ބޮޑު ބައި. ދަންނަވާލަން ބޭނުން މި ދަނޑިވަޅުގައި ވަރަށް ޒިންމާދާރު ކަމާއި އެކު ބޭސް ނެންގެވުމަށް އެކަމާއި ގުޅިގެން. ވަރަށް ބޮޑު ހަރަދެއް އާސަންދައިގެ ބަޖެޓުން ކުރާ ކަމެއް ނަންްގަވާ ބޭހަކީ.އައިޝަތު ޒަމީރާ - އާސަންދަ ކުންފުނީގެ ޑެޕިއުޓީ މެނޭޖަރ
ލޮކްޑައުންގެ ހާލަތުގައި ބޭސް ސިޓީ އަށް ބޭސް ނަގަން ބޭރަށް ގޮސް އުޅުމަކީ އެންމެ ރައްކާތެރި ގޮތަކަށް ނުވާތީވެ، އާސަންދައިން ވަނީ ދިގު މުއްދަތަކަށް ބޭސް ކާން ޖެހޭ މީހުންނަށް ތިން މަސް ދުވަސް ހަމަނުވާ ބޭސް ސިޓީ ވައިބަރ ކުރުުމުން އާސަންދައިގެ ފިހާރަތަކުން ބޭސް ޑެލިވަރ ކޮށްދޭ ގޮތަށް ވަނީ ހަމަޖައްސާފަ އެވެ. ބޭސް ސިޓީ ފޮނުވާއިރު ދިގު މުއްދަތަށް ބޭސް ބޭނުންކުރާ ފަރާތްތަކުން 15 ދުވަސް ކުރިން ބޭސް ސިޓީ އަށް ބޭސް ނެގުމަށް އާސަންދައިން އިލްތިމާސް ކުރެ އެވެ.
އާސަންދަ ލޯގު ޖަހާފައިވާ ބޭސް ސިޓީތަކަށް "އީ ޕްރިސްކްރިޕްޝަން" އަށް އާސަންދައިން ރަޖިސްޓަރ ކޮށްފައިވާ ކޮންމެ ތަނަކުންވެސް ބޭސް ލިބޭނެ އިންތިޒާމް ވަނީ ހަމަޖައްސާފަ އެވެ. އަދި އައިޖީއެމްއެޗް އަދި ހުޅުމާލެ ހޮސްޕިޓަލުން ދޭ ބޭސް ސިޓީއަށް ބޭސް އެސްޓީއޯ އިން ލިބޭނެ އިންތިޒާމް ވަނީ ހަމަޖައްސާފަ އެވެ.
ޒަމީރާ ވިދާޅުވީ، ބޭސް ޑެލިވަރީ ކޮށްދިނުމަށް ބޭނުންވާ ފާމަސީތަކާއި ވާހަކަ ދައްކައިގެން އެ މަސައްކަތް ކުރިޔަށް ދާކަމަށެވެ. ބޭސް ސިޓީ ފޮނުވާއިރު "އީ ޕްރިސްކްރިޕްޝަން" ތައް ބޭސް ދޫކުރާ ފާމަސީތަކަށް ފޯރުކޮށްދެމުން ގެންދިޔުމަށް އޭނާ އެދިވަޑައިގަތެވެ.
ބޭސް ސިޓީއަށް ބޭސް ފޯރުކޮށް ދިނުމުގައި ލަސްތަކެއްވާ ކަމުގެ ޝަކުވާތައް ވަނީ ގިނަވެފަ އެވެ. ޒަމީރާ ވިދާޅުވީ، ޝަކުވާތަކަށް ހައްލު ހޯދުމަށް މަސައްކަތް ކުރަމުންދާ ކަމަށާއި، އިތުރަށް ރަނގަޅު ކުރަން ޖެހޭ ކަންތައްތައްވެސް ބަލަމުންދާ ކަމަށެވެ.
ސިސްޓަމް ތެރެއިން ފަސޭހަކޮށްދެވޭނީ ކޮން ކަމެއްތޯ އަޅުގަނޑުމެންގެ ސަރވިސް ޕްރޮވައިޑަރސް އާ ވާހަކަ ދައްކައިގެން ސިސްޓަމް ތެރެއިން އަޅުގަނޑުމެންނަށް ރަނގަޅު ކުރެެވެން ހުރި ކޮން ކަންތައްތަކެއްތޯ.. ދިމާވާ ދަތިތަކަށް ހައްލު ހޯދުމަށް ގިނަ މަސައްކަތްތަކެއް ކުރެވޭ.އައިޝަތު ޒަމީރާ - އާސަންދަ ކުންފުނީގެ ޑެޕިއުޓީ މެނޭޖަރ
އަސަންދާ އިން ދަނީ އެ ކުންފުނީގެ ހަރަދުގައި ބޭރުގެ ގައުމުތަކުގައި ބޭސް ފަރުވާއަށް ގޮސްތިބި ފަރާތްތަކަށް އެހީތެރިކަން ފޯރުކޮށްދެމުންނެވެ. ކޮރޯނާވައިރަހާ ގުޅިގެން އަވަށްޓެރި ގައުމުތަކުގައި ބޭސް ފަރުވާއަށް ގޮސްތިބި ގިނަ އަދަދެއްްގެ ދިވެހިން އެބަތިބި އެވެ. ސަރުކާރުން ދަނީ އެ ފަރާތްތަކަށް ބޭނުންވަ އެހީތެރިކަން ފޯރުކޮށްދެމުންނެވެ.
